Hydrops Fetalis (သန္ဓေသား သို့မဟုတ် မွေးကင်းစကလေး၏ ခန္ဓာကိုယ်ဖောရောင်ခြင်း)

Hydrops Fetalis ဆိုသည်မှာ မွေးကင်းစကလေး သို့မဟုတ် သန္ဓေသား၏ ကိုယ်ခန္ဓာတစ်ခုလုံးတွင် ပြင်းထန်စွာ ဖောရောင်ခြင်း (oedema) ဖြစ်သည်။ ဖြစ်ပွါးမှု ရှားပါးသော်လည်း အသက်အန္တရာယ်ရှိသော အခြေအနေတစ်ခုဖြစ်သည်။ ခန္ဓာကိုယ်ရှိ အရည်စုနိုင်သော နေရာတိုင်းတွင် ဖြစ်ပွါးနိုင်သည်။ ဥပမာအားဖြင့် ဝမ်းဗိုက်ခေါင်း၊ အဆုတ်ကို ဖုံးအုပ်ထားသော အမြှေးပါးများ (pleura)၊ နှလုံးဖုံးအမြှေးပါး (pericardium) များ အတွင်း၌ အရည်များ ပုံမှန်မဟုတ်ဘဲ စုပုံလာခြင်း၊ အရေပြားအောက်တွင် အရည်စု၍ ဖောင်းတင်းလာခြင်း စသည်တို့ကြောင့် ခန္ဓာကိုယ်ဖောရောင်လာခြင်းဖြစ်သည်။

ထိုသို့မဟုတ်ဘဲ တစ်ခါတစ်ရံ ကိုယ်တွင်းအင်္ဂါ နှစ်ခု သို့မဟုတ် နှစ်ခုထက်ပိုသော နေရာများတွင် ပုံမှန်မဟုတ်သော အရည်များစုပုံနေခြင်းကို တွေ့ရတတ်သည်။ Hydrops fetalis သည် ရောဂါ (Disease) တစ်ခုမဟုတ်ဘဲ၊ သန္ဓေသားကို ထိခိုက်နေသော အကြောင်းရင်းခံတစ်ခုခုကြောင့် ဖြစ်လာသော လက္ခဏာ (Symptom) တစ်ရပ်ဖြစ်သည်။ ဖြစ်စေသော အကြောင်းရင်းခံကို ကုသနိုင်မှု ရှိမရှိပေါ်မူတည်၍ ရောဂါပြင်းထန်မှုနှင့် အသက်ရှင်နှုန်း ကွာခြားသည်။

ဖြစ်ပေါ်ရသောအကြောင်းရင်းများ

သန္ဓေသား သို့မဟုတ် မွေးကင်းစကလေး၏ ခန္ဓာကိုယ်ဖောရောင်ခြင်းကို ဖြစ်စေသည့် ရောဂါအခြေအနေများစွာ ရှိသော်လည်း မည်သည့်အကြောင်းရင်းကြောင့် ဖြစ်ပေါ်သည်ကို အတိအကျ မသိရပါ။ သွေးကြောမျှင်များ ပျက်စီးခြင်း၊ ပြန်ရည်ကြောစနစ်အတွင်း ပြန်ရည်စီးဆင်းမှု ပိတ်ဆို့ခြင်းစသည့်အကြောင်းရင်းများကြောင့် သွေးကြောအတွင်းမှ အရည်များ သွေးကြောပြင်ပရှိ တစ်ရှူးများကြားသို့ ရွေ့လျားသွား၍ ဖောရောင်ခြင်းများဖြစ်လာရသည်ဟု ယူဆကြသည်။ Hydrops Fetalis ကို ဖြစ်စေသည့်အကြောင်းရင်းများစွာကို အခြေခံ၍ အဓိကအုပ်စု (၂) စုခွဲခြားနိုင်သည်။

ကိုယ်ခံအားစနစ် တုံ့ပြန်ခြင်းကြောင့်ဖြစ်သော Hydrops Fetalis (Immune hydrops fetalis)
- ဤအမျိုးအစားသည် အများအားဖြင့် မိခင်နှင့်သန္ဓေသားကြား သွေးအမျိုးအစား မကိုက်ညီမှုကြောင့် အဓိကဖြစ်ပွါးသည်
- မိခင်၏ သွေးနီဥများနှင့် သန္ဓေသား၏ သွေးနီဥများတွင် မျောက်သွေးဟုခေါ်သော Rh factor ပရိုတင်းအမျိုးအစား မကိုက်ညီမှု (Rh imcompatibility) ကြောင့်ဖြစ်သည်
- မိခင်သည် Rh negative သွေးအမျိုးအစားဖြစ်ပြီး သန္ဓေသားသည် Rh positive ဖြစ်နေပါက မိခင်၏ခန္ဓာကိုယ်မှ သန္ဓေသား၏ သွေးနီဥများကို ဆန့်ကျင်သော ပဋိပစ္စည်းများ (Anti – D antibodies) ကို ထုတ်လုပ်မည်ဖြစ်သည်၊ ထိုပဋိပစ္စည်းများသည် သန္ဓေသား၏ သွေးနီဥများကို ပျက်စီးစေပြီး ခန္ဓာကိုယ်တစ်ခုလုံး ရောင်ရမ်းခြင်းကဲ့သို့ ပြဿနာများကို ဖြစ်စေနိုင်သည်
- နောက်ဆက်တွဲဆိုးကျိုးများအနေဖြင့် ပြင်းထန်သွေးအားနည်းခြင်း (severe anemia) နှင့် နှလုံးလုပ်ဆောင်ရည်ပျက်စီးခြင်း (heart failure) တို့ကို ဖြစ်ပေါ်လာစေသည်
- နောက်ထပ်ကိုယ်ဝန်ဆောင်ချိန်တွင်လည်း သန္ဓေသားသည် Rh positive ထပ်မံဖြစ်ပါက နောက်ဆက်တွဲပြဿနာများ ပိုမိုဆိုးဝါးနိုင်သည်
- Rh factor မကိုက်ညီမှုသည် အဖြစ်အများဆုံး အကြောင်းရင်းဖြစ်သော်လည်း အခြားသော သွေးနီဥများ၏ အခြားပဋိလှုံ့ပစ္စည်းများ (antigens) ဖြစ်သည့် Kell, Duffy နှင့် Kidd ပရိုတင်းများ မကိုက်ညီခြင်းတို့သည်လည်း ရှားပါးသော်လည်း Hydrops Fetalis ကို ဖြစ်စေနိုင်သည်
- ဤ Rh imcompatibility အမျိုးအစား Hydrops fetalis အတွက် Anti-D antibodies များကို တိုက်ဖျက်ပေးသော Anti-D immune globulin (RhoGAM) ဆေးထိုးခြင်းဖြင့် ကာကွယ်နိုင်သည်။ ၎င်းသည် မိခင်၏ ကိုယ်ခံအားစနစ်မှ ပဋိပစ္စည်းများ ထုတ်လုပ်ခြင်းကို ရပ်တန့်စေသည့်ဆေးဖြစ်သည်
ကိုယ်ခံအားစနစ် တုံ့ပြန်ခြင်းကြောင့်မဟုတ်သော Hydrops Fetalis (Nonimmune hydrops fetalis – NIHF)
ပို၍အဖြစ်များသော အမျိုးအစားဖြစ်ပြီး Hydrops fetalis အားလုံး၏ (၉၀) ရာခိုင်နှုန်းတွင် တွေ့ရသည်။ ဤအမျိုးအစား၌ သန္ဓေသားတွင် ကိုယ်ခန္ဓာအတွင်းရှိ အရည်များကို ထိန်းညှိနိုင်စွမ်းထိခိုက်စေနိုင်သည့် မွေးရာပါချို့ယွင်းချက် သို့မဟုတ် မျိုးဗီဇဆိုင်ရာရောဂါ၊ အခြေအနေတစ်ခုခု တွဲ၍ရှိနေတတ်သည်။
အဖြစ်များသော ရောဂါအခြေအနေများ
- မွေးရာပါ နှလုံးရောဂါများ (Cardiac disorders)
  - မွေးရာပါ နှလုံးဘယ်ဘက်ခြမ်းမဖွံ့ဖြိုးသောရောဂါ (Hypoplastic left heart syndrome)
  - မွေးရာပါ နှလုံးအဆို့ရှင်များ ဖွဲ့စည်းပုံ မူမမှန်သောရောဂါ (Endocardial cushion defects)
  - မွေးရာပါ အဆုတ်နှင့် အသက်ရှူလမ်းကြောင်းများ မူမမှန်သောရောဂါ (Congenital pulmonary airway malformation)
  - မွေးရာပါ နှလုံးခုန်နှုန်းမြန်သောရောဂါ (Paroxysmal supraventricular tachycardia)
- ခရိုမိုဆုမ်းချို့ယွင်းခြင်းဆိုင်ရာ ရောဂါများ (Chromosomal disorders)
  - ဒေါင်းလက္ခဏာစု (Down syndrome)
  - တာနာလက္ခဏာစု (Turner syndrome)
  - အက်ဒဝပ်လက္ခဏာစု (Edward syndrome)
- ဇီဝကမ္မဖြစ်စဉ် ရောဂါများ (Metabolic diseases)
  - Niemann-Pick disease type C
  - Gaucher disease type 2
- ကိုယ်ဝန်ဆောင်ချိန်တွင် ကူးစက်ခံရသော ရောဂါပိုးများ (Infections during pregnacncy)
  - ပါဗိုဗိုင်းရပ်စ်ပိုး (Parvovirus B19)
  - စီအမ်ဗီ ဗိုင်းရပ်စ်ပိုး (Cytomegalovirus)
  - ကာလသားရောဂါပိုး (Syphilis)
- သန္ဓေသားတွင် ဖြစ်သော ကင်ဆာအကျိတ်များ (Fetal tumours)
  - တင်ပါးဆုံမြီးညောင့်ရိုးတွင် ဖြစ်သော အကျိတ် (Sacrococcygeal teratoma)
  - အသည်းဆဲလ်များမှဖြစ်သော အကျိတ် (Hepatic tumor)
  - သန္ဓေသား အာရုံကြောဆဲလ်များမှဖြစ်သောကင်ဆာ (Neuroblastoma)
- အစာအိမ်အူလမ်းကြောင်းနှင့် ဆီးလမ်းကြောင်းဆိုင်ရာ ရောဂါများ (Gastrointestinal and Renal conditions)
  - မွေးရာပါ ဝမ်းဗိုက်ကြွက်သား မူမမှန်ရောဂါ (Prune belly syndrome)
  - မွေးရာပါ အူလမ်းကြောင်းလိမ်၍ ပိတ်နေသောရောဂါ (Volvulus)
  - မွေးရာပါ ဆီးတွင်းအသားဓာတ်ပါ ရောဂါ (Congenital nephrotic syndrome)
  - ရင်-ဝမ်းခြားကြွက်သားရှိ အပေါက်ကိုဖြတ်၍ မွေးရာပါ အူကျွံခြင်း (Diaphragmatic hernia)
  - မွေးကင်းစတွင် ရှိသောငယ်ချေးများကြောင့် ဝမ်းတွင်းအမြှေးပါးရောင်ခြင်း (Meconium peritonitis)
- မွေးရာပါ သွေးရောဂါအခြေအနေများ (Haematological conditions)
  - မွေးရာပါသွေးအားနည်းရောဂါ (Fanconi anemia)
  - အယ်ဖာ သာလာဆီးမီးယားရောဂါ (Αlpha-thalassemia)
  - သွေးနီဥ ပုံသဏ္ဌာန်မမှန်သော မွေးရာပါသွေးရောဂါ (Hereditary spherocytosis)
  - G-6PD အင်ဇိုင်းချို့တဲ့ခြင်း (Glucose-6-phosphate dehydrogenase deficiency)
  - PK အင်ဇိုင်းချို့တဲ့ခြင်း (Pyruvate kinase deficiency)
  - သွေးကင်ဆာရောဂါ (Leukemias) စသည့်ရောဂါများကြောင့် ဖြစ်ပွါးနိုင်သည်။

ရောဂါလက္ခဏာများ

သန္ဓေသား သို့မဟုတ် မွေးကင်းစကလေး၏ ခန္ဓာကိုယ်ဖောရောင်ခြင်းလက္ခဏာများကို ကိုယ်ဝန်ဆောင်ကာလ အာထရာဆောင်းရိုက်စဉ်အတွင်း၌ပင် တွေ့ရှိနိုင်သည်။ ကိုယ်ဝန်ဆောင်မိခင်နှင့် မွေးဖွားလာသော ကလေးတွင်လည်း လက္ခဏာများတွေ့ရနိုင်သည်။

အာထရာဆောင်းတွင် တွေ့နိုင်သော လက္ခဏာများ
- ရေမြွှာရည် (Amniotic fluid) ပမာဏများပြားလွန်းခြင်း
- အချင်း (Placenta) ထူနေခြင်း
- သန္ဓေသား၏ လည်ပင်းတစ်ဝိုက်တွင် အရည်အိတ်ကြီးတစ်ခု တွေ့ရခြင်း
- နှလုံး၊ အသည်း သို့မဟုတ် သရက်ရွက် ကြီးနေခြင်း
- နှလုံးနှင့် အဆုတ်ပတ်လည်၊ ဝမ်းဗိုက်အတွင်းတွင် အရည်များ စုပုံနေခြင်း
- အရေပြားနှင့် တစ်ရှူးများကြားတွင် အရည်များ စုပုံနေခြင်း
ကိုယ်ဝန်ဆောင်မိခင်တွင် တွေ့နိုင်သော လက္ခဏာများ
- ကိုယ်ဝန်ဆိပ်တက်ခြင်း (Preeclampsia)
- ဆီးထဲတွင် ပရိုတင်း (protein) ပမာဏ မြင့်မားနေခြင်း
- ခန္ဓာကိုယ်တစ်ခုလုံး ဖောရောင်ခြင်း
မွေးကင်းစကလေးတွင် တွေ့နိုင်သော လက္ခဏာများ
- ခန္ဓာကိုယ်တစ်ခုလုံး ဖောရောင်နေခြင်း
- အရေပြားပါးလွှာ၍ ပြောင်တင်းနေခြင်း
- အရေပြားအရောင် ပြောင်းလဲခြင်း
- အသက်ရှူရခက်ခဲခြင်း
- အရေပြားတွင် အနီစက်များပေါ်ခြင်း၊ အညိုအမည်းစွဲခြင်း
- နှလုံးပျက်စီးခြင်း (Heart failure)
- သွေးအားနည်းခြင်း (Anemia)
- အသားဝါခြင်း (Jaundice) စသည်တို့ဖြစ်သည်။

နောက်ဆက်တွဲပြဿနာများ

ဤအခြေအနေသည် ပြင်းထန်သော နောက်ဆက်တွဲပြဿနာများစွာကိုလည်း ဖြစ်စေနိုင်သည်။

ကိုယ်ဝန်ဆောင်ကာလ၌ပင် ရုတ်တရက် ကိုယ်ဝန်ပျက်ကျခြင်း (Spontaneous miscarriage)
ကလေးအသေ မွေးဖွားခြင်း (Still birth)
လမစေ့မီ မွေးဖွားခြင်း (Preterm delivery)
မွေးကင်းစကလေး အပြင်းအထန်ဖျားနာခြင်း သို့မဟုတ် သေဆုံးခြင်း (Severe illness or death of the newborn)

မွေးဖွားပြီးနောက် အသက်ရှင်သော ကလေးငယ်များတွင်လည်း အောက်ပါ နောက်ဆက်တွဲပြဿနာများ ဖြစ်ပွါးနိုင်သည်။

ကလေး၏ ကြီးထွားဖွံ့ဖြိုးမှု နှောင့်နှေးခြင်း (Developmental delays)
နာတာရှည် အဆုတ်ပျက်စီးခြင်း (Chronic lung damage)
အသည်းပျက်စီးခြင်း (Liver damage) စသည်တို့ဖြစ်သည်။

ဆေးရုံ၊ ဆေးခန်းပြသရန်

ကိုယ်ဝန်ဆောင်မိခင်တွင် အာထရာဆောင်းရိုက်ခြင်းမှ သိရှိ၍ဖြစ်စေ၊ မွေးခါစ မွေးကင်းစကလေးတွင် အထက်ပါ ဖောရောင်ခြင်း လက္ခဏာများတွေ့ရှိရလျှင်ဖြစ်စေ အထူးသတိပြုသင့်သည်။ ကိုယ်ဝန်ဆောင်အာထရာဆောင်းတွင် တွေ့ရှိပါက အန္တရာယ်များသောကိုယ်ဝန် (High risk preganancy) အဖြစ်သတ်မှတ်၍ မမွေးဖွားသေးသော သန္ဓေသားအတွက် သားဖွားမီးယပ်အထူးကုဆရာဝန်နှင့် မွေးကင်းစကလေး အထူးကုဆရာဝန်တို့ ပူးပေါင်း၍ ကလေးရော မိခင်ပါ အန္တရာယ်နည်းပါးစွာ မီးဖွားနိုင်ရန်အတွက် တိုင်ပင်ဆောင်ရွက်ကြမည်ဖြစ်သည်။ မွေးဖွားပြီးနောက်မှ ဖောရောင်ခြင်းအခြေအနေကို သိရှိသော မွေးကင်းစကလေးများကိုလည်း မွေးကင်းစ ကလေးအထူးကုဆရာဝန်များနှင့် သက်ဆိုင်ရာ ကလေးအထူးကုဆရာဝန်များအဖွဲ့မှ ဆက်လက်စောင့်ကြည့်၍ ကုသမှုများပေးမည်ဖြစ်သည်။

ရောဂါရှာဖွေခြင်း

ကိုယ်ဝန်ဆောင်စဉ် ရိုက်ကူးသော အာထရာဆောင်း (Prenatal ultrasound) တွင် Hydrops fetalis ၏ သံသယလက္ခဏာများကို တွေ့ရှိပါက သက်ဆိုင်ရာ သားဖွားမီးယပ်အထူးကုဆရာဝန်နှင့် မွေးကင်းစကလေး အထူးကုဆရာဝန်တို့ ပူးပေါင်း၍ ဤအခြေအနေ၏ အကြောင်းရင်းများကို အမြန်ဆုံးဆက်လက်ရှာဖွေမည်ဖြစ်သည်။ အကြောင်းမှာ အချို့သောအခြေအနေများကို ကြိုတင်ကုသနိုင်သောကြောင့် ဖြစ်သည်။ ထို့နောက် အောက်ပါစစ်ဆေးမှုများကို လိုအပ်သလို ဆက်လက်ပြုလုပ်ရမည်ဖြစ်သည်။

မိခင်၏ သွေးအုပ်စုအား စစ်ဆေးခြင်း (Maternal Rh antigen status)
ရေမြွှာရည်ကို ထုတ်ယူစစ်ဆေးခြင်း (Amniocentesis)
သန္ဓေသားမှ သွေးနမူနာယူ၍စစ်ဆေးခြင်း (Fetal blood sampling)
သန္ဓေသား၏ နှလုံးအား အသံလှိုင်းသုံးနှလုံးပုံရိပ်ဖော်စက်ဖြင့် စစ်ဆေးခြင်း (Fetal echocardiogram)
မျိုးဗီဇ စစ်ဆေးခြင်း (Genetic testing)
သန္ဓေသားအား သံလိုက်ဓာတ်မှန် (MRI) ရိုက်ခြင်း
သွေးစစ်ဆေးမှုများ (Complete blood count) နှင့်
ဗိုင်းရပ်စ်ကူးစက်မှုများအတွက် စစ်ဆေးခြင်း (Parvo B19, TORCH screening) တို့ကို ပြုလုပ်သင့်သည်။

ထိုသို့စစ်ဆေးမှုများ ပြုလုပ်သော်လည်း Hydrops fetalis ဖြစ်ပွါးသူ စုစုပေါင်း၏ ၅၀% ခန့်တွင် တိကျသောအကြောင်းရင်းကို ရှာမတွေ့နိုင်ပါ။ အကြောင်းရင်းရှာမတွေ့သော်လည်း အထူးကုဆရာဝန်များအဖွဲ့မှ သက်ဆိုင်ရာ ကုသမှုနည်းလမ်းများကို ဆက်လက်တိုင်ပင်ဆုံးဖြတ်မည်ဖြစ်သည်။

ယခုအခါ Prenatal Exome Sequencing ဟုခေါ်သော သန္ဓေသား မျိုးဗီဇစစ်ဆေးသော နည်းပညာကို အသုံးပြုခြင်းဖြင့် မျိုးဗီဇချို့ယွင်းချက်အချို့ (Single gene variations) ကို ရှာဖွေနိုင်လာသည်။ ဤသို့ တိကျသော အခြေအနေများ ရှာဖွေတွေ့ရှိခြင်းသည် မိသားစုကို အသိပေးဆွေးနွေးစဥ်နှင့် နောင်တွင် ထပ်မံသားသမီးယူမည့် မိဘများအတွက် အလားတူအခြေအနေ ဖြစ်ပွားနိုင်ခြေ (recurrence risk) ကို ခန့်မှန်းရာတွင် အထူးအရေးပါသည်။

ကုသခြင်း

သန္ဓေသား သို့မဟုတ် မွေးကင်းစကလေး၏ ခန္ဓာကိုယ်ဖောရောင်ခြင်းအတွက် ကုသမှုသည် ဖြစ်ပေါ်ရသော အကြောင်းရင်း၊ အခြေအနေပြင်းထန်မှုနှင့် ဖောရောင်ခြင်း စတင်ပေါ်ပေါက်လာသည့် သန္ဓေသား၏အသက် စသည့်အချက်များပေါ် မူတည်သည်။

အကြောင်းရင်းပေါ်မူတည်၍ ကုသမှုများစွာရှိသည်။ သန္ဓေသားဘဝတွင်

သန္ဓေသားအား သွေးသွင်းပေးခြင်း (Intrauterine fetal blood transfusion) – သန္ဓေသားသွေးအားနည်းခြင်းကို ကုသရန်အတွက် သန္ဓေသားကို ချက်ကြိုးမှတစ်ဆင့် သွေးပြန်သွင်းပေးခြင်း
နှလုံးခုန်နှုန်း မမှန်ခြင်းအတွက် ကုသသည့်ဆေးဝါးများ (Antiarrhythmic drugs) – သန္ဓေသား၌ နှလုံးခုန်နှုန်း မမှန်ပါက ကုသရန်အတွက် အချင်းမှတစ်ဆင့် ရောက်ရှိနိုင်သော ဆေးဝါးများကို မိခင်အား ပေးခြင်း
လမ်းလွှဲပိုက်ထည့်ခြင်း (Shunt placement) – သန္ဓေသား၏ အဆုတ်ပတ်လည်တွင် အရည်များ အလွန်စုနေပါက လမ်းကြောင်းပြောင်းလဲ စွန့်ထုတ်နိုင်ရန် လမ်းလွှဲပြွန်တစ်ခုထည့်ပေးခြင်း
သန္ဓေသား ခွဲစိတ်မှု (Fetal surgery) – သန္ဓေသား၌ Teratoma အကျိတ်တွေ့ရှိပါက ခွဲစိတ်ဆရာဝန်မှ အကျိတ်ကို ဖယ်ရှားပေးခြင်း စသည်တို့ဖြင့် ကုသနိုင်သည်

မွေးဖွားလာမည့် မွေးကင်းစကလေးအတွက် ကုသမှုတွင်

ခွဲစိတ်မွေးဖွားခြင်း (Cesarean delivery)
မိခင်နှင့် ကလေး၏အခြေအနေပေါ်မူတည်၍ သားဖွားဆရာဝန်မှ လိုအပ်လျှင် ခွဲစိတ်မွေးဖွားပေးမည်ဖြစ်ပြီး ကလေးကိုလည်း မွေးကင်းစကလေး အထူးကြပ်မတ်ကုသဆောင် (NICU) တွင် ချက်ချင်းပို့ဆောင်၍ အနီးကပ် ကြည့်ရှုစောင့်ရှောက်ရမည်ဖြစ်သည်။
အသက်ရှူစက်တပ်ရန် လိုအပ်ခြင်း (Ventilatory support)
မွေးကင်းစကလေးတွင် အသက်ရှူရခက်ခဲခြင်း ရှိလာပါက အောက်ဆီဂျင်ပေးခြင်း သို့မဟုတ် အသက်ရှူစက်တပ်ဆင်ခြင်း စသည်တို့ ပြုလုပ်နိုင်သည်။
စုပုံနေသောအရည်များကို ဖယ်ရှားခြင်း (Fluid removal)
ကလေး၏ အဆုတ်နှင့် ဝမ်းဗိုက်ပတ်လည်ရှိ အရည်ပိုများကို ဖယ်ရှားပေးခြင်း ပြုလုပ်နိုင်သည်။
သွေးသွင်းကုသခြင်း (Blood transfusion)
ကလေးတွင် သွေးအားနည်းသည့် လက္ခဏာများရှိပါက သွေးသွင်းကုသပေးနိုင်သည်။

ရောဂါရလဒ် ခန့်မှန်းချက်

သန္ဓေသား သို့မဟုတ် မွေးကင်းစကလေး၏ ခန္ဓာကိုယ်ဖောရောင်ခြင်းသည် အန္တရာယ်ရှိသော အခြေအနေဖြစ်ပြီး ထိုကလေးများ၏ ပျမ်းမျှအသက်ရှင်နှုန်း စုစုပေါင်းသည် ၅၀% အောက်သာရှိသည်။ ဖြစ်စေသောအကြောင်းရင်း၊ ပြင်းထန်မှု၊ မမွေးဖွားမီ ရရှိထားသော ကုသမှု၊ မွေးဖွားချိန် သန္ဓေသား၏ ကိုယ်ဝန်ပတ်၊ မွေးဖွားချိန်နှင့် မွေးကင်းစကလေးဘဝတွင် ရရှိနိုင်သော ကုသမှုများပေါ်မူတည်၍ အသက်ရှင်နှုန်းများ ကွာခြားနိုင်သည်။ ကိုယ်ဝန်၏ တတိယသုံးလပတ်မတိုင်မီကပင် ပြင်းထန်သောရောင်ရမ်းခြင်းများ ဖြစ်ပွားခြင်းသည် ကလေးသေဆုံးမှုနှုန်းကို မြင့်မားစေနိုင်သည်။ သန္ဓေသား နှလုံးခုန်နှုန်း မူမမှန်ခြင်း (fetal arrhythmia) ကဲ့သို့ ကုသနိုင်သည့် အကြောင်းရင်းများအတွက် အသက်ရှင်ရန်အလားအလာ ပိုကောင်းပြီး၊ မွေးရာပါ ချို့ယွင်းချက်များရှိခြင်း စသည့်အခြေအနေများအတွက်မူ အလားအလာ ပိုဆိုးနိုင်သည်။

ကာကွယ်ခြင်း

ကိုယ်ခံအားစနစ် တုံ့ပြန်ခြင်းကြောင့်မဟုတ်သော Nonimmune Hydrops Fetalis ကို ကြိုတင်ကာကွယ်၍ မရသော်လည်း ကိုယ်ခံအားစနစ် တုံ့ပြန်ခြင်းကြောင့်ဖြစ်သော Immune Hydrops Fetalis ကို ကိုယ်ဝန်ဆောင်စဉ်နှင့် မွေးဖွားပြီးနောက် RhoGAM ဆေးထိုးခြင်းဖြင့် ကာကွယ်နိုင်သည်။

References:

Cleveland Clinic. (n.d.). Hydrops fetalis. Retrieved October 23, 2025, from https://my.clevelandclinic.org/health/diseases/hydrops-fetalis
Children’s Hospital [Boston]. (n.d.). Hydrops fetalis. Retrieved October 23, 2025, from https://www.childrenshospital.org/conditions/hydrops-fetalis
Stanford Children’s Health. (n.d.). Hydrops fetalis. Retrieved October 23, 2025, from https://www.stanfordchildrens.org/en/topic/default?id=hydrops-fetalis-90-P02374
Medscape. (n.d.). Hydrops fetalis: Overview. Retrieved October 23, 2025, from https://emedicine.medscape.com/article/974571-overview?form=fpf
Vanaparthy, R., Vadakekut, E. S., & Mahdy, H. (2025). Nonimmune hydrops fetalis. In StatPearls [Internet]. StatPearls Publishing. Retrieved from https://www.ncbi.nlm.nih.gov/books/NBK563214/

Published: 26 November 2025