Tympanostomy (နားစည်မြှေးတွင် အပေါက်ဖောက်၍ ပိုက်ထည့်ကုသခြင်း)

နားစည်မြှေးတွင် အပေါက်ဖောက်၍ ပိုက်ထည့်ကုသခြင်း (Tympanostomy) သည် နားနှာခေါင်းလည်ချောင်း အထူးကုဆရာဝန်များမှ ပြုလုပ်လေ့ရှိသော အသေးစားခွဲစိတ်မှုတစ်မျိုးဖြစ်သည်။ နားအလယ်ခန်းပိုးဝင်ခြင်း (Otitis media) နှင့် အခြားပြဿနာများအတွက် နားစည်တွင် ပိုက်ငယ်တစ်ခု ထည့်သွင်းတပ်ဆင်ရန် ပြုလုပ်သော ခွဲစိတ်မှု ဖြစ်သည်။ နားစည်ပိုက်ထည့်ခြင်းသည် ကလေးများတွင် ပြုလုပ်မှုများသော ခွဲစိတ်မှုတစ်ခုဖြစ်ပြီး လူကြီးများတွင်လည်း တစ်ခါတစ်ရံ ပြုလုပ်ရလေ့ရှိသည်။

နားအလယ်ခန်း (The middle ear cavity)

နားအလယ်ပိုင်းသည် နားစည် (Eardrum) ၏ အနောက်ဘက်တွင် ရှိသော လေဖြင့်ပြည့်နေသည့် အခန်းငယ်တစ်ခုဖြစ်ပြီး နားအတွင်းပိုင်း (Inner ear) နှင့် ဆက်စပ်နေသည်။ နားအလယ်ပိုင်းအတွင်း၌ နူးညံ့သော အရိုးငယ် (၃) ခုရှိပြီး နားစည်သို့ လာရောက်ရိုက်ခတ်သော အသံတုန်ခါမှုများကို ထိုအရိုးများမှတစ်ဆင့် အတွင်းနားသို့ ပို့ဆောင်ပေးပြီး အသံကြားစေရန် ကူညီလုပ်ဆောင်ပေးသည်။ ထို့ပြင် နားအလယ်ပိုင်းနှင့် နှာခေါင်းအနောက်ဘက်ပိုင်းရှိ လည်ချောင်းနှင့်ထိစပ်နေသောနေရာ (Nasopharynx) ကို ဆက်သွယ်ပေးထားသောပြွန် (Eustachian tube) ရှိပြီး ၎င်းသည် နားအလယ်ပိုင်းအတွင်းရှိ လေဖိအားကို ထိန်းညှိပေးကာ နားအတွင်းသို့ လေကောင်းလေသန့်များ ရရှိစေသည့်အပြင် အရည်များစုလာပါက စီးဆင်းစေရန် ကူညီပေးသည်။ သို့သော် နှာခေါင်းနှင့် လည်ချောင်းအတွင်း ရောဂါပိုးများ ဝင်‌ရောက်၍ ရောင်ရမ်းခြင်းများ ဖြစ်လာပါက ထိုပြွန်သည်လည်း ရောင်ရမ်းလာပြီး ကျဥ်းသွားတတ်သည်။ ထိုအခါ နားအလယ်ပိုင်းအတွင်း စုစည်းလာသော အရည်များ မစီးဆင်းနိုင်တော့သဖြင့် နားကိုက်ခြင်း၊ နားလေးခြင်းစသည့် လက္ခဏာများ ခံစားလာရနိုင်သည်။ ကလေးများတွင် ပြွန်များသည် လူကြီးများထက် ပိုမိုကျဉ်းမြောင်းပြီး ရေပြင်ညီတစ်တန်းတည်းသဖွယ် ဖြစ်နေသောကြောင့် အရည်များ စီးဆင်းရန် ပိုမိုခက်ခဲကာ ပိတ်ဆို့လွယ်သည်။

နားစည်မြှေးတွင်ထည့်သောပိုက်များ (Ear tubes or Tympanostomy tubes)

နားစည်မြှေးတွင်ထည့်သောပိုက်ဆိုသည်မှာ ပလတ်စတစ် သို့မဟုတ် သတ္တုဖြင့် ပြုလုပ်ထားသော သေးငယ်ပြီး အခေါင်းပါသည့် ပြွန်ချောင်း သို့မဟုတ် ပိုက်များ ဖြစ်ပြီး နားစည်မြှေး (tympanic membrane) တွင် ထည့်သွင်းတပ်ဆင်ရန် ထုတ်လုပ်ထားခြင်းဖြစ်သည်။ ထိုနားစည်ပိုက် ထည့်ပေးခြင်းဖြင့် နားအလယ်ပိုင်းသို့ လေဝင်လေထွက်ကောင်းစေသည့်အပြင် နားစည်အနောက်ဘက်တွင် အရည်များစုပုံနေခြင်းကို ကာကွယ်တားဆီးပေးသည်။

တစ်ခါတစ်ရံ ပိုက်ထည့်ခြင်းမပြုလုပ်ဘဲ နားစည်မြှေးတွင် အပေါက်ငယ်သာဖောက်သော ခွဲစိတ်မှု (Myringotomy) ကို ပြုလုပ်လေ့ရှိသည်။ နားအလယ်ပိုင်းအခန်း၌ ပိုလျှံနေသော အရည်များကို စီးဆင်းစေရန် နားစည်မြှေးကို ခွဲစိတ်ဓားငယ်ဖြင့် ခွဲရာ (Incision) ပေးခြင်းဖြစ်သည်။ Myringotomy တစ်မျိုးတည်းကို သီးခြားလုပ်ဆောင်လေ့ရှိသကဲ့သို့ အများအားဖြင့် နားစည်ပိုက်ထည့်ခြင်း (Tympanostomy) နှင့် ပေါင်းစပ်လုပ်ဆောင်လေ့ရှိသည်။

ပြုလုပ်ရန်လိုအပ်သော ရောဂါနှင့်အခြေအနေများ

နားစည်မြှေးတွင် အပေါက်ဖောက်၍ ပိုက်ထည့်ကုသခြင်း (Tympanostomy) ပြုလုပ်ရန် လိုအပ်သည့် အခြေအနေများသည် အဓိကအားဖြင့် နားအလယ်ပိုင်း ရောင်ရမ်းပိုးဝင်ခြင်းနှင့် အရည်များ စုပုံခြင်းတို့ကြောင့်ဖြစ်သည်။

ကလေးငယ်များတွင် အောက်ပါ အခြေအနေများကြောင့် နားစည်ပိုက် ထည့်ရန် လိုအပ်သည်။

1. မကြာခဏ နားပိုးဝင်ရောင်ရမ်းခြင်း သို့မဟုတ် နာတာရှည် နားပိုးဝင်ရောင်ရမ်းခြင်း
   • ပြင်းထန်သော လတ်တလော နားအလယ်ပိုင်း ရောင်ရမ်းခြင်း (Acute Otitis Media)
     (၆) လအတွင်း (၃) ကြိမ် သို့မဟုတ် (၁) နှစ်အတွင်း (၄) ကြိမ်နှင့်အထက် လတ်တလော နားအလယ်ပိုင်း ရောင်ရမ်းခြင်းဖြစ်ပွါးသူ ကလေးများအတွက် နောက်ထပ်ပိုးဝင်ရောင်ရမ်းခြင်းများကို ကာကွယ်နိုင်သည်။
   • နားအလယ်ပိုင်း အရည်များ စုခြင်း (Otitis Media with Effusion – OME)
     ပိုးဝင်ပြီးနောက် နားအလယ်ပိုင်းအခန်းတွင် အရည်များ ကျန်နေခြင်း သို့မဟုတ် အရည်များ မစီးဆင်းအောင် တားဆီးထားသည့် အခြားအခြေအနေများကြောင့် ဖြစ်နိုင်သည်။ အရည်စုပုံမှုကြောင့် အကြားအာရုံ ဆုံးရှုံးခြင်းနှင့် ဟန်ချက်မထိန်းနိုင်ခြင်း ပြဿနာများ ဖြစ်စေနိုင်သည်။
   • နာတာရှည် နားအလယ်ပိုင်း ရောင်ရမ်း၍ ပြည်တည်ခြင်း (Chronic Suppurative Otitis Media – CSOM)
     ကာလကြာရှည်စွာ ရောင်ရမ်း၍ ပြည်တည်ပြီး နားစည်ပေါက်ကာ နားမှ ပြည်များ ဆက်တိုက် စီးကျနေသည့် အခြေအနေဖြစ်သည်။ နားစည်ပိုက်ထည့်ခြင်းဖြင့် အရည်များနှင့် ပြည်များ စီးဆင်းစေရန်နှင့် နားအတွင်းသို့ နားဆေးရည်များ တိုက်ရိုက်ထည့်ရန် လမ်းကြောင်း ဖန်တီးပေးသည်။
2. နားအကြားအာရုံ ထိခိုက်စေသည့် အခြားအခြေအနေများ
   • နားအလယ်ပိုင်းအတွင်း အရည်များ စုပုံလာခြင်းကြောင့် အကြားအာရုံ ဆုံးရှုံးခြင်း ပြဿနာများ ဖြစ်လာခြင်း
   • နားထိခိုက်ဒဏ်ရာရခြင်း သို့မဟုတ် နားလမ်းကြောင်း ပုံသဏ္ဌာန်မမှန်ခြင်း

လူကြီးများတွင်မူ အဓိကအားဖြင့်_

• လေဖိအားပြောင်းလဲမှုကြောင့် ဖြစ်ပေါ်သော နားနာကျင်မှု (Barotrauma) ကို ကုသရန်အတွက် အများဆုံး အသုံးပြုသည် (ဥပမာ _ ရေငုပ်ခြင်း သို့မဟုတ် လေယာဉ်ဖြင့် မကြာခဏ ခရီးသွားခြင်းကြောင့် ဖြစ်တတ်သည်)

စောစီးစွာ ကုသမှု မခံယူပါက ဖြစ်နိုင်သည့် အန္တရာယ်များ

အထက်ပါအခြေအနေများကို စောစီးစွာ မကုသမိပါက အထူးသဖြင့် ကလေးများတွင် စကားပြောစွမ်းရည် နှောင့်နှေးခြင်း သို့မဟုတ် အကြားအာရုံ ဆုံးရှုံးခြင်းကဲ့သို့ အန္တရာယ်ရှိသည့် ကျန်းမာရေးဆိုင်ရာ ပြဿနာများစွာ ဆက်လက်ဖြစ်ပွါးလာနိုင်သည်။

အကျိုးကျေးဇူးများ

နားစည်ပိုက်ထည့်ခြင်းဖြင့်_

• နားပိုးဝင်နိုင်ခြေကို လျှော့ချပေးသည်
• အကြားအာရုံကို ပိုမိုကောင်းမွန်စေသည်
• စကားပြောဆိုဆက်သွယ်မှုများကို ပိုမိုကောင်းမွန်စေသည်
• နားပိုးဝင်ခြင်းနှင့်ဆက်စပ်သော အိပ်စက်မှုဆိုင်ရာ ပြဿနာများကို သက်သာစေနိုင်သည်။

ကြိုတင်သိရှိထားရမည့် အချက်များ

နားစည်တွင် ပိုက်ထည့်ထားသော်လည်း ကလေးများတွင် နားပိုးဝင်ရောင်ရမ်းခြင်းများ ဖြစ်ပွါးနိုင်ခြေရှိသေးသည်။ နားစည်ထည့်ပိုက်အများစုသည် (၉)လ မှ (၁၈)လအတွင်း အလိုအလျောက် ပြန်ပြုတ်ထွက်သွားစေရန် ပြုလုပ်ထားပြီး ပိုက်ပြုတ်ပြီးနောက် ကျန်ခဲ့သည့် အပေါက်များသည်လည်း တဖြည်းဖြည်း အနာကျက်၍ ပြန်ပိတ်သွားလေ့ရှိသည်။ နှစ်နှစ်အထိ နားစည်ပိုက် ပြုတ်ထွက်ခြင်းမရှိပါက ဒုတိယအကြိမ် ခွဲစိတ်၍ ပြန်ထုတ်ရန် လိုအပ်နိုင်သည်။ ပိုက်ပြန်ထုတ်ချိန်တွင် ကျန်ခဲ့သော အပေါက်နေရာကိုလည်း တပါတည်း ခွဲစိတ်၍ ပိတ်ပေးရနိုင်သည်။

ကုသပုံအဆင့်ဆင့်

ခွဲစိတ်ကုသမှုမခံယူမီ
သက်ဆိုင်ရာ နားနှာခေါင်းလည်ချောင်း အထူးကုဆရာဝန်မှ နားစည်မြှေးအပေါက်ဖောက်၍ ပိုက်ထည့်ရန် လိုအပ်သော အကြောင်းရင်းခံနှင့် ခွဲစိတ်မှုအကြောင်းကို ရှင်းပြမည်ဖြစ်သည်။ ခွဲစိတ်မှု၏ ကောင်းကျိုး၊ ဆိုးကျိုးများနှင့် နောက်ဆက်တွဲ ဖြစ်နိုင်ခြေများကို အသေးစိတ်ရှင်းလင်းပြောကြားမည်ဖြစ်ပြီး ခွဲစိတ်ရန် သဘောတူညီချက်တောင်းခံမည်။ ကလေးလူနာဖြစ်ပါက မိဘအုပ်ထိန်းသူထံမှ သဘောတူညီချက်တောင်းခံမည်။ ဆရာဝန်အား မိမိကလေးသောက်သုံးနေသော ဆေးဝါးများ၊ ပဋိဇီဝပိုးသတ်ဆေးများကဲ့သို့ ဆေးဝါးများနှင့် ဓာတ်မတည့်မှု သို့မဟုတ် အခြားဆိုးရွားသော တုံ့ပြန်မှုများ ရှိမရှိကို ပြောပြထားရမည်။ မေ့ဆေး၊ ထုံဆေးအသုံးပြု၍ ခွဲစိတ်ခံရဖူးခြင်း ရှိမရှိ၊ မေ့‌ဆေး၊ ထုံဆေးကြောင့် နောက်ဆက်တွဲပြဿနာများ ရှိမရှိကိုလည်း အသိပေးထားသင့်သည်။

ခွဲစိတ်ရန် သဘောတူညီမှု ပေးပြီးနောက် ဆရာဝန်မှ ခွဲစိတ်ရန် ရက်ချိန်းဆုံးဖြတ်ပေးမည်ဖြစ်သည်။ ဆေးရုံ သို့မဟုတ် ဆေးခန်းသို့ လာရမည့်အချိန်၊ ခွဲစိတ်မည့်နေ့တွင် အစာစတင်ရှောင်ရမည့်အချိန်၊ သောက်လာသင့်သောဆေးဝါးများစသည်တို့ကို အသေးစိတ် ညွှန်ကြားမည်ဖြစ်သည်။ ခွဲစိတ်မှုသည် အသေးစားခွဲစိတ်မှုဖြစ်သောကြောင့် အတွင်းလူနာအဖြစ် ဆေးရုံကြိုတင်တက်ရန်မလိုဘဲ ပြင်ပလူနာအဖြစ်သာ နေ့ချင်းပြီး ခွဲစိတ်မှုခံယူနိုင်သည်။

ခွဲစိတ်၍ နားစည်ပိုက်ထည့်ခြင်း

• ခွဲစိတ်၍ နားစည်ပိုက်ထည့်ခြင်းကို ခွဲစိတ်ခန်းတွင် ပြုလုပ်လေ့ရှိပြီး ပုံမှန်အားဖြင့် (၁၅) မိနစ်ခန့်သာ ကြာမြင့်သည်
• အများအားဖြင့် ကလေးများတွင် မေ့ဆေး (general anesthesia) အသုံးပြု၍ လုပ်ဆောင်လေ့ရှိပြီး လူကြီးများတွင်မူ အခြေအနေပေါ်မူတည်၍ ထုံဆေး (local anesthesia) ဖြင့်လည်း ပြုလုပ်လေ့ရှိသည်
• မေ့ဆေး (သို့မဟုတ်) ထုံဆေးပေးပြီးနောက် ဆရာဝန်မှ ခွဲစိတ်ဓားငယ် (သို့မဟုတ်) လေဆာဖြင့် နားစည်တွင် အပေါက်သေးသေးလေးတစ်ခု ဦးစွာဖောက်မည်
• ထို့နောက် နားအလယ်ပိုင်းအခန်းမှ အရည်များကို စုပ်ထုတ်ခြင်း (suction) ပြုလုပ်မည်
• အရည်များ ကုန်သွားလျှင် နားစည်ရှိ ဖောက်ထားသော အပေါက်ထဲသို့ ပြွန်ကို ထည့်သွင်းလိုက်မည်ဖြစ်သည်
• ခွဲစိတ်နေစဉ်အတွင်း ကလေး (သို့မဟုတ်) လူကြီးလူနာ၏ နှလုံးခုန်နှုန်း၊ သွေးပေါင်ချိန်နှင့် သွေးတွင်းအောက်ဆီဂျင်တို့ကို ကိရိယာများအသုံးပြု၍ စောင့်ကြည့်နေမည်

ခွဲစိတ်ပြီးနောက်

• ခွဲစိတ်ပြီးနောက် လူနာကို အနီးကပ်စောင့်ကြည့်ခန်းသို့ ခေတ္တရွှေ့ပြောင်း၍ စောင့်ကြည့်ရမည်၊ လူနာကောင်းစွာ သတိရပါက နောက်ထပ်နာရီအနည်းငယ်အတွင်း အိမ်သို့ ပြန်နိုင်သည်
• ခွဲစိတ်မှုနှင့် မေ့ဆေး၊ ထုံ‌ဆေးများ၏ အာနိသင်ကြောင့် လူနာတွင် အိပ်ငိုက်ခြင်း၊ စိတ်တိုခြင်း၊ ပျို့ခြင်း၊ ‌အန်ခြင်း၊ နားအနည်းငယ်ကိုက်ခြင်းများ ဖြစ်နိုင်သော်လည်း အများအားဖြင့် ခွဲစိတ်မှုပြုလုပ်ပြီး (၂၄) နာရီအတွင်း ပြန်လည်သက်သာသွားလေ့ရှိသည်၊ (၂၄) နာရီကျော်လျှင် ကျောင်း၊ အလုပ် (သို့မဟုတ်) ပုံမှန်လုပ်ငန်းဆောင်တာများကို ပြန်လည်လုပ်ဆောင်နိုင်မည်ဖြစ်သည်
• နားကိုက်ခြင်းအတွက် အကိုက်အခဲပျောက်ဆေးများကို ဆရာဝန်ညွှန်ကြားချက်အတိုင်း‌ သောက်ပေးနိုင်သည်

နောက်ဆက်တွဲဆိုးကျိုးများ

နားစည်ပိုက်ထည့်သွင်းခြင်းသည် ပြင်းထန်သော ပြဿနာများ ဖြစ်နိုင်ခြေ အလွန်နည်းပါးသည်။ ဖြစ်နိုင်ခြေရှိသော အန္တရာယ်များမှာ_

• နားမှ သွေးထွက်ခြင်း
• နားပိုးဝင်ရောင်ရမ်းမှုများ ထပ်ခါတလဲလဲဖြစ်ခြင်း
• နားမှ အရည်များ ဆက်တိုက်ထွက်ခြင်း (Otorrhoea)
• သွေး၊ အချွဲနှင့် နားဖာချေးများကြောင့် ပိုက်ပိတ်ဆို့ခြင်း
• နားစည်တွင် အမာရွတ်ဖြစ်ခြင်း
• ပိုက်များ စောစီးစွာ ပြုတ်ထွက်ခြင်း သို့မဟုတ် ကြာမြင့်စွာ ကျန်ရှိနေခြင်း
• ပိုက်ပြုတ်ထွက်ပြီးနောက် သို့မဟုတ် ဖယ်ထုတ်ပြီးနောက် နားစည်အပေါက် မပိတ်ခြင်း [ထိုသို့ဖြစ်ပါက အပေါက်ကို နောက်ထပ်ခွဲစိတ်မှု (Tympanoplasty) ဖြင့် ပြုပြင်ရမည်]
• နားစည်ထည့်ပိုက်ကို အကြိမ်များစွာ ခွဲစိတ်ထည့်ရသော အခြေအနေများတွင် နားစည်ကျုံ့သွားခြင်း သို့မဟုတ် မာကျောသွားခြင်း

မေ့ဆေး၏ နောက်ဆက်တွဲဆိုးကျိုးများ
နားစည်ပိုက်ထည့်သွင်းရန် ခွဲစိတ်ကုသမှုခံယူသော ကလေးများတွင် အများအားဖြင့် တွေ့ရတတ်သည်။ မေ့ဆေး၏ အန္တရာယ်မှာ နည်းပါးသော်လည်း ဖြစ်နိုင်ခြေရှိသော ပြဿနာများမှာ_

• ခွဲစိတ်ပြီးနောက် ဗိုက်အောင့်ခြင်း သို့မဟုတ် အော့အန်ခြင်း
• အသက်ရှူရခက်ခဲခြင်း
• ဓာတ်မတည့်ခြင်း
• နှလုံးခုန်နှုန်း မမှန်ခြင်း စသည်တို့ဖြစ်သည်။

ဆရာဝန်နှင့် ချက်ချင်းပြန်လည်ဆက်သွယ်သင့်သောအခြေအနေများ
ခွဲစိတ်ပြီးနောက် ရက်ချိန်းမတိုင်မီ အောက်ပါအခြေအနေများ ဖြစ်ပေါ်လာပါက ခွဲစိတ်ပေးသော ဆရာဝန်နှင့် အမြန်ဆုံး ပြန်လည်ပြသသင့်သည်။

• ဆေးသောက်သော်လည်း နားကိုက်ခြင်းမှာ မသက်သာခြင်း
• အဖျားကြီးခြင်း သို့မဟုတ် ချမ်းတုန်ခြင်း
• ပထမရက်အနည်းငယ်ကြာပြီးနောက် နားမှ အရည်ထွက်ခြင်းများ တိုးလာခြင်း
• နားမှ အဝါရောင်၊ အညိုရောင် အရည်များ သို့မဟုတ် သွေးများ တစ်ပတ်နှင့်အထက် ပိုကြာအောင် ဆက်တိုက်ထွက်နေခြင်း
• အကြားအာရုံပြဿနာများ သို့မဟုတ် ဟန်ချက်မထိန်းနိုင်ခြင်း ပြဿနာများ ဆက်လက်ရှိနေခြင်း စသည်တို့ ရှိပါက ရက်ချိန်းအတိုင်းမစောင့်ဘဲ ဆရာဝန်နှင့် အမြန်ဆုံးပြန်လည်ပြသသင့်သည်။

လိုက်နာဆောင်ရွက်ရမည့် အချက်များ

ခွဲစိတ်၍ ပိုက်ထည့်ပြီးနောက် ခွဲစိတ်ဆရာဝန်မှ ညွှန်ကြားထားသည့် အချက်များအတိုင်း စနစ်တကျလိုက်နာလုပ်ဆောင်ရမည်ဖြစ်သည်။

• နားပိုးဝင်ခြင်းမှ ကာကွယ်ရန် ပဋိဇီဝပိုးသတ်ဆေးပါသော နားဆေးရည်များ
  နားမှ အရည်ထွက်ခြင်း သို့မဟုတ် အခြားပိုးဝင်ခြင်း လက္ခဏာများ မရှိသော်လည်း ညွှန်ကြားထားသည့်အတိုင်း ဆေးရည်များကို အစက်ချထည့်ပေးသင့်သည်။
• နားကျပ်များ (Earplugs)
  ရေကူးခြင်း၊ ရေချိုးခြင်းစသည့်အချိန်များတွင် နားကျပ်များ အသုံးပြုသင့်ကြောင်း အကြံပေးချက်များရှိသော်လည်း အခြားအခြေအနေများတွင် နားကျပ်များတပ်ဆင်ထားရန် မလိုပါ။
• (၂)ပတ် မှ (၄)ပတ်အတွင်း ရက်ချိန်း ပြန်လည်ပြသခြင်း
  သက်ဆိုင်ရာခွဲစိတ်ဆရာဝန်မှ ရက်ချိန်းပြန်ခေါ်၍ ပိုက်များ နေရာတကျရှိမရှိနှင့် ကောင်းစွာ အလုပ်လုပ်နေခြင်း ရှိမရှိကို စစ်ဆေးမည်။ ထို့နောက်တွင်လည်း (၄ – ၆) လတွင် တစ်ကြိမ်စီ ထပ်မံ ရက်ချိန်းပြသရမည်။
• အကြားအာရုံစစ်ဆေးခြင်း (Hearing tests)
  နားစည်တွင် ပိုက်မထည့်မီက အကြားအာရုံထိခိုက်မှုရှိခဲ့သော ကလေးများတွင် ခွဲစိတ်ပြီးနောက်ပိုင်း တစ်လခွဲ (၆ ပတ်) ခန့်အကြာတွင် အကြားအာရုံတိုးတက်ခြင်း ရှိမရှိ ထပ်မံစစ်ဆေးရန် လိုအပ်နိုင်သည်။

References

1. Cleveland Clinic. (n.d.). Ear tubes (tympanostomy). Cleveland Clinic. Retrieved September 29, 2025, from https://my.clevelandclinic.org/health/treatments/15609-ear-tubes-tympanostomy
2. Johns Hopkins Medicine. (n.d.). Ear tube insertion. Johns Hopkins Medicine. Retrieved September 29, 2025, from https://www.hopkinsmedicine.org/health/treatment-tests-and-therapies/ear-tube-insertion
3. KidsHealth. (n.d.). Ear infections. Nemours KidsHealth. Retrieved September 29, 2025, from https://kidshealth.org/en/parents/ear-infections.html
4. Mayo Clinic. (n.d.). Ear tubes. Mayo Foundation for Medical Education and Research. Retrieved September 29, 2025, from https://www.mayoclinic.org/tests-procedures/ear-tubes/about/pac-20384667
5. WebMD. (n.d.). Does your child need tubes for ear infections? WebMD. Retrieved September 29, 2025, from https://www.webmd.com/cold-and-flu/ear-infection/child-need-tubes-ear-infection
6. Children’s Hospital Boston. (n.d.). Ear tubes. Boston Children’s Hospital. Retrieved September 29, 2025, from https://www.childrenshospital.org/treatments/ear-tubes

Published: 14 October 2025