ခွဲစိတ်မွေးဖွားခြင်းဆိုသည်မှာ မွေးလမ်းကြောင်းမှ သဘာဝအတိုင်းမွေးဖွားခြင်းမဟုတ်ဘဲ ဝမ်းဗိုက်နှင့်သားအိမ်ကို ခွဲစိတ်ပြီး ကလေးကို မွေးဖွားခြင်းကိုဆိုလိုသည်။ သဘာဝအတိုင်းမွေးဖွားပါက မိခင်နှင့်ကလေးအတွက် အသက်အန္တရာယ်ရှိနိုင်သည့်အခြေအနေများတွင် ကလေးကိုခွဲစိတ်မွေးဖွားရသည်။ ယေဘုယျအားဖြင့် ခွဲစိတ်မွေးဖွားခြင်းသည် သဘာအတိုင်းမွေးဖွားခြင်းထက် အန္တရာယ်ပိုများပြီး နာလန်ထူချိန် ပိုကြာတတ်သည်။
ခွဲစိတ်မွေးဖွားရသည့် အကြောင်းရင်းများ
မိခင်သည် ရောဂါအခံရှိလျှင်သော်လည်းကောင်း၊ သဘာဝအတိုင်းမွေးဖွားနေစဉ် မိခင် (သို့မဟုတ်) ကလေး အသက်အန္တရာယ် တစ်စုံတစ်ရာရှိလာလျှင်သော်လည်းကောင်း ကလေးကို ခွဲစိတ်မွေးဖွားရနိုင်သည်။ ခွဲစိတ်မွေးဖွားရာတွင်
- ခွဲမည့်ရက်ကြိုတင်သတ်မှတ်ပြီး ခွဲစိတ်မွေးဖွားခြင်းနှင့်
- အရေးပေါ်ခွဲစိတ်မွေးဖွားခြင်းဟူ၍ (၂) မျိုးရှိသည်။
ခွဲမည့်ရက်ကြိုတင်သတ်မှတ်ပြီး ခွဲစိတ်မွေးဖွားခြင်း အကြောင်းရင်းများ
- မိခင်တင်ပါးဆုံရိုးခွင်နှင့် ကလေးအရွယ်အစားမမျှတခြင်း – သဘာဝအတိုင်းမွေးဖွားခြင်းအတွက် မိခင်တင်ပါးဆုံရိုးခွင်အတွင်းမှ ဖြတ်သန်း၍မွေးဖွားရန် ကလေး၏ဦးခေါင်း (သို့မဟုတ်) ကိုယ်ခန္ဓာသည်အရွယ် ကြီးလွန်းနေလျှင် သို့မဟုတ် မိခင်တင်ပါးဆုံရိုးခွင်သည် ပုံမှန်ထက်ကျဉ်းမြောင်းနေလျှင် ပုံမှန်အရွယ်အစားရှိ ကလေးကို သဘာဝအတိုင်း မွေးလမ်းကြောင်းမှ မွေးဖွားရန် မဖြစ်နိုင်သဖြင့် ခွဲစိတ်မွေးဖွားရနိုင်သည်။
- ယခင်ကိုယ်ဝန်ကို အကြောင်းတစ်ခုခုကြောင့် ဝမ်းဗိုက်မှ ခွဲစိတ်၍ ကလေးမွေးဖွားဖူးသူများသည် နောက်တစ်ကြိမ် ကိုယ်ဝန်ဆောင်ပါက သဘာဝအတိုင်း မွေးလမ်းကြောင်းမှ မွေးဖွားနိုင်သော်လည်း ထိုသို့ မွေးဖွားရန် စိုးရိမ်ပူပန်တတ်ကြသည်။ ယခင်ကိုယ်ဝန်ကို သဘာဝအတိုင်း မွေးဖွားရာ၌ အခက်အခဲရှိခဲ့ခြင်း ကြောင့်ဖြစ်စေ၊ ယခုကိုယ်ဝန်ကို သဘာဝအတိုင်းမွေးစဥ် သားအိမ်ခွဲကြောင်းနေရာမှ ကွဲထွက်မည်ကို စိုးရိမ်ခြင်းကြောင့်ဖြစ်စေ ခွဲစိတ်မွေးဖွားရန် ပို၍အားသန်ကြသည်။
- ထို့ပြင် သားဖွားမီးယပ်ဆရာဝန်အနေဖြင့် ယခင်ကိုယ်ဝန်ခွဲစိတ်မွေးဖွားထားသည့် သားအိမ်ပေါ်မှ ခွဲကြောင်းရာကို ထည့်သွင်းစဥ်းစား၍ ယခုကိုယ်ဝန်အတွက် သဘာဝအတိုင်းမွေးဖွားမည် သို့မဟုတ် ခွဲစိတ်မွေးဖွားမည်ကို ဆုံးဖြတ်ရသည်။ Classical scar ဟုခေါ်သော သားအိမ်ပေါ် ဒေါင်လိုက်ခွဲကြောင်း ရှိလျှင်သော်လည်းကောင်း၊ သားအိမ်အသားလုံး ခွဲစိတ်ထုတ်ထားဖူးသည့်ရာဇဝင် ရှိလျှင်သော်လည်းကောင်း သဘာဝအတိုင်းမွေးဖွားသည့်အခါ သားအိမ်ကွဲနိုင်သည့်အတွက် ကလေးကို ခွဲစိတ်မွေးဖွားရသည်။
- အမြွှာကိုယ်ဝန်ဆောင်ထားပြီး ပထမကလေး၏ ဦးတိုက်ပိုင်းသည် တင်ပါးဆုံပိုင်းဖြစ်နေလျှင် သော်လည်းကောင်း၊ နှစ်ယောက်ထက်ပိုသော အမြွှာကိုယ်ဝန်ဆောင်ထားလျှင် သော်လည်းကောင်း ကလေးကိုခွဲစိတ်မွေးဖွားရသည်။
- ယခုကိုယ်ဝန်တွင် အချင်းသည် ကလေး၏ ဦးတိုက်ထားသောအပိုင်း (ဦးခေါင်း သို့မဟုတ် တင်ပါးဆုံ) ၏အောက်ပိုင်းတွင်တည်ရှိပြီး ကလေးထွက်မည့်လမ်းကြောင်းကိုပိတ်ထားလျှင် ကလေးကိုခွဲစိတ်မွေးဖွားရသည်။
- ကလေး၏ အနေအထားသည် သားအိမ်ထဲ၌ ကန့်လန့်ဖြတ်ဖြစ်နေလျှင် (transverse lie) ကလေးကို ခွဲစိတ်မွေးဖွားရသည်။
- ကလေးသည် တင်ပါးဆုံပိုင်းဖြင့် ဦးတိုက်နေလျှင် ခွဲစိတ်မွေးဖွားရတတ်သည်။
- ကလေး၏ မွေးရာပါ ခန္ဓာကိုယ်ချို့ယွင်းချက်ကြောင့် သော်လည်းကောင်း၊ မိခင်၏သားအိမ်တွင် ကြီးမားသောအသားလုံးရှိနေပြီး ကလေးထွက်မည့်လမ်းကြောင်းကို အဟန့်အတားဖြစ်နေလျှင် သော်လည်းကောင်း ကလေးကိုခွဲစိတ်မွေးဖွားရသည်။
အရေးပေါ်ခွဲစိတ်မွေးဖွားခြင်း အကြောင်းရင်းများ
- မီးဖွားနေစဉ် ပုံမှန်မွေးဖွားချိန်ထက်ကြာမြင့်လာပြီး မွေးဖွားမှုဖြစ်စဉ်တိုးတက်မှုမရှိခြင်း
- ကလေး၏ ချက်ကြိုး မွေးလမ်းကြောင်းမှ ထွက်ကျလာခြင်း
- ကလေး၏အချင်း မီးမဖွားမီ ကွာကျခြင်း
- မီးဖွားနေစဉ် ကလေးနှလုံးခုန်သံများ ပုံမှန်မဟုတ်တော့သည့်အတွက် သဘာဝအတိုင်း ဆက်လက်မွေးဖွားရန် မဖြစ်နိုင်တော့ခြင်း တို့ဖြစ်သည်။
ခွဲစိတ်မွေးဖွားခြင်း၏ ကောင်းကျိုးများ
- ခွဲမည့်ရက်ကြိုတင်သတ်မှတ်ပြီး ကလေးကိုခွဲစိတ်မွေးဖွားခြင်းသည် မိမိကလေးကို စီစဉ်ထားသောအချိန်၊ နေ့ရက်အတိုင်း မွေးဖွားနိုင်ခြင်း၊ အန္တရာယ်ပိုရှိသောအရေးပေါ်ခွဲစိတ်၍ ကလေးမွေးဖွားသည့်ဖြစ်စဉ်ကို ရှောင်လွှဲနိုင်ခြင်း
- ကလေးကိုခွဲစိတ်မွေးဖွားခြင်းသည် သဘာဝအတိုင်းမွေးဖွားခြင်းကြောင့် မိန်းမကိုယ်ဒဏ်ရာ ရနိုင်သော အခြေအနေများကို ရှောင်ရှားနိုင်ခြင်း
- ဆီးမထိန်းနိုင်သော ဝေဒနာဖြစ်ပေါ်နိုင်မှုနည်းခြင်း (မွေးဖွားပြီးနောက် ဆီးမထိန်းနိုင်ခြင်း ပြဿနာသည် သဘာဝအတိုင်း မွေးဖွားသူ (၂)ယောက်တွင် (၁)ယောက်ဖြစ်နိုင်ပြီး ခွဲစိတ်မွေးသူ(၄)ယောက်တွင် (၁) ယောက်သာ ဖြစ်နိုင်သည်)
ခွဲစိတ်မွေးဖွားပုံ အဆင့်ဆင့်
မခွဲစိတ်မီ ကနဦးဆောင်ရွက်ချက်များ
- ခွဲစိတ်ပုံအဆင့်ဆင့်နှင့် ကောင်းကျိုးဆိုးကျိုးများကို ခွဲမွေးပေးမည့် သားဖွားမီးယပ်အထူးကုဆရာဝန်မှ ဆွေးနွေးရှင်းပြပေးပြီး မိခင်မှ ခွဲစိတ်မွေးဖွားရန် သဘောတူကြောင်း လက်မှတ်ထိုးပေးရမည်။
- ခွဲစိတ်မွေးဖွားမည့်နေ့တွင် မေ့ဆေးဆရာဝန်မှ နာကျင်မှုမရှိစေရန် ခါးထုံဆေး (Epidural or Spinal) ထိုးပေးသည့်အခါ ရင်သားအောက်ပိုင်းမှ ခြေဖျားထိထုံနေမည့်အကြောင်း ရှင်းပြဆွေးနွေးမည်။
- ခွဲစိတ်မည့်နေရာနားရှိ အမွှေးအမျှင်များကို ရိတ်ထားရမည်။
- ဆီးအိမ်တွင်း ဆီး မရှိနေစေရန် ဆီးပိုက်ထည့်ရမည်။
- မိခင်၏ နှလုံးခုန်နှုန်းနှင့် သွေးပေါင်ချိန်ကို Monitor စက်မှတဆင့် အစဉ်စောင့်ကြပ်ကြည့်ရှုနေရမည်။
- မိခင်၏လက်ခုံ (သို့မဟုတ်) လက်ကောက်ဝတ်တွင် သွေးကြောထဲသို့ ဆေးနှင့်ဆေးရည်ထည့်နိုင်ရန် အပ်စိုက်ထားမည်။
- အကယ်၍ မိခင် (သို့မဟုတ်) ကလေး၏ ကျန်းမာရေးလိုအပ်ချက်အရ အရေးပေါ် ခွဲစိတ်မွေးဖွားရလျှင် သက်ဆိုင်ရာ သားဖွားမီးယပ်အထူးကုဆရာဝန်မှ ကလေးကို အမြန်ဆုံး ခွဲစိတ်မွေးဖွားပေးလိမ့်မည်။ လိုအပ်ပါက မေ့ဆေးပေး၍ ကလေးကို လျင်မြန်စွာ ခွဲမွေးပေးလိမ့်မည်။
ခွဲမွေးပုံ အဆင့်များ
- ကလေးကို ခွဲစိတ်မွေးဖွားလျှင် (planned C-section) ခါးထုံဆေးပေးထားသောကြောင့် မိခင်သည် နိုးနေလိမ့်မည်။ မေ့ဆေးနှင့် ခွဲမှသာ အိပ်ပျော်နေလိမ့်မည်။
- ခွဲမည့်ဆရာဝန်မှ မိခင်၏ဝမ်းဗိုက်ကို ပိုးသတ်ဆေးရည်နှင့် ဆေးကြောခြင်း၊ ကလေးထံ အောက်ဆီဂျင်များစွာ ရောက်ရှိနေစေရန် မိခင်အား အောက်ဆီဂျင်ပေးထားခြင်း၊ ခွဲစိတ်မည့် ဝမ်းဗိုက်နေရာပတ်လည်၊ ရင်ခေါင်းနှင့် ခြေထောက်ပေါ်ပါ ပိုးသတ်ထားသော အဝတ်များဖြင့် ဖုံးအုပ်ထားခြင်းနှင့် လူနာ၏ ဦးခေါင်းနှင့် ခြေထောက်အကြားတွင် ပိုးသတ်ထားသောအဝတ်ဖြင့် ကာရံထားခြင်းများ ပြုလုပ်ပေးမည်။
- ထို့နောက် ဆရာဝန်မှ ဝမ်းဗိုက်တွင် bikini ပုံဟုသိထားကြသော ကန့်လန့် ခွဲကြောင်းရာပေးမည်။ တစ်ခါတစ်ရံ လိုအပ်ချက်အရ ဗိုက်ကို ဒေါင်လိုက် ဖွင့်သည့်အခါလည်း ရှိသည်။
- ပြီးလျှင် သားအိမ်နံရံကို (၃ – ၄) လက်မခန့် ကန့်လန့် (တစ်ခါတစ်ရံ လိုအပ်ပါက ဒေါင်လိုက်) ခွဲဖွင့်ပြီး ကလေးကိုမွေးထုတ်မည်။ ချက်ကြိုးဖြတ်ပြီးပါက အချင်းကို ခွာထုတ်၍ သားအိမ်ခွဲကြောင်းကို ပြန်ချုပ်ပြီးပိတ်ရသည်။
- အရေးပေါ် ခွဲစိတ်မွေးဖွားမှုတွင်လည်း ခွဲစိတ်ပုံအဆင့်ဆင့် တူညီသော်လည်း လျင်မြန်မှုရှိရမည်။ ကလေးကို ထုတ်ချိန်မကြာရပါ။
- မိခင်သည် နိုးနေပါက ကလေးမွေးပြီးမကြာမီ မိခင်အား ကလေးကိုပြ၍ ကိုင်တွယ်ခွင့်ပေးလိမ့်မည်။
- ခွဲစိတ်မွေးဖွားပြီးနောက် မိမိကလေးကို နို့တိုက်ကျွေးခြင်း၊ ပြုစုခြင်းတို့ ပြုလုပ်နိုင်ပြီး ခွဲစိတ်ထားခြင်းကြောင့် အနှောင့်အယှက် မဖြစ်စေနိုင်ပါ။
နောက်ဆက်တွဲဆိုးကျိုးများ
- ပိုးဝင်ခြင်း – ကလေးကို ခွဲစိတ်မွေးဖွားပြီးနောက် သားအိမ်အတွင်းနံရံရောင်ခြင်း၊ ဆီးလမ်းကြောင်း ပိုးဝင်ခြင်းနှင့် ဝမ်းဗိုက်ရှိ ခွဲကြောင်းအနာပိုးဝင်ခြင်းတို့ ဖြစ်တတ်သည်။
- သွေးဆင်းများခြင်း – ခွဲစိတ်မွေးဖွားခြင်းသည် ခွဲစိတ်မွေးနေစဉ်နှင့် မွေးဖွားပြီးနောက် သွေးဆင်းများတတ်သည်။
- မေ့ဆေး၊ ထုံဆေးတို့နှင့်ပတ်သက်သော အန္တရာယ်များရှိနိုင်သည်။
- သွေးပြန်ကြောတွင်းသွေးခဲခြင်း – ခွဲစိတ်မွေးဖွားခြင်းသည် ခြေထောက် (သို့မဟုတ်) တင်ပါးဆုံရိုးခွင်အတွင်းရှိ သွေးပြန်ကြောများတွင်း သွေးခဲများဖြစ်ပေါ်စေနိုင်သည်။ အကယ်၍ အဆိုပါသွေးခဲသည် ဖြစ်ပေါ်သည့် နေရာမှ ပြုတ်ထွက်ပြီး အဆုတ်ထဲရှိသွေးကြောတွင် ပိတ်မိပါက အသက်အန္တရာယ် စိုးရိမ်ရနိုင်သည်။
- ရှားပါးသော်လည်း ခွဲစိတ်မွေးဖွားနေစဉ်အတွင်း သားအိမ်အနီးတဝိုက်ရှိ ဆီးအိမ်နှင့် အူများ မတော်တဆ ထိခိုက်မိနိုင်သည်။
- နာကျင်ခြင်း – ကလေးခွဲစိတ်မွေးဖွားခြင်းသည် သဘာဝအတိုင်းမွေးခြင်းထက် မွေးဖွားပြီးနောက်နာကျင်မှုကို ပိုခံစားရသည်။
- ခွဲစိတ်မွေးဖွားရသောကလေးများတွင် ရက်အနည်းငယ်ထိ အသက်ရှူနှုန်း မြန်နိုင်သော ပြဿနာရှိနိုင်သည်။
- ခွဲစိတ်မွေးဖွားရာတွင် မရည်ရွယ်ဘဲ ကလေး၏ အရေပြားကို ရှားရှားပါးပါး ဓားရှနိုင်သည်။
လိုက်နာဆောင်ရွက်ရမည့် အချက်များ
ကလေးခွဲစိတ်မွေးဖွားခြင်း၏ နောက်ယူမည့်ကိုယ်ဝန်ပေါ် အကျိုးသက်ရောက်မှုများ
နောက်တစ်ကြိမ် ကိုယ်ဝန်ဆောင်ခဲ့လျှင်
- ကလေးကို ခွဲမွေးရနိုင်ခြေများသည်။ သဘာဝအတိုင်းမွေးဖွားရန် ရွေးချယ်နိုင်သော်လည်း မွေးဖွားရန် ဗိုက်နာချိန်တွင် (မွေးလူနာ ၁၀၀တွင် ၁ယောက်ခန့်) ဖြစ်ခဲသော်လည်း သားအိမ်ကွဲနိုင်သည်။
- အချင်းကပ်ခြင်း၊ အချင်းသည် သားအိမ်နံရံကို ဖောက်တွယ်နိုင်ခြင်းစသော ပြဿနာများဖြစ်နိုင်ပြီး သွေးထွက်များခြင်း၊ သွေးသွင်းရခြင်းနှင့် သားအိမ်ထုတ်ရခြင်း အန္တရာယ်များလည်း ရှိနိုင်သည်။
- သို့ဖြစ်၍ မိခင်ရော ကလေးပါ ကျန်းမာစေရန် အန္တရာယ်ကင်းစေရန် ကလေးခွဲစိတ်မွေးဖွားဖူးသော ကိုယ်ဝန်ဆောင်မိခင်များသည် ကိုယ်ဝန်ရှိသည်ဟု သိသည်နှင့်တစ်ပြိုင်နက် သားဖွားနှင့်မီးယပ် အထူးကုဆရာဝန်နှင့် ရက်ချိန်းယူ၍ ဆွေးနွေးအကြံဉာဏ်ရယူပြီး ကိုယ်ဝန်စောင့်ရှောက်မှုခံယူရန်အရေးကြီးသည်။
Share
Terms of use:
ဤအချက်အလက်များသည် ကျန်းမာရေးပညာပေးရည်ရွယ်ချက်ဖြင့်သာ ဖော်ပြထားခြင်းဖြစ်သောကြောင့် ဆရာဝန်နှင့် ကျန်းမာရေးဝန်ထမ်းများ၏ ရောဂါရှာဖွေခြင်း၊ ကုထုံး၊ နှစ်သိမ့်ပညာပေးဆွေးနွေးခြင်းများအား အစားထိုးရန် မသင့်ပါ။
သင်၏ကျန်းမာရေးပြဿနာများနှင့် ပတ်သက်၍ လိုအပ်ပါက သင့်မိသားစုဆရာဝန် သို့မဟုတ် တတ်ကျွမ်းသော ကျန်းမာရေးဝန်ထမ်းများ၏ အကြံဉာဏ်ကိုသာ ရယူသင့်ပါသည်။
Copyrights : All content appearing on “ကျန်းမာသုတ”which is owned and operated by CLL Health, is protected by copyright and may not be reused or reproduced without explicit permission.