Sacrococcygeal Teratoma – SCT (မွေးရာပါမြီးညှောင့်ရိုးအကျိတ်)

မွေးရာပါ မြီးညှောင့်ရိုးအကျိတ် (Sacrococcygeal teratoma – SCT) ဆိုသည်မှာ မွေးရာပါအကျိတ်တစ်ခုဖြစ်ပြီး ကျောရိုး၏အောက်ခြေ၊ တင်ပါးအပေါ်နားတွင် ဖြစ်ပေါ်လေ့ရှိသည်။ ထိုအကျိတ်သည် ရှားသော်လည်း မွေးကင်းစကလေးငယ်များတွင် အတွေ့ရအများဆုံး အကျိတ်အမျိုးအစားဖြစ်ပြီး၊ အရှင်မွေးကလေးအယောက် ၃၅,၀၀၀ တွင် ၁ ယောက်နှုန်း တွေ့ရတတ်သည်။ ယောက်ျားလေးများထက် မိန်းကလေးများတွင် ပို၍အဖြစ်များသည်။

SCT အကျိတ်သည် သန္ဓေသားဘဝမှပင်စတင်၍ ကြီးထွားလာနိုင်ပြီး တစ်ခါတစ်ရံတွင် ကလေး၏ ကိုယ်ထည်အရွယ်အစားနီးပါးအထိ ကြီးထွားနိုင်သည်။ ထိုအကျိတ်တွင် အရည်ကြည်အိတ်များ (cysts) သို့မဟုတ် အလုံးအကျိတ်များ သို့မဟုတ် ထိုနှစ်မျိုးစလုံး ပါဝင်နိုင်ပြီး ၎င်းတွင် ကိုယ်ပိုင်သွေးကြောစနစ်လည်း ပါဝင်တတ်သည်။ အကျိတ်ကို အများအားဖြင့် အရေပြားဖြင့် ဖုံးအုပ်ထားသော်လည်း တစ်ခါတစ်ရံတွင် ပါးလွှာပြီး ဖောက်ထွင်းမြင်ရသော အမြှေးပါးဖြင့်သာ ဖုံးအုပ်ထားသည်လည်းရှိသည်။ ထိုအကျိတ်အများစုသည် ကင်ဆာမဟုတ်သော အကျိတ်များဖြစ်သော်လည်း အကျိတ်၏ ကြီးထွားမှုပေါ်မူတည်၍ အချိန်မီကုသမှုမပြုလုပ်ပါက အသက်အန္တရာယ်ထိခိုက်သည်အထိ ဖြစ်ပေါ်နိုင်သည်။ အချို့တွင် မွေးရာပါချို့ယွင်းချက်များနှင့်လည်း တွဲ၍ဖြစ်ပေါ်နိုင်သည်။

အကျိတ်၏ တည်နေရာပေါ် မူတည်၍ အောက်ပါအတိုင်း အမျိုးအစား (၄) မျိုး ခွဲခြားနိုင်သည်။

• အမျိုးအစား ၁ – အကျိတ်တစ်ခုလုံးနီးပါးသည် ခန္ဓာကိုယ်၏အပြင်ဘက်၌သာ ရှိနေပြီး မြီးညှောင့်ရိုးနှင့် တွယ်ဆက်နေသည်
• အမျိုးအစား ၂ – အကျိတ်၏ အစိတ်အပိုင်းအများစုသည် ခန္ဓာကိုယ်၏အပြင်ဘက်၌ ရှိနေပြီး အစိတ်အပိုင်းအနည်းငယ်သည် တင်ပါးဆုံရိုးကွင်း သို့မဟုတ် ဝမ်းဗိုက်အတွင်းတွင် ရှိနေသည်
• အမျိုးအစား ၃ – အကျိတ်၏အစိတ်အပိုင်းအများစုသည် တင်ပါးဆုံရိုးကွင်း သို့မဟုတ် ဝမ်းဗိုက်အတွင်းတွင်ရှိနေပြီး အစိတ်အပိုင်းအနည်းငယ်သည်သာ ခန္ဓာကိုယ်၏အပြင်ဘက်တွင် ရှိနေသည်
• အမျိုးအစား ၄ – အကျိတ်တစ်ခုလုံးသည် တင်ပါးဆုံရိုးကွင်း သို့မဟုတ် ဝမ်းဗိုက်အတွင်းတွင်သာ ရှိနေသည်။

ဖြစ်ပေါ်ရသော အကြောင်းရင်းများ

SCT အကျိတ်သည် မျိုးပွါးဆဲလ်များမှ ကြီးထွားလာသော အကျိတ်ဖြစ်ပြီး၊ ဖြစ်စေသည့် အကြောင်းရင်းအတိအကျကို မသိရှိနိုင်ပါ။ မျိုးပွါးဆဲလ် (Germ cells) များသည် ပုံမှန်အားဖြင့် သန္ဓေသားအဖြစ် ဖွံ့ဖြိုးလာမည့် ဆဲလ်များဖြစ်ပြီး နောက်ပိုင်းတွင် အမျိုးသားနှင့် အမျိုးသမီးတို့၏ မျိုးပွါးအင်္ဂါစနစ်ကို ဖွဲ့စည်းတည်ဆောက်ပေးသည့် ဆဲလ်များဖြစ်သည်။

ရောဂါလက္ခဏာများ

သန္ဓေသားတွင်တွေ့နိုင်သော လက္ခဏာများ

Sacrococcygeal teratoma (SCT) အကျိတ်များသည် အရွယ်အစားနှင့် ပြင်းထန်မှုအဆင့် အမျိုးမျိုးရှိသည်။ အကျိတ်ကြောင့် ဆီးလမ်းကြောင်းပိတ်ဆို့ခြင်း သို့မဟုတ် အကျိတ်မှ သွေးထွက်ခြင်းတို့ကို ဖြစ်စေနိုင်သည်။ ထို့အပြင် ၄င်းအကျိတ်များသည် ကိုယ်ပိုင်သွေးကြောစနစ်မှတစ်ဆင့် သွေးအထောက်အပံ့ရသောကြောင့် အကျိတ်ကို လျင်မြန်စွာ ကြီးထွားစေပြီး သန္ဓေသား၏ နှလုံးအလုပ်လုပ်ဆောင်မှုကို ပိုများစေသည်။ ထို့ပြင် ရေမြွှာရည်များခြင်းကိုလည်း ဖြစ်စေပြီး ခန္ဓာကိုယ်၏ အစိတ်အပိုင်းအသီးသီးတွင် အရည်များကို စုလာစေသည်။ ထိုအခြေအနေကို သန္ဓေသား၏ ခန္ဓာကိုယ်ဖောရောင်ခြင်း (Hydrops fetalis) ဟုခေါ်ပြီး ထိုသို့ဖြစ်လာပါက သန္ဓေသားတွင် နှလုံးလုပ်ငန်းပျက်စီးမှုဖြစ်လာပြီး မိခင်နှင့်ကလေးနှစ်ဦးလုံး၏ အသက်အန္တရာယ်ကို ထိခိုက်စေနိုင်သည်။ ကိုယ်ဝန်သက်အပတ် (၃၀) အောက်ကလေးများတွင် Hydrops ဖြစ်ပွါးပါက အသက်ရှင်နိုင်စွမ်း နည်းပါးသည်။

မိခင်တွင်တွေ့နိုင်သော လက္ခဏာများ

သန္ဓေသားတွင် အရည်စုပုံခြင်း (Hydrops Fetalis) အလွန်ပြင်းထန်ပါက မိခင်တွင်ပါ Maternal Mirror Syndrome ဟုခေါ်သော “မိခင်နှင့်သန္ဓေသား ရောဂါလက္ခဏာ တူညီသည့် အခြေအနေ” ဖြစ်ပေါ်လာနိုင်သည်။ ဤရောဂါစုသည် မိခင်တွင် ကိုယ်ဝန်ဆိပ်တက်ခြင်း (Preeclampsia) နှင့် ဆင်တူသည့် လက္ခဏာများကို ပြသလေ့ရှိပြီး အဓိကအားဖြင့်

• သွေးတိုးခြင်းနှင့် ဆီးတွင် အသားဓာတ် (Protein) ပါဝင်ခြင်း
• ခန္ဓာကိုယ်အတွင်း အရည်များ စုပုံလာပြီး ခြေလက်များ သိသိသာသာ ဖောရောင်လာခြင်း၊
• ကိုယ်အလေးချိန် ရုတ်တရက် တိုးလာခြင်းနှင့် ပျို့အန်ခြင်းတို့ဖြစ်နိုင်သည်။

အကယ်၍ ဤလက္ခဏာစု ဖြစ်ပေါ်လာပါက လမစေ့ဘဲ မွေးဖွားခြင်း (Preterm labor) ဖြစ်နိုင်ခြေ ပိုမိုများပြားလာနိုင်သည့်အတွက် အထူးဂရုပြု စောင့်ကြည့်ရန် လိုအပ်သည်။

ဆေးရုံ၊ ဆေးခန်းပြသရန်

အများအားဖြင့် ကိုယ်ဝန်ဆောင်ကာလအတွင်း ပြုလုပ်သော သန္ဓေသားစစ်ဆေးမှုများတွင် ထိုအကျိတ်အား ကြိုတင်သိရှိရပါက ကိုယ်ဝန်ဆောင်ကာလတစ်လျှောက်နှင့် ကလေးမမွေးဖွားမီတွင် ကြိုတင်ပြင်ဆင်မှုများ ပြုလုပ်ရန် လိုအပ်သည်။ မွေးကင်းစကလေး အထူးကုဆရာဝန်များ၊ ကလေးခွဲစိတ်အထူးကုဆရာဝန်များ၊ သားဖွားမီးယပ် အထူးကုဆရာဝန်များစသည်တို့ ပူးပေါင်း၍ မွေးဖွားမည့်အချိန်၊ မွေးဖွားရန်နည်းလမ်း၊ မွေးဖွားပြီးချိန်တွင် ပြုစုစောင့်ရှောက်ခြင်းများ၊ ခွဲစိတ်ကုသခြင်းများအတွက် ကြိုတင်ပြုဆင်မှုများ ပြုလုပ်ထားရမည်။ ကြိုတင်မသိရှိထားဘဲ မွေးဖွားချိန်မှ တွေ့ရှိပါကလည်း ထိုကလေးများသည် ခွဲစိတ်ကုသမှု လိုအပ်သဖြင့် မွေးဖွားပြီးပါက ဆေးရုံသို့ အချိန်မီ ပြသကုသမှုခံယူရန် လိုအပ်သည်။

ရောဂါရှာဖွေခြင်း

စောစီးစွာ ရောဂါရှာဖွေနိုင်ခြင်းသည် ကုသမှုအတွက် အရေးကြီးသည်။ SCT အကျိတ်ရှိနေပါက ကိုယ်ဝန်‌ဆောင်ကာလ သွေးစစ်ဆေးမှုများတွင် မိခင်၌ Alpha fetoprotein (AFP) ပုံမှန်ထက်များနေခြင်း သို့မဟုတ် ကိုယ်ဝန်ဆောင်အာထရာဆောင်း စစ်ဆေးမှုများတွင် သားအိမ်အရွယ်အစား ပုံမှန်ထက်ကြီးနေခြင်းတို့ကို တွေ့ရှိနိုင်သည်။ အကျိတ်ရှိသည်ဟုယူဆပါက အောက်ပါစစ်ဆေးမှုများကို ထပ်မံပြုလုပ်ရန် လိုအပ်သည်။

• ခန္ဓာဗေဒစစ်ဆေးသည့် အာထရာဆောင်း (Anatomy ultrasound) – အကျိတ်အနေအထားကို စစ်ဆေးရန်နှင့် အတည်ပြုရန်သုံးသည်
• သွေးကြောအာထရာဆောင်း (Doppler ultrasound) – အကျိတ်သို့ သွေးစီးဆင်းခြင်းကို သို့မဟုတ် ခန္ဓာကိုယ်၏အခြားအစိတ်အပိုင်းများသို့ သွေးစီးဆင်းခြင်းကို တိုင်းတာရန် အသုံးပြုသည်
• ကွန်ပျူတာဓာတ်မှန် (CT scan) သို့မဟုတ် သံလိုက်ဓာတ်မှန် (MRI) – အကျိတ်နှင့် သန္ဓေသား၏ ခန္ဓာဗေဒဖွဲ့စည်းပုံကို အသေးစိတ်ကြည့်ရှူရန် အသုံးပြုသည်
• အသံလှိုင်းသုံး နှလုံးပုံရိပ်ဖော်စက်ဖြင့် စစ်ဆေးခြင်း – သန္ဓေသား၏နှလုံးလုပ်ဆောင်ချက်ကို တိုင်းတာစစ်ဆေးနိုင်သည်
• မျိုးဗီဇစစ်ဆေးခြင်း၊ မိခင်ဝမ်းဗိုက်မှတစ်ဆင့် ရေမြွှာရည်ကို အပ်နှင့် စုပ်ယူပြီး မျိုးဗီဇချို့ယွင်းချက် ရှိမရှိ စစ်ဆေးခြင်း (Amniocentesis) ကို ပြုလုပ်နိုင်သည်။

အချို့အခြေအနေများတွင် မမွေးဖွားမီအထိ ရောဂါမတွေ့ရှိခြင်းမျိုးလည်း ရှိနိုင်သည်။ မွေးဖွားပြီး မွေးကင်းစကလေးအား စစ်ဆေးရာတွင်

• ခန္ဓာကိုယ်ပြင်ပ၌ ထွက်နေသော အကျိတ်ကို တိုက်ရိုက်တွေ့ရှိခြင်း
• ခန္ဓာကိုယ်အတွင်း၌ အကျိတ်ရှိနေပါက ဆီးမသွားနိုင်ခြင်း သို့မဟုတ် ဝမ်းမသွားနိုင်ခြင်း
• ရောဂါလက္ခဏာတစ်ခုခု (ဥပမာ _ နာကျင်မှု) ခံစားနေရပါက ဝမ်းဗိုက်အာထရာဆောင်းရိုက်၍ စစ်ဆေးခြင်းဖြင့် အကျိတ်ကို တွေ့ရှိခြင်း စသည်ဖြင့် ရောဂါကို ရှာဖွေအတည်ပြုနိုင်သည်

ကုသခြင်း

ကိုယ်ဝန်ဆောင်ကာလတွင်တွေ့ရှိပါက ကိုယ်ဝန်ဆောင်ကာလတစ်လျှောက်လုံးတွင် အာထရာဆောင်းရိုက်ခြင်း၊ အသံလှိုင်းသုံးနှလုံးပုံရိပ်ဖော်စက်ဖြင့် စစ်ဆေးခြင်းတို့ကို ပြုလုပ်၍ မိခင်နှင့် ကလေး၏အခြေအနေများကို စောင့်ကြည့်စစ်ဆေးနေရမည်။ အဓိကကုသမှုသည် အကျိတ်ကို ခွဲစိတ်ဖယ်ရှားခြင်းပင်ဖြစ်သည်။ ခွဲစိတ်မှုပြုလုပ်သည့်အချိန်သည် ကလေးတွင် ရောဂါရှာဖွေတွေ့ရှိသည့်အချိန်နှင့် အကျိတ်၏ ပြင်းထန်မှုအခြေအနေပေါ်တွင် မူတည်သည်။ ယေဘုယျအားဖြင့် အကျိတ်သည် သေးငယ်ပါက ကလေးမွေးပြီးသည့်နောက်တွင်မှ ခွဲစိတ်မှု ပြုလုပ်လေ့ရှိသည်။ သို့သော် အချို့ပြင်းထန်သည့်အခြေအနေများတွင် သန္ဓေသားဘဝတည်းကပင် ဆေးဝါးများဖြင့် ကုသခြင်း၊ ခွဲစိတ်ခြင်းများ ပြုလုပ်လေ့ရှိသည်။

သန္ဓေသားဘဝတွင်ကုသခြင်း

Hydrops fetalis ကဲ့သို့ အသက်အန္တရာယ်ရှိနိုင်သည့် အခြေအနေမျိုးဖြစ်ပါက သန္ဓေသားဘဝတွင်ပင် ခွဲစိတ်ခြင်းပြုလုပ်သည်။ ပြုလုပ်နိုင်သည့်နည်းလမ်းများမှာ_

• မိခင်အား ဗိုက်ဖွင့်၍ သန္ဓေသားခွဲစိတ်ခြင်း (Open-Fetal Surgery)
  မိခင်၏ ဝမ်းဗိုက်နှင့် သားအိမ်ကို ခွဲကြောင်းပေး၍ ခွဲစိတ်ပြီးနောက် သန္ဓေသား အကျိတ်ကို ဖယ်ရှားသည်။ ထို့နောက် ကလေး၏ ခွဲစိတ်ဒဏ်ရာနှင့် သားအိမ်ကို ပြန်လည်ချုပ်ပေးကာ မိခင်၏ဝမ်းဗိုက်ကိုလည်း မူလအတိုင်း ပြန်လည်ချုပ်၍ ပိတ်ပေးမည်ဖြစ်သည်။ ယေဘုယျအားဖြင့် မိခင်သည် ခွဲစိတ်မှုအပြီး ရက်အနည်းငယ်အတွင်း ပြန်လည်ကျန်းမာလာနိုင်ပြီး ကိုယ်ဝန်ကိုမူ ဆက်လက်၍ အနီးကပ်စောင့်ကြည့်ရမည်ဖြစ်သည်။
• လေဆာဖြင့် သွေးကြောဖြတ်တောက်ခြင်း (Laser Ablation)
  ဤနည်းလမ်းတွင် အထူးပြုလုပ်ထားသော အပ်ကို မိခင်၏ ဝမ်းဗိုက်၊ သားအိမ်နှင့် သန္ဓေသားအတွင်းသို့ ထိုးသွင်းသည်။ ထိုအပ်မှတစ်ဆင့် လေဆာရောင်ခြည်မျှင် (Laser fibre) များကို အကျိတ်အတွင်းသို့ တိုက်ရိုက်ထည့်သွင်း၍ အကျိတ်ကိုထောက်ပံ့ပေးနေသော သွေးကြောများကို ပိတ်ဆို့သည်။ ထိုသို့ပြုလုပ်ခြင်းကြောင့် အကျိတ်သည် ဆက်လက်မကြီးထွားနိုင်တော့ဘဲ သန္ဓေသား၏နှလုံးအပေါ် ဝန်ပိနေမှုကို သက်သာစေသည်။ မွေးဖွားပြီးနောက်ပိုင်းတွင်မှ အကျိတ်ကို ခွဲစိတ်ဖယ်ရှားခြင်း ပြုလုပ်နိုင်သည်။
• EXIT (Ex Utero Intrapartum Treatment) နည်းလမ်းဖြင့် ကုသခြင်း
  အကျိတ်ကို ခွဲစိတ်ရန် အထူးစီစဥ်ထားသည့် ခွဲစိတ်မှုတစ်ခုဖြစ်သည်။ သန္ဓေသားကို ခွဲစိတ်မွေးဖွားသည့်အချိန် (Cesarean delivery) တွင် ကလေး၏ဦးခေါင်းကို မွေးဖွားပြီးသော်လည်း အချင်းကိုမဖြတ်သေးဘဲ ခေတ္တထားရှိပြီး ထိုအချိန်တွင် အကျိတ်ကို ခွဲစိတ်ဖယ်ရှားမည်ဖြစ်သည်။ ထိုသို့ပြုလုပ်ခြင်းဖြင့် အကျိတ်ကိုခွဲစိတ်ဖယ်ရှားနေစဥ်တွင် ကလေးသည် ချက်ကြိုးမှတစ်ဆင့် အောက်ဆီဂျင်ကို ဆက်လက်ရရှိနေစေခြင်းဖြစ်သည်။ ခွဲစိတ်ပြီးနောက်တွင် ကလေးမွေးဖွားမှုကို အဆုံးသတ်ပြုလုပ်ပြီးနောက် ကလေးကို မွေးကင်းစကလေးအထူးကြပ်မတ်ကုသဆောင်သို့ ပို့ဆောင်၍ ဆက်လက်စောင့်ကြပ်ကုသမည်။

မွေးဖွားရန်နည်းလမ်းရွေးချယ်ပုံ

SCT အကျိတ်သည် သေးငယ်ပါက ပုံမှန်အတိုင်း မွေးလမ်းကြောင်းမှတစ်ဆင့် မွေးဖွားနိုင်သည်။ သို့သော် အကျိတ်သည် ကြီးမားပါက အကျိတ်ပေါက်ထွက်ခြင်း သို့မဟုတ် သွေးထွက်ခြင်းမှကာကွယ်ရန် ခွဲစိတ်၍ မွေးဖွားသင့်သည်။ မိခင်နှင့် ကလေးအတွက် နောက်ဆက်တွဲပြဿနာများကို လျှော့ချနိုင်ရန်အတွက် SCT အကျိတ်ရှိသော ကလေးငယ်များအား မွေးကင်းစကလေး ဆေးကုသမှုများနှင့် ဆေးဝါးကိရိယာများ ပြည့်စုံသည့် ဆေးရုံများ၌သာ မီးဖွားရန် စီစဥ်သင့်သည်။

မွေးဖွားပြီးနောက် ခွဲစိတ်ကုသခြင်း

SCT အကျိတ်ဖြင့် မွေးဖွားလာသောကလေးငယ်များသည် အကျိတ်ကိုဖယ်ရှားရန်အတွက် ခွဲစိတ်မှုပြုလုပ်ရန် လိုအပ်သည်။ ပုံမှန်အားဖြင့် မွေးပြီးရက်အနည်းငယ်အကြာတွင် ခွဲစိတ်မှု ပြုလုပ်လေ့ရှိသည်။ မွေးဖွားပြီးနောက် မခွဲစိတ်မီတွင် ကလေးကို မွေးကင်းစက‌လေး အထူးကြပ်မတ်ကုသဆောင်တွင် စောင့်ကြည့်စစ်ဆေးရမည်။ ထိုခွဲစိတ်ကုသမှုတွင် အကျိတ်ကိုဖယ်ရှားပြီးနောက် အကျိတ်ပြန်ဖြစ်ခြင်းမှ ကာကွယ်ရန် မြီးညှောင့်ရိုးကိုပါ တပါတည်းဖယ်ရှားလေ့ရှိသည်။ အလွန်ကြီးမားသောအကျိတ်များတွင်မူ တင်ပါးရှိ အရိုးများနှင့် တစ်ရှူးများကို ပြန်လည်ပြုပြင်ခြင်းကိုပါ ပူးတွဲ၍ ပြုလုပ်ရနိုင်သည်။ ခွဲစိတ်မှုပြုလုပ်ပြီးနောက် ကလေးကို မွေးကင်းစကလေး အထူးကြပ်မတ်ကုသဆောင် (NICU) တွင် ပြန်လည်ထားရှိ၍ ကလေး၏ အဆုတ်လုပ်ဆောင်ချက်များ ပုံမှန်ဖြစ်လာပြီး ကျန်းမာရေးအခြေအနေ ကောင်းမွန်လာသည်အထိ ဆက်လက်စောင့်ကြည့် ကုသပေးရမည်။

ခွဲစိတ်ပြီးနောက်ဖြစ်နိုင်သော ရေရှည်ကျန်းမာရေးအခြေအနေများ

SCT အကျိတ်ကို ဖယ်ရှားပြီးနောက် ကလေးအများစုသည် ပုံမှန်အတိုင်း ကြီးထွားဖွံ့ဖြိုးနိုင်ပြီး ရေရှည်ကျန်းမာရေး ပြဿနာများ မရှိတတ်ကြပါ။ သို့သော် အချို့သော ကလေးငယ်များတွင် ဆီးသွားရခက်ခဲခြင်း၊ ဝမ်းချုပ်ခြင်းကဲ့သို့သော ရေရှည်နောက်ဆက်တွဲ ပြဿနာများ ဖြစ်ပွါးနိုင်ခြေ အနည်းငယ်ရှိသည်။ ထိုပြဿနာများကို အများအားဖြင့် ဆေးဝါးများနှင့် ကုသမှုပေးနိုင်သည်။ ဖြစ်နိုင်ခြေနည်းသော်လည်း အချို့ကလေးများတွင် အကျိတ်ပြန်ဖြစ်နိုင်ပြီး ထိုသို့ဖြစ်ပါက ပြန်လည်ခွဲစိတ်ကုသမှုခံယူရန် လိုအပ်သည်။ အကျိတ်ပြန်ဖြစ်ခြင်း ရှိမရှိနှင့် အခြားနောက်ဆက်တွဲပြဿနာများကို စောစီးစွာ သိရှိနိုင်ရန်အတွက် ဆရာဝန်နှင့် ပြသ၍ ပုံမှန်စစ်ဆေးမှုများကို နှစ်အနည်းငယ်ကြာသည်အထိ ဆက်လက်ပြုလုပ်ရန် လိုအပ်သည်။

ကာကွယ်ခြင်း

မွေးရာပါရောဂါဖြစ်သည့်အတွက် အတိအကျ ကာကွယ်ရန် နည်းလမ်းမရှိပါ။ အရေးကြီးဆုံးမှာ အထက်ပါရောဂါလက္ခဏာများကို စောစီးစွာသိရှိ၍ ညွှန်ကြားချက်များအတိုင်း ကုသမှုခံယူခြင်းအားဖြင့် နောက်ဆက်တွဲပြဿနာများကို လျော့နည်းစေနိုင်သည်။

References:

• Children’s Hospital of Philadelphia. (n.d.). Sacrococcygeal teratoma (SCT). Retrieved January 4, 2026, from https://www.chop.edu/conditions-diseases/sacrococcygeal-teratoma-sct
• Great Ormond Street Hospital for Children NHS Foundation Trust. (n.d.). Sacrococcygeal teratoma removal in children. Retrieved January 4, 2026, from https://www.gosh.nhs.uk/conditions-and-treatments/conditions-we-treat/sacrococcygeal-teratoma-removal-children/
• Hopkins Medicine. (n.d.). Sacrococcygeal teratoma. Retrieved January 4, 2026, from https://www.hopkinsmedicine.org/health/conditions-and-diseases/sacrococcygeal-teratoma
• Nationwide Children’s Hospital. (n.d.). Sacrococcygeal teratoma (SCT). Retrieved January 4, 2026, from https://www.nationwidechildrens.org/conditions/sacrococcygeal-teratoma-sct
• Boston Children’s Hospital. (n.d.). Sacrococcygeal teratoma (SCT). Retrieved January 4, 2026, from https://www.childrenshospital.org/conditions-treatments/sacrococcygeal-teratoma

Published: 26 January 2026