Intermittent fasting (အချိန်ပိုင်းအစာရှောင်ခြင်း)

အချိန်ပိုင်းအစာရှောင်ခြင်း (Intermittent fasting) ဆိုသည်မှာ အစာစားချိန်နှင့် အစာလုံးဝမစားချိန် (သို့မဟုတ်) ပမာဏအနည်းငယ်သာစားချိန်တို့ကို နာရီအပိုင်းအခြား သတ်မှတ်၍ လိုက်နာစားသောက်ခြင်းဖြစ်သည်။ ခန္ဓာကိုယ်ဇီဝနာရီနှင့် ကိုက်ညီရန် ပုံမှန်အစာစားချိန်နှင့် အစာရှောင်ချိန်တို့ကို စနစ်တကျချိန်ညှိ၍ အလှည့်ကျ ကျင့်သုံးခြင်းဖြစ်သည်။ သတ်မှတ်ချိန်အတွင်း အစာကို ပုံမှန်စားသုံးပြီး ကျန်အချိန်များတွင် လုံးဝနီးပါး အစားရှောင်ရခြင်းဖြစ်သည်။

အချိန်ပိုင်းအစာရှောင်ခြင်းတွင် အစာစားသုံးရမည့်အချိန်ကာလကို အဓိကသတ်မှတ်ကျင့်သုံးရပြီး အစားအစာအမျိုးအစားကို အလွန်အမင်းကန့်သတ်ခြင်းမရှိဘဲ ပုံမှန်စားသောက်နိုင်သည်။ ဤအချက်သည် အချိန်ပိုင်းအစားရှောင်ခြင်းကို ကိုယ်အလေးချိန်ထိန်းသိမ်းလိုသူများ ပို၍ရွေးချယ်စေသည့် အချက်တစ်ခုဖြစ်သည်။ ဤသို့အချိန်ပိုင်းအစာရှောင်ခြင်းသည် ကိုယ်အလေးချိန်လျှော့ချခြင်းအတွက်သာမက ဦးနှောက်နှင့် နှလုံးကျန်းမာရေးအတွက်ပါ အထောက်အကူဖြစ်ကြောင်း လေ့လာတွေ့ရှိထားသည်။

အချိန်ပိုင်းအစာရှောင်ခြင်းဖြင့် ဇီဝဖြစ်စဥ်ပြောင်းလဲပုံ (Metabolic switching)

ခန္ဓာကိုယ်၏ အဓိကစွမ်းအင်အရင်းအမြစ်မှာ ဂလူးကို့စ် (သွေးတွင်းသကြားဓာတ်) ဖြစ်သည်။ ပုံမှန်စားသောက်နေချိန်တွင် ကာဘိုဟိုက်ဒရိတ်များမှ ဂလူးကို့စ်များကို စွမ်းအင်အဖြစ် အဆက်မပြတ်ရရှိအသုံးပြုနေပြီး ပိုလျှံသောစွမ်းအင်များကို အဆီဓာတ်များအဖြစ် သိုလှောင်သည်။ အစာရှောင်ချိန်တွင် မူလရှိရင်းစွဲ သကြားဓာတ်ကုန်ခမ်းသွားပြီး လိုအပ်သည့်စွမ်းအင်အတွက် ထိုအဆီများကို ချေဖျက်အသုံးပြုသည်။ အချိန်ပိုင်းအစာရှောင်ခြင်းသည် ဤဖြစ်စဥ်ကို အခြေခံထားခြင်းဖြစ်သည်။

လေ့ကျင့်ခန်းများလုပ်သော်လည်း အစာစားခြင်းကို မထိန်းချုပ်လျှင် ထိုအစာများမှရသည့် စွမ်းအင်ကိုသာ ခန္ဓာကိုယ်မှ အဓိကသုံးစွဲသဖြင့် အဆီဓာတ်လျော့ကျမှုနှုန်း နည်းသည်။ ကာလသတ်မှတ်၍ အစာရှောင်ခြင်း (လုံးဝမစားခြင်း သို့မဟုတ် ပမာဏအနည်းငယ်သာ စားခြင်း) သည် ခန္ဓာကိုယ်ရှိ အဆီဓာတ်များ ပိုမိုထိ‌ရောက်စွာ လောင်ကျွမ်းစေသည်။

အချိန်ပိုင်းအစာရှောင်ခြင်းသည် လက်ရှိကမ္ဘာပေါ်တွင် ကျော်ကြားသော ကျန်းမာရေးနှင့် ကိုယ်အလေးချိန် ထိန်းသိမ်း‌ရေးနည်းလမ်းများအနက် တစ်ခုဖြစ်သည်။ အချိန်ပိုင်းအစာရှောင်ခြင်းနည်းလမ်းကို လုပ်ဆောင်မည်ဆိုပါက မိမိအတွက် အသင့်တော်ဆုံး နည်းလမ်းကိုရွေးချယ်ပြီး ဘေးကင်းစွာလုပ်ဆောင်နိုင်ရန် အလွန်အရေးကြီးသည်။

အချိန်ပိုင်းအစာရှောင်ခြင်း၏ ခန္ဓာကိုယ်အပေါ်သက်ရောက်မှု

အစာရှောင်ခြင်းပြုလုပ်သည့်အခါ ကိုယ်ခန္ဓာထဲတွင် ဆဲလ်များ၊ ဟော်မုန်းများနှင့် သေးငယ်သော မော်လီကျူးများအဆင့်ထိ ပြောင်းလဲမှုများ ဖြစ်ပေါ်နိုင်သည်။ ပထမဦးစွာ ကြီးထွားဟော်မုန်း (growth hormone) များ မြင့်တက်လာ၍ အင်ဆူလင်ပမာဏ လျော့ကျလာသည်။ ခန္ဓာကိုယ်ရှိဆဲလ်များသည် မျိုးဗီဇထုတ်ဖော်ခြင်းများကို ပြောင်းလဲစေပြီး အ‌ရေးကြီးသော ပြုပြင်ခြင်းလုပ်ငန်းစဥ်များကို အစပြုခြင်းဖြင့် အောက်ဖော်ပြပါ ပြောင်းလဲမှုများဖြစ်ပေါ်လာသည်။

• ကြီးထွားဟော်မုန်းများ မြင့်တက်လာခြင်းကြောင့် ခန္ဓာကိုယ် အဆီများကျစေခြင်းနှင့် ကြွက်သားတည်ဆောက်မှုတို့တွင် အထောက်အကူပြုသည်
• အင်ဆူလင်ပမာဏ ကျဆင်းခြင်းကြောင့် သိုလှောင်ထားသော အဆီများကို အလွယ်တကူ လောင်ကျွမ်းစေနိုင်သည်
• ဆဲလ်ပြန်လည်ပြုပြင်မှု (Autophagy)
  • ဆဲလ်များသည် ခန္ဓာကိုယ်တွင်း အိုဟောင်းပြီး အသုံးမဝင်သော ပရိုတင်းများကို ချေဖျက်ဖယ်ရှားပေးခြင်းများ ပြုလုပ်နိုင်သည်
• မျိုးဗီဇလုပ်ဆောင်မှု
  • အသက်ရှည်ရာ အနာမဲ့ခြင်း (Longevity)၊ ရောဂါကာကွယ်ရေးတို့နှင့် သက်ဆိုင်သည့် မျိုးဗီဇများ၏ လုပ်ဆောင်မှုကို မြှင့်တင်ပေးသည်

အသုံးများသော အချိန်ပိုင်းအစာရှောင်ခြင်းနည်းလမ်းအမျိုးအစားများ

အချိန်ကန့်သတ်၍ စားသောက်ခြင်းနည်းလမ်း (Time restricted eating – ၁၆/၈ သို့မဟုတ် ၁၄/၁၀)
အချိန်ကန့်သတ်၍ စားသောက်ခြင်းနည်းလမ်းတွင် အသုံးအများဆုံးနှင့် လူကြိုက်အများဆုံး နည်းလမ်း (၂) ခုမှာ_

• ၁၆း၈ – အချိန် (၈) နာရီသာ [ဥပမာ – နံနက် (၁၀)နာရီ မှ ညနေ (၆)နာရီအထိ] အစာစား၍ (၁၆) နာရီ အစာရှောင်ခြင်း
• ၁၄း၁၀ – အချိန် (၁၀) နာရီသာ [ဥပမာ – နံနက် (၉)နာရီ မှ ည (၇)နာရီအထိ] အစာစား၍ (၁၄) နာရီ အစာရှောင်ခြင်း

လူအများသည် ပုံမှန်အားဖြင့် အိပ်နေစဥ်အတွင်း အစာရှောင်နေပြီးသားဖြစ်သည့်အတွက် ဤနည်းလမ်းသည် လူကြိုက်များသော နည်းလမ်းဖြစ်သည်။ သို့ဖြစ်၍ ဤအချိန်ကန့်သတ်သည့် နည်းလမ်းသည် အချိန်ပိုင်းအစာရှောင်ခြင်းကို စတင်စမ်းသပ် ပြုလုပ်မည့်သူများအတွက် စိတ်ချရသော နည်းလမ်းဖြစ်သည်။ နံနက်စာကို တတ်နိုင်သမျှ အချိန်နောက်ကျမှစားခြင်း (သို့မဟုတ်) နံနက်စာနှင့် နေ့လည်စာကို ပေါင်းစားခြင်း၊ ညစာကို စောစောစားခြင်းဖြင့် ညဘက်အစာရှောင်ချိန်ကို ပိုမိုရှည်စေနိုင်သည်။ အထူးသဖြင့် စားသုံးသော ကယ်လိုရီအများစုကို ညမမှောင်ခင် အချိန်တွင် စားသုံးရန် အရေးကြီးသည်။ အိပ်ရာမဝင်ခင် အနည်းဆုံး (၃) နာရီအလိုတွင် အစာရှောင်ရန် အကြံပြုထားသည်။ ညဘက်တွင်စားသော သွားရည်စာများသည် အာဟာရပါဝင်မှုနည်းပြီး ကယ်လိုရီများစွာပါသော အစားအစာများဖြစ်၍ သွေးတွင်းသကြားဓာတ်ကို တစ်ရှိန်ထိုးတက်စေသည့်အပြင် ကယ်လိုရီအပိုများ စုဆောင်းမိစေနိုင်သည်။ အများအားဖြင့် ညအချိန်အစာစားခြင်း အများစုသည် အလေ့အထတစ်ခုသာဖြစ်သည်။ အမှန်တကယ် ဗိုက်ဆာသည်ဆိုပါက ညစာစားသည့်အချိန်တွင် ပရိုတင်းနှင့် အမျှင်ဓာတ်များကို ပိုမိုစားသုံးနိုင်ကြောင်း အကြံပြုထားသည်။

တစ်ပတ်တွင် (၂) ရက် အစာရှောင်ခြင်း (The 5:2 Method)
ဤနည်းလမ်းသည် တစ်ပတ်တွင် (၅) ရက်ကို ပုံမှန်အတိုင်းစားသောက်နိုင်ပြီး ကျန်ရှိနေသော (၂) ရက်တွင် အစာရှောင်သည့်နည်းလမ်းဖြစ်သည်။ ထို (၂) ရက်တွင် ကယ်လိုရီနည်းသော အစားအသောက်များ (အမျှင်ဓာတ်နှင့် ပရိုတင်းများသော အစားအသောက်များ) ကို ဦးစားပေး၍စားရန် အရေးကြီးသည်။ အမျိုးသမီးများတွင် (၅၀၀) ကယ်လိုရီနှင့် အမျိုးသားများတွင် (၆၀၀) ကယ်လိုရီသာ စားသောက်ခြင်းဖြစ်သည်။ အစာရှောင်ခြင်းကို (၂) ရက်ဆက်တိုက်မလုပ်ဘဲ ပုံမှန်အစားစားရက် (၂) ရက် သို့မဟုတ် (၃) ရက်ခြား၍ တစ်ကြိမ်စီ ပြုလုပ်ခြင်းသည် အကောင်းဆုံးဖြစ်သည်။ ပုံမှန်အစာစားရက်များတွင်လည်း ကျန်းမာရေးနှင့်ညီညွတ်သော အစားအစာများကိုသာ စားသုံးရန် အရေးကြီးသည်။

တစ်ရက်ခြား အစာရှောင်ခြင်း (Alternate day fasting)
ပုံမှန်အစာစားခြင်းနှင့် အစာရှောင်ခြင်းကို တစ်ရက်ခြားစီ ပြုလုပ်ခြင်းဖြစ်သည်။ အစာရှောင်သည့်နေ့တွင် (၅၀၀) ကယ်လိုရီ သို့မဟုတ် ပုံမှန်စားသောက်သည့် ကယ်လိုရီ၏ (၂၅) ရာခိုင်နှုန်းခန့်သာ လျှော့ချ၍စားခြင်း သို့မဟုတ် အချို့သူများတွင် ကယ်လိုရီလုံးဝမရအောင် အစာလုံးဝမစားခြင်း ပြုလုပ်ကြသည်။ ဤနည်းလမ်းသည် အချိန်ပိုင်းအစာရှောင်သည့် နည်းလမ်းများတွင် အလွန်အမင်းပြင်းထန်သော ပုံစံဖြစ်သည့်အတွက် အစပြုသူများ သို့မဟုတ် အချို့သော ကျန်းမာရေးအခြေအနေများအတွက် မသင့်တော်နိုင်ပါ။ ထိုအစာရှောင်နည်းကို ရေရှည်တွင် ဆက်လက်ထိန်းသိမ်းနိုင်ရန် ခက်ခဲနိုင်သည်။

တစ်ပတ်လျှင် (၁) ရက် သို့မဟုတ် (၂) ရက်အပြည့် အစာရှောင်ခြင်း (A weekly 24-hour fast)
တစ်ပတ်လျှင် (၁) ရက် သို့မဟုတ် (၂) ရက်ကို အပြည့်အဝ အစာရှောင်ခြင်းဖြစ်သည်။ တစ်ခါအစာရှောင်လျှင် (၂၄) နာရီလုံး အစာလုံးဝမစားဘဲ အစာရှောင်ခြင်းဖြစ်သည်။ လူအများစုသည် ယနေ့မနက်စာစားချိန်မှ နောက်နေ့မနက်စာစားချိန်အထိ သို့မဟုတ် ယနေ့ နေ့လည်စာစားချိန်မှ နောက်နေ့ နေ့လည်စာစားချိန်အထိ အစာရှောင်လေ့ရှိကြသည်။ အစာရှောင်နေသည့်အချိန်တွင် ရေနှင့် ကယ်လိုရီမပါဝင်သော အရည်များကို သောက်နိုင်သည်။ အစာမရှောင်သည့်နေ့များတွင် ပုံမှန်အစားအစာများအတိုင်း စားသောက်နိုင်သည်။ ထိုကဲ့သို့ (၂၄) နာရီအစာရှောင်ခြင်းသည် ပြင်းထန်သောကြောင့် ပင်ပန်းနွမ်းနယ်ခြင်း၊ ခေါင်းကိုက်ခြင်း၊ စိတ်တိုလွယ်ခြင်း အစရှိသော လက္ခဏာများကို ခံစားရနိုင်သည်။ အချိန်ကြာလာသောအခါ ခန္ဓာကိုယ်မှ ထိုစားသောက်မှုပုံစံကို ချိန်ဆလာနိုင်ပြီး ဘေးထွက်ဆိုးကျိုးများ လျော့နည်းသွားတတ်သည်။ ထို့ကြောင့် အချိန်ပိုင်းအစာရှောင်ခြင်းကို စတင်ပြုလုပ်မည့်သူများအနေဖြင့် (၂၄) နာရီအစာရှောင်ခြင်း မပြုလုပ်မီ (၁၂) နာရီ သို့မဟုတ် (၁၆) နာရီ အစာရှောင်ခြင်းနည်းလမ်းဖြင့် စတင်လေ့ကျင့်သင့်သည်။

အချိန်ပိုင်းအစာရှောင်ခြင်းအတွက် အထောက်အကူဖြစ်စေမည့် အခြားသော အကြံပြုချက်များမှာ_

1. ရေဓာတ်ပြည့်ဝအောင်နေပါ
   ရေဓာတ်ခမ်းခြောက်မှုမရှိစေရန် ရေနှင့် ကယ်လိုရီမပါသော အရည်များကို များများသောက်ပါ
2. အစားအစာအကြောင်း အလွန်အမင်း မတွေးပါနှင့်
   အစာရှောင်သည့်နေ့များတွင် အလုပ်များများလုပ်ခြင်း သို့မဟုတ် ရုပ်ရှင်ကြည့်ခြင်းကဲ့သို့သော အာရုံပြောင်းနိုင်သော အရာများကို ပြုလုပ်ပါ
3. အနားယူပြီး ဖြေလျှော့ပါ
   အစာရှောင်သည့် နေ့များတွင် ပြင်းထန်သော လှုပ်ရှားမှုများကို ရှောင်ပါ၊ သို့သော် ပေါ့ပေါ့ပါးပါး ပြုလုပ်နိုင်သည့် ယောဂကဲ့သို့သော လေ့ကျင့်ခန်းများ ပြုလုပ်နိုင်သည်
4. စားသည့် ကယ်လိုရီတိုင်းကို အကျိုးရှိအောင် အသုံးချပါ
   ရွေးချယ်ထားသည့် အစာရှောင်သည့်နည်းလမ်းတွင် ကယ်လိုရီအချို့ စားခွင့်ရှိပါက အာဟာရပြည့်ဝသော အစားအစာများ (ပရိုတင်း၊ အမျှင်ဓာတ်နှင့် ကျန်းမာသော အဆီများ ပြည့်ဝသည့် အစားအစာများ) ကို ရွေးချယ်စားသောက်ပါ၊ (ဥပမာ _ ပဲအမျိုးမျိုး၊ ငါး၊ အခွံမာသီး၊ ထောပတ်သီး၊ ပြုပြင်ထုတ်လုပ်ထားခြင်းမဟုတ်သည့် သဘာဝအသားများ)
5. ဗိုက်ပြည့်စေသော ကယ်လိုရီနည်းသည့် အစားအစာများကို ရွေးချယ်ပါ
   ကယ်လိုရီပါဝင်မှုနည်းသော ရေဓာတ် အပြည့်အဝပါဝင်သည့် ဟင်းသီးဟင်းရွက်များနှင့် သစ်သီးများကို ရွေးချယ်စားသောက်ပါ (ဥပမာ _ စပျစ်သီး၊ ဖရဲသီး)
6. ကယ်လိုရီမများဘဲ အရသာရှိအောင် ပြုလုပ်၍ စားသောက်ပါ
   ကယ်လိုရီနည်းပြီး အရသာပြည့်ဝအောင် ပြုလုပ်ပေးနိုင်သည့် ကြက်သွန်ဖြူ၊ ဟင်းခတ်အမွှေးအကြိုင်များ၊ ငရုတ်ကောင်း၊ ရှာလကာရည် အစရှိသည်တို့ကို အသုံးပြုပါ
7. အစာရှောင်ပြီးနောက် အာဟာရပြည့်ဝသော အစားအစာများကို ရွေးချယ်ပါ
   အမျှင်ဓာတ်၊ ဗီတာမင်၊ သတ္တုဓာတ်နှင့် အာဟာရပြည့်ဝသော အစားအစာများကို စားပါ၊ ထိုအစားအစာများသည် သွေးတွင်းသကြားဓာတ်ကို တည်ငြိမ်အောင် ထိန်းညှိပေးသည့်အပြင် အာဟာရချို့တဲ့ခြင်းမှလည်း ကာကွယ်ပေးနိုင်သည်၊ အာဟာရညီညွတ်မျှတစွာ စားသောက်ခြင်းသည် ကိုယ်အလေးချိန် လျော့ကျစေရန်နှင့် ကျန်းမာရေးကောင်းမွန်စေရန် လုပ်ဆောင်ပေးသည်။

ရရှိနိုင်သောအကျိုးကျေးဇူးများ

အချိန်ပိုင်းအစာရှောင်ခြင်းသည် ကိုယ်အလေးချိန် ထိန်းသိမ်းရေးနှင့် ကျန်းမာရေးအတွက် အထောက်အကူဖြစ်ကြောင်း လေ့လာတွေ့ရှိထားသော်လည်း ထိုသုတေသနစမ်းသပ်ချက်များသည် တိုတောင်းသော အချိန်ကာလနှင့် လူနည်းစုကိုသာ လေ့လာထားခြင်းဖြစ်သည်။ ထို့ကြောင့် အချိန်ပိုင်းအစာရှောင်ခြင်းသည် ရေရှည်တည်တံ့သော ကိုယ်အလေးချိန်ကျခြင်းနှင့် ကျန်းမာရေးအပေါ် အကျိုးသက်ရောက်မှုများအကြောင်း ပိုမိုလေ့လာရန် လိုအပ်နေသေးသည်။ ထို့ကြောင့် အချိန်ပိုင်းအစာရှောင်ခြင်းကို စတင်မည်ဆိုပါက မိမိ၏ကျန်းမာရေးအခြေအနေများနှင့် ကိုက်ညီမှု ရှိမရှိတို့ကို မိသားစုဆရာဝန် (သို့မဟုတ်) အာဟာရပညာရှင်များနှင့် တိုင်ပင်ဆွေးနွေးပါ။

အဓိကရရှိနိုင်သော အကျိုးကျေးဇူးများမှာ_

• ကိုယ်အလေးချိန် လျော့ကျခြင်း
• နာတာရှည်ရောဂါများကို ဖြစ်ပေါ်စေနိုင်သော ရောင်ရမ်းမှုများကို လျော့ကျစေခြင်း
• အစာစားချင်စိတ် လျော့နည်းခြင်း
• သွေးတွင်းအဆီဓာတ် လျော့နည်းခြင်း
• သွေးတွင်းသကြားဓာတ် ထိန်းသိမ်းနိုင်ခြင်း
• သွေးပေါင်ချိန် ထိန်းသိမ်းပေးခြင်း
• အစာအိမ်နှင့် အူလမ်းကြောင်း ကျန်းမာရေးကောင်းမွန်စေခြင်း
• ကိုယ်ခံအား ကောင်းမွန်စေခြင်း
• အာရုံစူးစိုက်မှု ကောင်းမွန်စေခြင်း
• ကောင်းမွန်စွာ အိပ်စက်နိုင်ခြင်းတို့ဖြစ်ကြသည်။

ဖြစ်ပေါ်နိုင်သော ဘေးထွက်ဆိုးကျိုးများ

ဆာလောင်ခြင်းသည် အဓိကဘေးထွက်ဆိုးကျိုးဖြစ်သည်။ အချိန်ပိုင်းအစာရှောင်ခြင်း စတင်သောအခါ အားနည်းခြင်း၊ မောပန်းခြင်း၊ ဦးနှောက်စွမ်းဆောင်ရည် ယာယီကျဆင်းခြင်း (အာရုံစူးစိုက်မှုနည်းခြင်း)၊ အစာမကြေခြင်း၊ ဗိုက်အောင့်ဗိုက်နာဖြစ်ခြင်း၊ ခေါင်းကိုက်ခြင်း၊ စိတ်တိုလွယ်ခြင်းတို့ ခဏတာ ခံစားရနိုင်သည်။

အချိန်ပိုင်းအစာရှောင်ခြင်းသည် အောက်ပါအခြေအနေများတွင် ပြုလုပ်ရန် မသင့်တော်ပါ။

• ကိုယ်ဝန်ဆောင်နှင့် နို့တိုက်မိခင်များ
• အာဟာရချို့တဲ့သူများ
• သွေးတွင်းသကြားဓာတ်နည်းသူများ
• အချို့သော နာတာရှည် ‌ရောဂါရှိသူများ (ဥပမာ _ ဆီးချို‌ရောဂါ၊ နှလုံးရောဂါ)
• ကလေးငယ်များတွင် ပြုလုပ်ပါက အန္တရာယ်ဖြစ်စေနိုင်သည်။

ထို့အပြင် သွေးဆုံးခါနီး အမျိုးသမီးများတွင် အချိန်ပိုင်းအစာရှောင်ခြင်းသည် ဟော်မုန်းများကို ထိခိုက်စေနိုင်သည့်အတွက် အထူးသတိပြုလုပ်ဆောင်သင့်သည်။ စားသောက်ခြင်းအလေ့အထ မူမမှန်ခြင်းဆိုင်ရာရောဂါများ (Eating disorder) ရှိသူများ (သို့မဟုတ်) ဆေးကုသမှုခံယူထားသူများတွင် မည်သည့်အစာရှောင်ခြင်းနည်းလမ်းကိုမျှ အသုံးမပြုသင့်ပါ။ အချို့သော အချိန်ပိုင်းအစာရှောင်သူများသည် အစာရှောင်ကာလပြီးနောက် အလွန်အကျွံစားသောက်ခြင်း (Binge eating) သို့မဟုတ် ကျန်းမာရေးအစားအစာများကိုသာ အလွန်အမင်းစွဲလမ်းလွန်းခြင်း (Orthorexia) တို့ကို ဖြစ်စေနိုင်သည်။

အချုပ်အားဖြင့် ဆိုရသော် အချိန်ပိုင်း အစာရှောင်ခြင်းကြောင့် ကိုယ်အလေးချိန် လျော့ကျပြီး ကျန်းမာရေးကောင်းမွန်လာနိုင်သော်လည်း လူတိုင်းနှင့် မကိုက်ညီနိုင်ပါ။ အချိန်ပိုင်းအစာရှောင်ခြင်း နည်းလမ်းအမျိုးမျိုးရှိသဖြင့် မိမိနှင့် သင့်တော်သည့် နည်းလမ်းကို ‌ရွေးချယ်နိုင်ရန် ဆရာဝန်၊ အာဟာရပညာရှင်များနှင့် တိုင်ပင်ပြီး စတင်ပြုလုပ်သင့်သည်။ အချိန်ပိုင်းအစာရှောင်ခြင်း နည်းလမ်းများကို အသုံးပြုသော်လည်း အစာစားသည့်အချိန်များတွင် ကျန်းမာရေးနှင့် မညီညွတ်သော အစားအသောက်များ စားသောက်ခြင်း၊ လေ့ကျင့်ခန်းပြုလုပ်ခြင်း မရှိဘဲ နေထိုင်မည်ဆိုပါက အချိန်ပိုင်းအစာရှောင်ရုံနှင့် ကျန်းမာရေးအပေါ် သက်ရောက်မှုရှိမည် မဟုတ်ပါ။ ထို့ကြောင့် အချိန်ပိုင်းအစာရှောင်ခြင်းကို မှန်ကန်စွာ လိုက်နာပြီး ကျန်အချိန်များတွင်လည်း ကျန်းမာရေးနှင့် ညီညွတ်သော နေထိုင်စားသောက်မှုပုံစံများကို လိုက်နာမည်ဆိုပါက ကျန်းမာရေးအတွက် လွန်စွာအထောက်အကူပြုနိုင်သည်။

References:

1. Healthline. (n.d.). Intermittent fasting: What it is and how it works. Retrieved July 14, 2025, from https://www.healthline.com/nutrition/intermittent-fasting-guideat-is-it-and-how-does-it-work
2. WebMD. (n.d.). Intermittent fasting. Retrieved July 14, 2025, from https://www.webmd.com/diet/intermittent-fasting
3. Medical News Today. (2022). What is intermittent fasting, and how effective is it? Retrieved July 14, 2025, from https://www.medicalnewstoday.com/articles/322293
4. Cleveland Clinic. (n.d.). Intermittent fasting: 4 different types explained. Retrieved July 14, 2025, from https://health.clevelandclinic.org/intermittent-fasting-4-different-types-explained
5. Johns Hopkins Medicine. (n.d.). Intermittent fasting: What is it and how does it work? Retrieved July 14, 2025, from https://www.hopkinsmedicine.org/health/wellness-and-prevention/intermittent-fasting-what-is-it-and-how-does-it-work

Published: 11 August 2025