Breast Augmentation Surgery (ရင်သား ကြီးမားစေရန် ခွဲစိတ်ပြုပြင်ခြင်း)

အမျိုးသမီးများတွင် မိမိကိုယ်ကို ယုံကြည်မှု တိုးစေရန်နှင့် သွင်ပြင်ပိုမိုလှပစေရန် ပြုလုပ်သည့် ခွဲစိတ်မှုတစ်ခုဖြစ်သည်။ Breast implants ဟုခေါ်သည့် ရင်သားတုကို ခွဲစိတ်ထည့်သွင်းခြင်း (သို့မဟုတ်) မိမိကိုယ်တွင်းမှ အဆီပိုများကို ရင်သားအတွင်း ထိုးသွင်းခြင်းဖြင့် ရင်သား၏ အရွယ်အစားကို ကြီးမားစေရန်နှင့် ပုံသဏ္ဌာန်ကို လှပစေရန်ဆောင်ရွက်သော ခွဲစိတ်ပြုပြင်ကုသမှုတစ်ခုဖြစ်သည်။

ရင်သား ကြီးမားစေရန် ခွဲစိတ်ပြုပြင်ခြင်းအမျိုးအစားများ

• ရင်သားတု (Breast implant) ထည့်သွင်းခြင်းနှင့်
• ဝမ်းဗိုက်၊ ပေါင်နှင့် ကျောဘက်မှ အဆီပိုများကို Liposuction နည်းဖြင့် စုပ်ယူပြီး ရင်သားအတွင်းသို့ ထိုးသွင်းခြင်း (Fat transfer) ဟူ၍ (၂) မျိုး ရှိသည်။

ရင်သားတု (Breast implant) အမျိုးအစားများ

အောက်ဖော်ပြပါ ရင်သားတု (Breast implant) အမျိုးအစားများကို လူနာ၏ လိုအပ်ချက်အရ ‌ရွေးချယ်နိုင်သည်။

1. ရင်သားတုအား ပြုလုပ်ထားသည့် ပါဝင်ပစ္စည်းအလိုက်
   • Saline ဆေးရည်ပါဝင်သော ရင်သားတု (Saline implant)
   • ဆီလီကွန် ရင်သားတု (Silicone implant)
   • Gummy bear ဟုခေါ်သော ပိုမိုသိပ်သည်းသော ဆီလီကွန်တစ်မျိုးဖြင့် ပြုလုပ်ထားသည့် ရင်သားတု (Gummy bear implant)
2. အပေါ်ယံမျက်နှာပြင် အလိုက်
   • အ‌ပေါ်ယံမျက်နှာပြင် ချောမွေ့သော ရင်သားတု (Smooth implant)
   • ထည့်သွင်းထားသည့် နေရာမရွေ့သွားစေရန် အထူးပြုလုပ်ထားသော မျက်နှာပြင်ပါသည့် ရင်သားတု (Textured implant)
3. ပုံသဏ္ဌာန်အလိုက်
   • လုံးဝန်းသော ပုံသဏ္ဌာန်ရှိသည့် ရင်သားတု (Round implant)
   • သဘာဝရင်သားသကဲ့သို့ ပုံသဏ္ဌာန်ရှိသည့် ရင်သားတု (Anatomical/ teardrop implant)
4. တည်နေရာအလိုက်
   • ရင်ဘတ်ကြွက်သားအောက်ဘက် (Submuscular)
   • ရင်ဘတ်ကြွက်သားနှင့် ရင်သားကြား (Subglandular)
   • ရင်ဘတ်ကြွက်သားအောက်ဘက်၊ ရင်ဘတ်ကြွက်သားနှင့် ရင်သားကြား နှစ်ခုစလုံး (Dual plane)

ခွဲစိတ်ခြင်းမပြုမီ ခွဲစိတ်ပြုပြင်မည့် နည်းလမ်းများ၊ ရင်သားတုထည့်သွင်းမည့် တည်နေရာနှင့် ရင်သားတု အရွယ်အစား၊ ပုံသဏ္ဌာန် ရွေးချယ်ခြင်းတို့ကို အလှအပရေးရာ ခွဲစိတ်ဆရာဝန် သို့မဟုတ် ရင်သားခွဲစိတ်ဆရာဝန်နှင့် အသေးစိတ် ဆွေးနွေးရသည်။

ရင်သား ကြီးမားစေရန် ခွဲစိတ်ပြုပြင်ရန် လိုအပ်သည့် အခြေအနေများ

• ရင်သားပုံသဏ္ဌာန်အချိုးကျစေရန်နှင့် မိမိကိုယ်ကို ယုံကြည်မှုတိုးတက်စေရန် ရင်သားအရွယ်အစား ပိုမိုကြီးစေလိုခြင်း
• ရင်သားတစ်ဖက်နှင့် တစ်ဖက်အရွယ်အစား သိသာစွာ မတူညီခြင်း
• မိမိစိတ်တိုင်းကျ ရင်သားပုံသဏ္ဌာန်နှင့် အရွယ်အစား ရရှိလိုခြင်း
• ကိုယ်ဝန်ဆောင်ပြီးနောက် သို့မဟုတ် နို့တိုက်ပြီးနောက် ရင်သားပုံပျက်ခြင်း

ခွဲစိတ်ပြုပြင်မှု မပြုလုပ်သင့်သော အခြေအနေများ

• လတ်တလော အရေပြားပိုးဝင်နေသော အခြေအနေများ
• သွေးမတိတ်ရောဂါကဲ့သို့ သွေးရောဂါများ
• နှလုံးနှင့် သွေးကြောဆိုင်ရာ ရောဂါရှိသူများ
• ကိုယ်ဝန်ဆောင်မိခင်များ၊ နို့တိုက်မိခင်များ၊ လတ်တလော ကလေးမွေးဖွားထားသူများ
• စိတ်ရောဂါအခံရှိသူများ

ရင်သားကြီးမားစေရန် ခွဲစိတ်မှုမပြုလုပ်မီ ကြိုတင်သိရှိထားရမည့်အချက်များ

ရင်သားကြီးမားစေရန် ခွဲစိတ်ကုသမှုသည် တစ်ဦးချင်းစီ၏ ကိုယ်ခန္ဓာပုံသဏ္ဌာန်နှင့် လိုအပ်ချက်ပေါ် မူတည်၍ ကွဲပြားသောကြောင့် အလှအပရေးရာဆရာဝန် သို့မဟုတ် ရင်သားခွဲစိတ်ဆရာဝန်နှင့် ကြိုတင်တိုင်ပင်ဆွေးနွေးရန် အရေးကြီးသည်။

ခွဲစိတ်မှုမတိုင်မီ ဆရာဝန်သည် အောက်ပါတို့ကို ဆောင်ရွက်ပေးမည်ဖြစ်သည်။

• ကိုယ်ခန္ဓာပုံသဏ္ဌာန်ပြောင်းလဲမှုဆိုင်ရာ စိုးရိမ်မှုများကို ဖော်ထုတ်ဆွေးနွေးခြင်း
• တစ်ဦးချင်းစီ၏ လိုအပ်ချက်များနှင့် ကိုက်ညီသော ညွှန်ကြားချက်များကို ‌ပေးခြင်း
• ခွဲစိတ်ပစ္စည်းအမျိုးအစား၊ ပုံသဏ္ဌာန်၊ အရွယ်အစားနှင့် နေရာချထားမှုအတွက် ရွေးချယ်ရာတွင် အကူအညီပေးခြင်း
• ခွဲစိတ်ပြီးနောက် ဖြစ်လာနိုင်သော ရုပ်ပိုင်းဆိုင်ရာနှင့် စိတ်ပိုင်းဆိုင်ရာ ပြောင်းလဲမှုများကို ကြိုတင်အသိပေးခြင်း
• ခွဲစိတ်ပြီးနောက် နာလန်ထူမှုနှင့် နေ့စဥ်ဘဝအတွက် ကြိုတင်ပြင်ဆင်နည်းများ ညွှန်ကြားပေးခြင်း

သတိပြုရမည့်အချက်များ

• ရင်သားတု ထည့်သွင်းမှုသည် နောက်ပိုင်းတွင် ပြန်လည် လဲလှယ်ရန် လိုအပ်နိုင်သည်
• ကိုယ်ဝန်ဆောင်ခြင်း၊ ကိုယ်အလေးချိန် ကျဆင်းခြင်းနှင့် သွေးဆုံးပြီး အမျိုးသမီးများတွင် ထည့်ထားသော ရင်သားတု၏ ပုံသဏ္ဌာန်သည် ပြောင်းလဲမှုရှိနိုင်သည်
• ရင်သား ကြီးမားစေရန် ခွဲစိတ်ပြုပြင်ခြင်းသည် မိခင်နို့တိုက်ကျွေးနိုင်စွမ်းကို ကျဆင်းစေသည်
• ရင်သားသံလိုက်ဓာတ်မှန်ရိုက်ခြင်း (MRI)၊ ရင်သားအာထရာဆောင်း (Breast ultrasound) စစ်‌ဆေးခြင်းများ အခါအားလျော်စွာ လိုအပ်နိုင်သည်။

ခွဲစိတ်မှုအတွက် အောက်ပါအတိုင်း ပြင်ဆင်လုပ်ဆောင်မည်။

• လိုအပ်သော သွေးစစ်ဆေးမှု၊ ဓာတ်မှန်ရိုက်စစ်ဆေးမှုများ ပြုလုပ်ခြင်း
• လက်ရှိသောက်သုံးနေသော ဆေးဝါးများနှင့် မတည့်သော ဆေးဝါးများ မေးမြန်းခြင်း
• ဓာတ်မတည့်ခြင်းများ အထူးသဖြင့် ဆေးခန်းသုံး လက်အိတ်များတွင် ပါဝင်သော Latex ရာဘာနှင့် ဓာတ် တည့်မတည့် မေးမြန်းခြင်း
• ယခင်က မိမိရင်သားတွင် ဖြစ်ခဲ့ဖူးသော ပြဿနာများ ရှိမရှိသိရှိရန် ရင်သားဓာတ်မှန် စစ်ဆေးမှုများ ပြုလုပ်ခြင်း
• ခွဲစိတ်မှုအကြောင်း၊ အသုံးပြုမည့် မေ့ဆေး၊ ထုံဆေး၊ အိပ်ဆေးများ အကြောင်းနှင့် ၄င်းတို့၏ ကောင်းကျိုး၊ ဆိုးကျိုးနှင့် နောက်ဆက်တွဲအန္တရာယ်များကို သေချာရှင်းပြပြီး ခွဲစိတ်ရန် သဘောတူညီချက်ကို တောင်းခံခြင်း
• ခွဲစိတ်စဥ် ဆိုးကျိုးအန္တရာယ်ဖြစ်ပွားမှု နည်းစေရန် ဆေးလိပ်ဖြတ်ရန် ညွှန်ကြားခြင်း
• စွဲသောက်နေသော သောက်ဆေးများကို ထိန်းညှိခြင်း (ဥပမာ _ သွေးကျဲဆေး၊ သွေးမခဲဆေး စသည့် အချို့သောဆေးဝါးများ သောက်သုံးခြင်းကို ယာယီ ရပ်ထားရန် လိုအပ်ခြင်း) စသည်တို့ကို ပြုလုပ်မည်ဖြစ်သည်။

ခွဲစိတ်ကုသမှုအဆင့်ဆင့်

မခွဲစိတ်မီ

• လက်သွေးပြန်ကြောမှတစ်ဆင့် လိုအပ်သော ဆေးရည်များ ထိုးပေးခြင်း
• မေ့ဆေးပေးခြင်း
• အနာပိုးဝင်ခြင်းကို ကာကွယ်ရန် သင့်တော်သော ပဋိဇီဝပိုးသတ်ဆေးများ ထိုးခြင်း စသည်တို့ကိုပြုလုပ်သည်။

ခွဲစိတ်စဥ်

• ခွဲစိတ်မှုသည် တစ်နာရီမှ သုံးနာရီအထိ ကြာမြင့်နိုင်သည်
• ရင်သားအောက်ပိုင်းတွင် ခွဲကြောင်းပေး၍ သင့်တော်သော ရင်သား ကြီးမားစေရန် ခွဲစိတ်ပြုပြင်ခြင်းကို ပြုလုပ်သည်၊ (အဆီထိုးသွင်းခြင်း (fat transfer) နည်းတွင် ခွဲကြောင်းပေးရန်မလိုဘဲ သင့်တော်သောနေရာမှ အပ်ဖြင့် ထိုးသွင်းခြင်းဖြစ်သည်)
• ထို့နောက် ခွဲစိတ်အနာကို ပြန်ပိတ်ချုပ်သည်

ခွဲစိတ်ပြီး‌နောက်

ခွဲစိတ်ပြီးချိန်တွင် သွေးခုန်နှုန်း၊ သွေးဖိအား၊ အသက်ရှူနှုန်း၊ သွေးတွင်းအောက်ဆီဂျင် ရာခိုင်နှုန်း စသည်တို့ကို စိတ်ချရသည်အထိ စောင့်ကြည့်တိုင်းတာမည်ဖြစ်သည်။

လူနာသည် မေ့ဆေးမှ ကောင်းစွာ ပြန်နိုးလာပါက

• အနာသက်သာဆေးများ၊ ပိုးသတ်ဆေးများကို လိုအပ်သည့်အတိုင်း ပေးထားမည်
• မေ့ဆေးအရှိန်ပြယ်ပြီး စောင့်ကြည့်မှုများ စိတ်ချရသည့်အခါမှ လူနာအခန်းသို့ ပြန်ပို့ပေးပြီး အကိုက်အခဲပျောက်ဆေးများ၊ ပိုးသတ်ဆေးများ၊ ဆေးရည်များသွင်းပြီး ဆက်လက်ကုသမည်
• ဆေးရုံမဆင်းမီ ခွဲစိတ်အနာကို ဂရုစိုက်ထိန်းသိမ်းသည့် နည်းလမ်းများ သင်ကြားပေးမည်ဖြစ်ပြီး စနစ်တကျ လိုက်နာဆောင်ရွက်ရမည်
• ပုံမှန်အားဖြင့် လူနာအား ခွဲစိတ်သည့်နေ့၌ပင် အိမ်ပြန်ခွင့်ပြုသည်။

ရင်သားတုထည့်သွင်းကုသမှု၏ နောက်ဆက်တွဲဆိုးကျိုးများ

ရင်သား ကြီးမားစေရန် ခွဲစိတ်ကုသမှုတွင် အောက်ပါ ဆိုးကျိုးများ ဖြစ်ပွားနိုင်ခြေရှိသည်။

• အနာပိုးဝင်ခြင်း (Wound infection)
• သွေးထွက်လွန်ခြင်း (Wound bleeding)
• မေ့ဆေး၏ ဘေးထွက်ဆိုးကျိုးများ (ဥပမာ – အဆုတ်ရောင်ခြင်း)

နာလန်ထစအတွင်း ဖြစ်ပွားနိုင်သော ဆိုးကျိုးများ

• ရင်သားအတွင်း အမာရွတ်တည်ခြင်း (Capsular contracture)
• ရင်သားတုပတ်လည်တွင် အနာရည်စုခြင်း (Seroma formation)

ရေရှည်တွင် ကြုံတွေ့နိုင်သော ပြဿနာများ

• ရင်သားတု၏ အလေးချိန်ကြောင့် ရင်သား တွဲကျခြင်း
• ရင်သားတု နေရာရွေ့သွားခြင်း
• ရင်သားတု ပေါက်ပြဲခြင်း၊ ကွဲထွက်ခြင်း
• ရင်ဘတ်အလယ်တွင် ရင်သားတု နှစ်ဖက်စုနေခြင်း (Symmastia)

အလွန်ရှားပါးသော်လည်း ပြင်းထန်သည့်ဆိုးကျိုး

• ရင်သားတုနှင့် ဆက်စပ်သောကင်ဆာရောဂါ (Breast implant-associated anaplastic large cell lymphoma (BIA-ALCL) (ရင်သားအရွယ်အစား သို့မဟုတ် ပုံသဏ္ဌာန် ပြောင်းလဲခြင်း၊ ရောင်ရမ်းခြင်း၊ အလုံးများပေါ်လာနိုင်ပြီး ခွဲစိတ်မှုပြီး (၂)နှစ် မှ (၈)နှစ်အကြာတွင် ဖြစ်နိုင်သည်

လိုက်နာဆောင်ရွက်ရမည့်အချက်များ

• ဆရာဝန်မှ ပြန်လည်စမ်းသပ်ရန် ခွဲစိတ်ပြီး တစ်ပတ်အကြာတွင် ချိန်းဆိုမည်
• ရက်ချိန်းမတိုင်မီ ခွဲစိတ်သည့်နေရာတွင် ဖောင်းခြင်း၊ ရောင်ခြင်း၊ ဖျားခြင်း ဖြစ်ပေါ်လျှင် ချက်ချင်း ပြန်လည်ပြသရမည်
• ပေါ့ပါးသောလှုပ်ရှားမှုများကို (၁-၂) ပတ်အတွင်း ပြန်လည်စတင်နိုင်သော်လည်း ပြင်းထန်သော လေ့ကျင့်ခန်းများကို ရက်သတ္တပတ်အနည်းငယ်ကြာ ရှောင်ကြဉ်ပါ
• အလွန်တင်းကျပ်သော အတွင်းခံဝတ်ခြင်းကို ရှောင်ကြဉ်ပါ၊ ရင်သားပုံသဏ္ဌာန်ကို ထိန်းသိမ်းရန် အကြံပြုထားသော အတွင်းခံများကို ဝတ်ဆင်ပါ
• ရင်သား ကြီးမားစေရန် ခွဲစိတ်ပြုပြင်ခြင်းလုပ်ထားသူများသည် မိမိရင်သားကျန်းမာရေးကို ပြန်လည် စစ်ဆေးရန် အလှအပရေးရာ ခွဲစိတ်ဆရာဝန် သို့မဟုတ် ရင်သားခွဲစိတ်ဆရာဝန်နှင့် ပုံမှန်ပြသစစ်ဆေးရမည်

References:

1. Cleveland Clinic. (2021). Breast augmentation: Options, surgery & recovery. Retrieved August 10, 2025, from https://my.clevelandclinic.org/health/treatments/11024-breast-augmentation
2. Mayo Clinic. (2018). Breast augmentation. Retrieved August 10, 2025, from https://www.mayoclinic.org/tests-procedures/breast-augmentation/about/pac-20393178

Published: 27 August 2025