Orthopaedic Implants (အရိုးအဆစ်အစားထိုးပစ္စည်းများ)

အရိုးအဆစ်အစားထိုးပစ္စည်းများကို ထိခိုက်ဒဏ်ရာနှင့် အရိုးအဆစ်ပျက်စီးသည့်ရောဂါများတွင် အသုံးပြုခြင်းဖြင့် ကုသမှုရလဒ်များ တိုးတက်ကောင်းမွန်စေသည်။ အရိုးခွဲစိတ်ကုသမှုများတွင် အသုံးပြုသည့် ပစ္စည်းများသည် ယေဘုယျအားဖြင့် (၂) မျိုး ရှိသည်။

အမြဲတမ်းအစားထိုးထားရှိသော ပစ္စည်းများ (Permanent) _ တင်ပါးဆစ်နှင့် ဒူးဆစ်အစားထိုးခွဲစိတ်ကုသမှုတွင် အသုံးပြုသည့်ပစ္စည်းများဖြစ်သည်
ယာယီအစားထိုးထားရှိသော ပစ္စည်းများ (Temporary) _ အရိုးကျိုးသည့်နေရာများတွင် အသုံးပြုသည့် ပစ္စည်းများဖြစ်ပြီး အရိုးပြန်ဆက်သည့်အချိန်တွင် ပြန်ဖြုတ်နိုင်သည်

အရိုးအဆစ်အစားထိုးပစ္စည်းများကို ဇီဝလိုက်လျောညီထွေရှိသော (Biocompatible) အထူးပစ္စည်းများဖြင့် ပြုလုပ်ထားသောကြောင့် လူ့ခန္ဓာကိုယ်နှင့် သဟဇာတဖြစ်စေသည်။ ခန္ဓာကိုယ်၏ အင်အားနှင့် လှုပ်ရှားမှုများကို ခံနိုင်ရည်ရှိရန်၊ ခိုင်ခံ့ပြီး တာရှည်ခံရန်တို့အတွက်လည်း ဒီဇိုင်းဆွဲ ထုတ်လုပ်ထားသည်။

အသုံးများသော သတ္တုပစ္စည်းများမှာ_

စတိန်းလက်စတီး (Stainless steel) _ သတ္တုပြား (plates) နှင့် ဝက်အူ (screws) ကဲ့သို့သော ယာယီထည့်သွင်းပစ္စည်းများအတွက် အသုံးပြုသည်
တိုက်တေနီယမ် (Titanium) _ ခိုင်ခံ့မှု၊ ပေါ့ပါးမှု၊ အရိုးနှင့် သဟဇာတဖြစ်မှုကြောင့် အသုံးများသည်၊ တိုက်တေနီယမ်သည် အရိုးကို ၎င်း၏မျက်နှာပြင်ပေါ်တွင် ကြီးထွားရန် အားပေးနိုင်ပြီး သတ္တုနှင့်အရိုး၏ အလွန်ခိုင်ခံ့သော ဆက်စပ်မှု (Osseointegration) ကို ဖြစ်ပေါ်စေသည်
ကိုဘော့-ခရိုမီယမ်သတ္တုစပ် (Cobalt-Chromium Alloys) _ အလွန်ခိုင်ခံ့ပြီး ပွန်းပဲ့ခံနိုင်ရည်ရှိကာ အဆစ်အစားထိုးသည့် အစိတ်အပိုင်းများတွင် အသုံးပြုလေ့ရှိသည်

အရိုးရောဂါခွဲစိတ်ကုသမှုများတွင် ထည့်သွင်းအသုံးပြုသော အရိုးအဆစ်အစားထိုးပစ္စည်းများ
(Types of Orthopaedic Implants)

K-wires (Kirschner Wires)
K-wires များသည် စတိန်းလက်စတီးဖြင့်ပြုလုပ်ထားသည့် သံချောင်းငယ်များဖြစ်ပြီး အချင်း(၀.၇-၂.၅မီလီမီတာ) အတွင်းရှိသည်။ အရိုးအပိုင်းအစများကို နေရာတကျ ထိန်းထားနိုင်ရန် အရိုးထဲသို့ တိုက်ရိုက်ဖောက်သွင်း ထည့်သွင်းအသုံးပြုသည်။ အရိုးဆက်သွားပါက အလွယ်တကူ ပြန်လည်ဖယ်ရှားနိုင်ရန် ၎င်းတို့၏ အစွန်းများကို အရေပြားအပြင်သို့ ဖောက်ထုတ်ထားလေ့ရှိသည်။ ထို့အပြင် သတ္တုပြားများ၊ ဝက်အူများမထည့်မီ အရိုးအပိုင်းအစများ တည်ငြိမ်စေရန် ယာယီအသုံးပြုသည်။
Cerclage Wires
ဝိုင်ယာကြိုး၏ အချင်းမီလီမီတာ အမျိုးမျိုးရှိသော ကွေးညွှတ်နိုင်သော သံမဏိဝါယာကြိုးများဖြစ်သည်။ ဂုံညှင်းရိုးနှင့် တံတောင်ဆစ်ရိုး ကျိုးခြင်းတို့တွင် K-wires နှင့် တွဲဖက်၍ ပဲ့သွားသည့် အရိုးတည်ငြိမ်မှုရှိစေရန် လုပ်ဆောင်သည်။ တင်ပါးဆုံဆစ်နှင့် ဒူးဆစ် အစားထိုးခွဲစိတ်ကုသမှုများတွင် ဖြစ်ပေါ်နိုင်သော အရိုးကျိုးမှုများကို ကုသရာတွင်လည်း အသုံးပြုသည်။
ဝက်အူများ (Screws)
အရိုးများကို သတ္တုပြား (သို့မဟုတ်) သတ္တုချောင်းများနှင့် တွယ်ဆက်စေရန် အသုံးပြုသည်။ အရိုးအမျိုးအစားပေါ်မူတည်၍ ပုံသဏ္ဌာန်နှင့် အရွယ်အစား အမျိုးမျိုးရှိသည်။
သတ္တုပြားများ (Plates)
ကျိုးသွားသောအရိုးပေါ်တွင် သတ္တုအပြားများကို နေရာချထားပြီး ဝက်အူဖြင့် တွယ်ဆက်ထားသည်။ အရိုးကို တည်ငြိမ်စွာ ထိန်းထားပေးပြီး ကောင်းမွန်စွာ အရိုးပြန်ဆက်စေသည်။ အသုံးပြုသည့် အရိုးအနေအထားပေါ် မူတည်၍ သတ္တုပြားများသည် အရွယ်အစားအမျိုးမျိုး၊ ပုံစံအမျိုးမျိုးရှိသည်။
အရိုးထဲသို့ ထည့်သွင်းသော သတ္တုချောင်းများ (Intramedullary Nails or Rods)
ခြေသလုံးရိုး၊ ပေါင်ရိုး၊ လက်မောင်းရိုးများအတွင်းသို့ ထည့်သွင်းပြီး အရိုးကို တည်ငြိမ်စွာထိန်းပေးရန် အသုံးပြုသည်။
အဆစ်အစားထိုးပစ္စည်းများ (Joint Replacements / Prostheses)
အဆစ်အစားထိုးပစ္စည်းများကို သတ္တုစပ်များ၊ ဖိအားဒဏ်ခံနိုင်သော ပလတ်စတစ်များနှင့် ကြွေသားများဖြင့် ပြုလုပ်ထားသည်။ တင်ပါးဆုံဆစ်နှင့် ဒူးဆစ်တို့တွင် အများဆုံးအသုံးပြုသည်။
ကျောရိုးတွင်အသုံးပြုသည့်ပစ္စည်းများ (Spinal Implants)
ကျောရိုးကို တည်ငြိမ်စေရန်နှင့် နာကျင်မှုသက်သာစေရန် သတ္တုချောင်း၊ ဝက်အူနှင့် ကျောရိုးနှစ်ခုကြား ထည့်သွင်းရသည့် သတ္တုအိမ် (Interbody cage) ကို အသုံးပြုသည်။
အရေပြားပြင်ပမှ စတီးချောင်းဖြင့်ချုပ်တည်းခြင်း (External Fixator)
အရေပြားဖောက်ထွက်သော အရိုးကျိုးခြင်းများနှင့် အရိုးပုံသဏ္ဌာန်မမှန်မှုများကို ကောင်းမွန်စေရန် အရေပြားမှတစ်ဆင့် သတ္တုအတံများ (pins)၊ သတ္တုအချောင်း (rod)၊ သတ္တုကွင်းများ (frame) တပ်ဆင်၍ ကုသမှုပေးသည်။ ခက်ခဲသောအရိုးကျိုးမှုများတွင် အထူးအသုံးဝင်သည်။

ထည့်သွင်းပစ္စည်းတစ်ခု၏ လုပ်ဆောင်ပုံသည် ၎င်း၏ရည်ရွယ်ချက်ပေါ် မူတည်သည်။

အရိုးကျိုးခြင်းအတွက်
သတ္တုပြားများ၊ ဝက်အူများ၊ သတ္တုချောင်းများသည် အရိုးအပိုင်းအစများကို ခိုင်မြဲစွာ ထိန်းထားပေးသည့် အတွင်းပိုင်း ကြပ်စည်းခြင်းကဲ့သို့ လုပ်ဆောင်သည်။ ဤလုပ်ဆောင်မှုသည် ခန္ဓာကိုယ်၏ သဘာဝအတိုင်း အရိုးဆက်စေသော လုပ်ငန်းစဉ်အရ အရိုးကျိုးသည့်နေရာတွင် အရိုးအသစ်များ ဖြစ်ပေါ်စေသည်။ အရိုးဆက်ပြီးနောက် ထည့်သွင်းပစ္စည်းကို ၎င်း၏အမျိုးအစားနှင့် နေရာပေါ်မူတည်၍ ဖယ်ရှားနိုင်သည် သို့မဟုတ် မဖယ်ရှားဘဲထားနိုင်သည်။
အဆစ်အစားထိုးခြင်းအတွက်
အစားထိုးအဆစ်များကို သတ္တုစပ်များ၊ ဖိအားဒဏ်ခံနိုင်သော ပလပ်စတစ်၊ ကြွေသားများနှင့် ပြုလုပ်ထားပြီး အဆစ်လှုပ်ရှားမှုအတွက် ပွတ်တိုက်မှုနည်းသော မျက်နှာပြင်ကို ဖန်တီးပေးသည်။ အဆစ်၏လှုပ်ရှားမှုကို ချောမွေ့စေကာ အရိုးချင်းပွတ်တိုက်မိခြင်းကြောင့် ဖြစ်ပေါ်သော နာကျင်မှုကို ဖယ်ရှားပေးသည်။

ပြုလုပ်ရန်လိုအပ်သော ရောဂါ၊ အခြေအနေများ

အရိုးအဆစ်အစားထိုးပစ္စည်းများ (Orthopaedic Implants) ကို အောက်ဖေါပြပါ ရောဂါများနှင့် အခြေအနေများတွင် အသုံးပြုရန် လိုအပ်သည်။ ဤပစ္စည်းများသည် လူနာများ၏ လှုပ်ရှားသွားလာနိုင်စွမ်းကို အမြန် ပြန်လည်ရရှိစေပြီး နာကျင်မှုကို သက်သာစေသည်။

အရိုးကျိုးခြင်း
ပြင်းထန်သော အရိုးကျိုးခြင်းများ၊ အထူးသဖြင့် နေရာရွေ့လျားသွားသော (displaced fractures) သို့မဟုတ် အပိုင်းအစများစွာ ကွဲထွက်သွားသော အရိုးကျိုးခြင်းများကို တည်ငြိမ်စေရန်နှင့် အနေအထားမှန်စွာ အရိုးဆက်စေရန်အသုံးပြုသည်။
အရိုးကျိုးခြင်း၏ နောက်ဆက်တွဲဆိုးကျိုးများ (Complications of Fractures) ဖြစ်သော အရိုးမဆက်ခြင်း (Non-union)၊ အရိုးဆက်နှေးခြင်း (Delayed union)၊ အရိုးနေရာလွဲ၍ ဆက်ခြင်း (Malunion) အခြေအနေများ
ပုံမှန်အားဖြင့် အရိုးမဆက်သော သို့မဟုတ် ပုံစံမမှန်ဘဲဆက်သွားသော အရိုးများကို ကုသရန်အတွက် ထည့်သွင်းပစ္စည်းများဖြင့် ခွဲစိတ်ပြုပြင်ရန် လိုအပ်သည်။
ပျက်စီးနေသော အဆစ်များကို အစားထိုးခြင်း (Joint Replacement)
ပြင်းထန်သော အဆစ်ရောင်ခြင်း၊ ထိခိုက်ဒဏ်ရာများ သို့မဟုတ် အခြားရောဂါများကြောင့် ပြန်လည်ပြုပြင်၍ မရနိုင်တော့သော ပျက်စီးနေသည့် အဆစ်များ (ဥပမာ _ တင်ပါးဆုံဆစ်၊ ဒူးဆစ်၊ ပခုံးဆစ်) ကို အစားထိုးရန် အသုံးပြုသည်။
ပုံသဏ္ဌာန်မမှန်သော အရိုးအဆစ်များတွင် အသုံးပြုခြင်း (Correction of Deformities)
မွေးရာပါ သို့မဟုတ် နောက်ပိုင်းတွင် ဖြစ်ပေါ်လာသော အရိုးနှင့်အဆစ်များ၏ ပုံသဏ္ဌာန်မမှန်မှုများကို ကောင်းမွန်စေရန်နှင့် လုပ်ဆောင်နိုင်စွမ်းကို တိုးတက်စေရန်အတွက် ထည့်သွင်းပစ္စည်းများကို အသုံးပြုသည်။
ကျောရိုးကျိုးခြင်း (spinal fractures)၊ ဆိုးရွားသော ခါးကောက်ခြင်းများ (scoliosis) သို့မဟုတ် ကျောရိုးဆစ် ရောင်ရမ်းမှု ရောဂါများ (degenerative spinal conditions)
ဤအခြေအနေများတွင် ကျောရိုးတည်ငြိမ်စေရန်၊ကျောရိုးကို ခိုင်မာအောင် ထိန်းထားရန်နှင့် အာရုံကြောများပေါ် ဖိအားကို လျှော့ချရန်အတွက် အသုံးပြုသည်။
ပြင်းထန်သည့် တင်ပါးဆုံအရိုးကွင်းကျိုးလူနာများတွင် သွေးထွက်မလွန်စေရန် အသုံးပြုခြင်း (Pelvic Fracture Stabilization for Hemorrhage Control)
ပြင်းထန်သော တင်ပါးဆုံအရိုးကွင်းကျိုး (severe pelvic ring fractures) လူနာများတွင် သွေးထွက်လွန်ခြင်းကို ကာကွယ်ရန်နှင့် ထိန်းချုပ်ရန်အတွက် ထည့်သွင်းပစ္စည်းများဖြင့် တည်ငြိမ်အောင် ပြုလုပ်ခြင်းသည် အသက်ကယ်ကုသမှုတစ်ခုဖြစ်သည်။

ကြိုတင်သိရှိထားရမည့်အချက်များ

အရိုးအဆစ်အစားထိုးပစ္စည်းများဖြင့် ခွဲစိတ်မှုမခံယူမီ သိထားသင့်သည့်အချက်များမှာ အောက်ပါအတိုင်းဖြစ်သည်။

ကုသမှုခံယူရန် သင့်တော်သော လူနာတစ်ဦး ဟုတ်မဟုတ် ဆုံးဖြတ်နိုင်ရန်အတွက် ရောဂါရာဇဝင်မေးခြင်း၊ အထွေထွေစမ်းသပ်စစ်ဆေးခြင်း၊ ခွဲစိတ်ကုသမှုခံယူမည့်နေရာကို အသေးစိတ်စစ်ဆေးခြင်း၊ ဓာတ်မှန်ရိုက်ခြင်း၊ လိုအပ်ပါက ကွန်ပျူတာဓါတ်မှန် (CT scan) ရိုက်ခြင်း၊ သံလိုက်ဓာတ်မှန် (MRI) ရိုက်ခြင်းတို့ ပြုလုပ်မည်
ဆီးချို၊ နှလုံးရောဂါ သို့မဟုတ် အရိုးပွရောဂါကဲ့သို့ အခြေအနေများသည် ခွဲစိတ်မှုရလဒ်နှင့် ထည့်သွင်းပစ္စည်း၏ သက်တမ်းကို ထိခိုက်နိုင်သောကြောင့် ခွဲစိတ်မှုမတိုင်မီ အဆိုပါရောဂါများကို ကုသထိန်းချုပ်မှုပေးရမည်
ထည့်သွင်းပစ္စည်းအသုံးပြုရခြင်း၏ ရည်ရွယ်ချက်နှင့် အကျိုးကျေးဇူးများကို နားလည်ထားရမည်
ဖြစ်နိုင်ခြေရှိသော နောက်ဆက်တွဲဆိုးကျိုးများကို သိရှိထားရမည်
ခွဲစိတ်ပြီးနောက် ရောဂါပိုးဝင်ရောက်မှုမရှိစေရန် ကူးစက်ရောဂါကာကွယ်ရေး အထွေထွေကာကွယ်မှုနည်းလမ်းများ (universal precautions) ကို လိုက်နာရမည်
ခွဲစိတ်ကုသသည့် နည်းလမ်းအပြင် အခြားရွေးချယ်စရာ ကုသမှုများ ကို သက်ဆိုင်ရာဆရာဝန်နှင့် ဆွေးနွေးတိုင်ပင်နိုင်သည်
ခွဲစိတ်မှုမတိုင်မီ ခန္ဓာကိုယ်အတွင်းထည့်သွင်းမည့် ပစ္စည်းအမျိုးအစား၊ အရွယ်အစားရွေးချယ်ခြင်းနှင့် ခွဲစိတ်ပြီးနောက် နာကျင်နိုင်မှုအခြေအနေ၊ လှုပ်ရှားနိုင်မှု၊ ခွဲစိတ်ဒဏ်ရာကို မည်သို့ဂရုစိုက်ရမည်ကို သိရှိထားရမည်
မေ့ဆေး၊ ထုံဆေးနှင့် ခွဲစိတ်ကုသမှု၏ အန္တရာယ်များနှင့် အကျိုးကျေးဇူးများကို နားလည်ကြောင်း အတည်ပြု သဘောတူညီမှု ပေးရမည်
ခွဲစိတ်ကုသမှုခံယူပြီးနောက်ပိုင်း ပြန်လည်သန်စွမ်းရေး လေ့ကျင့်ခန်းအစီအစဉ်များသည် အဓိကကျသကဲ့သို့ လူမှုဘဝနေထိုင်မှုပုံစံများ ပြောင်းလဲရန်လည်း လိုအပ်နိုင်သည်

ခွဲစိတ်ပုံအဆင့်ဆင့်

အရိုးအဆစ်အစားထိုးပစ္စည်းများဖြင့် ခွဲစိတ်ကုသရာတွင် အဓိကအဆင့်များစွာ ပါဝင်သည်။ ၎င်းတို့မှာ အောက်ပါအတိုင်း ဖြစ်သည်။

မေ့ဆေးပေးခြင်းနှင့် နေရာချထားခြင်း (Anesthesia and Positioning)
မေ့ဆေးပေးပြီး လူနာကို ခွဲစိတ်ရန် သင့်လျော်သော အနေအထားတွင် ထားရှိသည်။
ခွဲစိတ်ခြင်း (Incision)
ရောဂါပိုးမဝင်စေရန် ပိုးသတ်ထားသော ခွဲစိတ်မှု ပြုလုပ်၍ အရိုး (သို့မဟုတ်) အဆစ်ကို မြင်သာအောင်ပြုလုပ်သည်။
အရိုးအနေအထားမှန်ကန်စေရန်ပြုလုပ်ခြင်း သို့မဟုတ် အဆစ်ပြင်ဆင်ခြင်း (Fracture Reduction/Joint Preparation)
အရိုးကျိုးနေပါက ၎င်းကို နေရာမှန် ပြန်လည်ထားရှိခြင်း (reduced) သို့မဟုတ် အဆစ်ကို အစားထိုးရန်အတွက် ပြင်ဆင်ခြင်းတို့ ပြုလုပ်သည်။
ထည့်သွင်းပစ္စည်း တပ်ဆင်ခြင်း (Implant Insertion)
ထို့နောက်တွင် သတ္တုပြား၊ သတ္တုချောင်း၊ ဝက်အူ (သို့မဟုတ်) အစားထိုးအဆစ် (prosthesis) ကဲ့သို့သော ထည့်သွင်းပစ္စည်းကို ဂရုတစိုက် ထည့်သွင်းပြီး တည်ငြိမ်စေရန် ပြုလုပ်သည်။
တည်နေရာအတည်ပြုခြင်း (Position Confirmation)
ထည့်သွင်းပစ္စည်း၏ တည်နေရာ မှန်ကန်ကြောင်းကို ခွဲစိတ်နေစဉ်အတွင်း ဓာတ်မှန် (C-arm X-ray) ရိုက်၍ အတည်ပြုလေ့ရှိသည်။
ခွဲစိတ်ဒဏ်ရာ ပိတ်ခြင်း (Wound Closure)
ခွဲစိတ်ပြီးနောက် ခွဲစိတ်ဒဏ်ရာကို ဆေးကြောသန့်စင်ပြီး အလွှာလိုက် ပြန်လည်ပိတ်ကာ ပတ်တီးစည်းခြင်း၊ ပလာစတာကပ်ခြင်းတို့ ပြုလုပ်သည်။
ခွဲစိတ်ပြီးနောက် စောင့်ရှောက်ကုသမှု (Postoperative Care)
ခွဲစိတ်ပြီးနောက်ပိုင်းတွင် လူနာအား စောင့်ကြည့်ခြင်း၊ ပိုးသတ်ဆေးများ ပေးခြင်း၊ နာကျင်မှု သက်သာအောင် ဆောင်ရွက်ပေးခြင်းနှင့် စောစီးစွာ ပြန်လည်သန်စွမ်းရေး လေ့ကျင့်ခန်းများ စတင်စေခြင်းတို့ ပြုလုပ်သည်။

အရိုးအဆစ်အစားထိုးပစ္စည်းများ၏ အားသာချက်များ

အရိုးအနေအထား မှန်ကန်စွာနှင့် မြန်ဆန်စွာ အရိုးဆက်စေရန် ကူညီပေးသည်
လှုပ်ရှားနိုင်စွမ်းနှင့် လုပ်ဆောင်နိုင်စွမ်းကို အမြန်ပြန်လည်ရရှိစေသည်
ပျက်စီးသွားသောအဆစ်များတွင် အစားထိုးပစ္စည်း အသုံးပြုခြင်းဖြင့် နာကျင်မှုကို လျော့နည်းစေသည်
ကာလတာရှည် မလှုပ်မရှား ငြိမ်နေရန် မလိုအပ်ဘဲ ပြန်လည်သန်စွမ်းရေး လေကျင့်ခန်းများကို စောစောစတင်နိုင်သည်၊ ပြန်လည်သန်စွမ်းရေး လေ့ကျင့်ခန်းများကို စောစောစီးစီး စတင်လုပ်ဆောင်နိုင်သဖြင့် ကြွက်သားများ အားမလျော့ဘဲ အဆစ်များ တောင့်တင်းခြင်းကို ကာကွယ်ပေးနိုင်သည်
ပြင်းထန်သော အရိုးအကြော ထိခိုက်မှုများတွင် သွေးထွက်မလွန်ရန်နှင့် အရိုးပိုးဝင်ခြင်းမှ ကာကွယ်ရန်အတွက် အသုံးဝင်သည်

နောက်ဆက်တွဲဆိုးကျိုးများ

အခြားသော ခွဲစိတ်ကုသမှုများကဲ့သို့ပင် အရိုးအဆစ်အစားထိုးပစ္စည်းများ အသုံးပြုခြင်းတွင်လည်း အန္တရာယ်များရှိနိုင်သည်။

ရောဂါပိုးဝင်ခြင်း
အစားထိုးပစ္စည်း ထည့်သွင်းအသုံးပြုသည့်နေရာတွင် ရောဂါပိုး ဝင်နိုင်သည်၊ ရှားပါးသော်လည်း ခွဲစိတ်ပြီးနောက် ပိုးဝင်နိုင်ပြီး ထည့်သွင်းပစ္စည်းကို ဖယ်ရှားရန် လိုအပ်နိုင်သည်
သွေးခဲများ (Blood Clots)
ခြေထောက် (သို့မဟုတ်) အဆုတ်ထဲတွင် သွေးခဲများ ဖြစ်ပေါ်ခြင်းသည် မည်သည့်ခွဲစိတ်မှုမဆို ဖြစ်နိုင်ခြေရှိသော နောက်ဆက်တွဲ ပြဿနာတစ်ခုဖြစ်သော်လည်း ကြိုတင်ကာကွယ်မှုများ ပြုလုပ်ထားနိုင်သည်
ထည့်သွင်းသည့်ပစ္စည်းချောင်သွားခြင်း သို့မဟုတ် ကျိုးသွားခြင်း ဖြစ်နိုင်ပြီး ထပ်မံခွဲစိတ်မှု (revision surgery) လိုအပ်နိုင်သည်
ထည့်သွင်းပစ္စည်းပတ်လည်တွင် အရိုးကျိုးခြင်း (Fracture around the implant)
ရှားပါးသော်လည်း ထည့်သွင်းပစ္စည်းပတ်လည်ရှိ အရိုးတွင် အရိုးကျိုးခြင်းအသစ် ဖြစ်ပေါ်နိုင်သည်
အာရုံကြော (သို့မဟုတ်) သွေးကြောများ ပျက်စီးခြင်း (Nerve or Blood Vessel Damage)
ခွဲစိတ်မှုအတွင်း ဖြစ်ပွါးနိုင်ခြေ အလွန်နည်းသည်
သတ္တုဓာတ်မတည့်မှုများ (Allergic Reactions)
ဖြစ်နိုင်သော်လည်း အလွန်ရှားပါးသည်
အရိုးကောင်းမွန်စွာဆက်စေရန် ရည်ရွယ်အသုံးပြုသော်လည်း အရိုးမဆက်ခြင်းဖြစ်နိုင်သည်
အကြောင်းအမျိုးမျိုးကြောင့် နောင်တစ်ချိန်တွင် ပြန်လည်ခွဲစိတ်မှု ပြုလုပ်ရန် လိုအပ်နိုင်သည်

အထက်ဖော်ပြပါ ဆိုးကျိုးများသည် အလွန်ရှားပါးကာ စနစ်တကျ ခွဲစိတ်ကုသမှုခံယူပါက ကောင်းကျိုးပိုမိုရရှိမည်။

လိုက်နာဆောင်ရွက်ရမည့်အချက်များ

အရိုးအဆစ်အစားထိုးပစ္စည်းများဖြင့် ခွဲစိတ်မှုခံယူပြီးနောက် အောက်ပါအချက်များကို ဂရုတစိုက် လိုက်နာခြင်းဖြင့် အနာမြန်မြန်ကျက်စေပြီး နောက်ဆက်တွဲ ဆိုးကျိုးများကိုလည်း ကာကွယ်နိုင်ပါသည်။

ခွဲစိတ်ဒဏ်ရာကို သန့်ရှင်းခြောက်သွေ့အောင် ထားပါ
ရောဂါပိုးမဝင်စေရန် ခွဲစိတ်ဒဏ်ရာအား သတ်မှတ်ထားသည့်အတိုင်း သန့်ရှင်းပြီး ခြောက်သွေ့နေစေရန် အထူးဂရုစိုက်ပါ။
သတိထားရမည့် လက္ခဏာများရှိပါက ဆရာဝန်နှင့် ချက်ချင်းဆက်သွယ်ပါ
နာကျင်မှု ပိုဆိုးလာခြင်း၊ အနာရောင်ရမ်းခြင်း၊ အရေပြားနီမြန်းခြင်း၊ အနာမှ အရည် (သို့မဟုတ်) ပြည်ထွက်ခြင်း၊ ကိုယ်အပူချိန်တက်ခြင်း၊ သို့မဟုတ် ထည့်သွင်းပစ္စည်းနှင့်ပတ်သက်၍ ထူးဆန်းသောအသံ (သို့မဟုတ်) ခံစားချက်တို့ရှိပါက နီးစပ်ရာ ဆရာဝန် (သို့မဟုတ်) ဆေးရုံသို့ ချက်ချင်း ပြန်လည်ဆက်သွယ်တိုင်ပင်ပါ။
လှုပ်ရှားမှု ကန့်သတ်ချက်များကို တိကျစွာ လိုက်နာပါ
ခွဲစိတ်ထားသည့် အရိုး (သို့မဟုတ်) အဆစ်အပေါ် အလွန်အမင်း ဝန်ပိစေမည့် လှုပ်ရှားမှုများ၊ အလေးအပင် မခြင်း၊ လိမ်ခြင်း၊ ကွေးခြင်း သို့မဟုတ် ထိခိုက်မှု ဖြစ်စေနိုင်သော အားကစားများကို ဆရာဝန် (သို့မဟုတ်) ပြန်လည်သန်စွမ်းရေး ဆရာဝန် ညွှန်ကြားသည့်အတိုင်း သတ်မှတ်ထားသောကာလအတွင်း ရှောင်ကြဉ်ပါ။
ပြန်လည်သန်စွမ်းရေး လေ့ကျင့်ခန်းများကို ပုံမှန်ပြုလုပ်ပါ
ခွဲစိတ်ထားသည့်နေရာရှိ ကြွက်သားများကို သန်မာစေရန်နှင့် အဆစ်၏ လှုပ်ရှားနိုင်စွမ်းကို ပြန်လည်ရရှိရန်အတွက် ဆေးရုံမှ သို့မဟုတ် ပြန်လည်သန်စွမ်းရေး ဆရာဝန်မှ ညွှန်ကြားထားသည့် လေ့ကျင့်ခန်းများကို စနစ်တကျ မှန်မှန် ပြုလုပ်ပါ။
ကိုယ်အလေးချိန်နှင့် အာဟာရကို ထိန်းသိမ်းပါ
ထည့်သွင်းပစ္စည်းနှင့် အရိုးများ ပြန်လည်ထိခိုက်မှု မဖြစ်စေရန် ကိုယ်အလေးချိန်ကို ထိန်းသိမ်းပါ။ အရိုးနှင့် တစ်ရှူးများ ကျန်းမာရေးအတွက် လိုအပ်သော အာဟာရပြည့်ဝစွာ စားသုံးခြင်းဖြင့် အနာကျက်ခြင်းကို မြန်ဆန်စေသည်။
ဆရာဝန်နှင့် ချိန်းဆိုထားသည့်အတိုင်း ပြန်လည်ပြသပါ

အရိုးအဆစ်အစားထိုးပစ္စည်းများ၏ အနာဂတ် (The Future of Orthopaedic Implants)

ဆေးဘက်ဆိုင်ရာ သိပ္ပံပညာသည် လျင်မြန်စွာ တိုးတက်နေသည်နှင့်အမျှ အရိုးခွဲစိတ်ဆိုင်ရာ အစားထိုးပစ္စည်းအသစ်များသည် အောက်ပါအရည်အသွေးများနှင့် ပြည့်စုံလာနေသည်။

ပိုမိုပေါ့ပါးပြီး ပိုမိုခိုင်ခံ့လာခြင်း
ခန္ဓာကိုယ်နှင့် ပိုမိုလိုက်လျောညီထွေရှိလာခြင်း
သုံးဖက်မြင်ပုံနှိပ်ခြင်းနည်းပညာ (3D printing) ကို အသုံးပြု၍ စိတ်ကြိုက်ပုံစံ ထုတ်လုပ်နိုင်ခြင်း
ရောဂါပိုးဝင်ခြင်းကို လျှော့ချရန်နှင့် အနာကျက်နှုန်းကို မြန်စေရန်အတွက် အထူးပစ္စည်းများဖြင့် အပေါ်ယံအလွှာကို ဖုံးအုပ်လာခြင်း
ဇီဝပျော်ဝင်နိုင်သော ပစ္စည်းများ (biodegradable materials) ဖြင့် ပြုလုပ်ထားပြီး အရိုးဆက်ပြီးနောက် သဘာဝအတိုင်း ပျော်ဝင်သွားသောကြောင့် ထပ်မံဖယ်ထုတ်ရန် ခွဲစိတ်မှု မလိုအပ်တော့ခြင်း

ဇီဝပျော်ဝင်နိုင်သော အရိုးရောဂါဆိုင်ရာ အစားထိုးစ္စည်းများသည် ကလေးလူနာများနှင့် သေးငယ်သော အရိုးကျိုးခြင်းများတွင် အသုံးဝင်သည့် တီထွင်ဆန်းသစ်မှုတစ်ရပ်ဖြစ်ပြီး ရေရှည်တွင် ပိုမိုဘေးကင်းကောင်းမွန်သော ရလဒ်များကို ပေးစွမ်းနိုင်သည်။

References:

WebMD. (n.d.). What is ORIF surgery? Retrieved July 22, 2025, from https://www.webmd.com/a-to-z-guides/what-is-orif-surgery?utm_source=chatgpt.com
American Academy of Orthopaedic Surgeons. (n.d.). Internal fixation for fractures. Retrieved July 22, 2025, from https://orthoinfo.aaos.org/en/treatment/internal-fixation-for-fractures/
Azar, F. M., Beaty, J. H., & Canale, S. T. (Eds.). (2021). Internal fixation for fractures. In Campbell’s operative orthopaedics (14th ed., pp. 317–447). Philadelphia, PA: Elsevier.

Published: 30 July 2025