Tummy time (ကလေးငယ်အား ဝမ်းလျားမှောက်လေ့ကျင့်ပေးခြင်း)

ဝမ်းလျားမှောက်လေ့ကျင့်ပေးခြင်း (Tummy time) ဆိုသည်မှာ မွေးကင်းစ မှ လသားအရွယ် ကလေးငယ်များ အိပ်ရာနိုးနေသည့်အချိန်များတွင် အချိန်အတိုင်းအတာတစ်ခုအထိ ဝမ်းလျားမှောက်ပေးထား၍ လေ့ကျင့်ပေးခြင်းကို ဆိုလိုသည်။ ကလေးငယ်များသည် မွေးစတွင် လူကြီးမိဘများ၏ လက်ပေါ်၊ ပုခက်ပေါ်နှင့် အိပ်ရာပေါ်တွင် ပက်လက်နေရသည့်အချိန်က ပိုမိုများပြားသည်။ ပုံမှန်အားဖြင့် အသက် (၄) လကျော်၊ (၅) လခန့်မှသာ ကလေးအများစုသည် မိမိဘာသာ ဝမ်းလျားမှောက်နိုင်ကြသည်။

ထိုသို့ကလေးကိုယ်တိုင် ဝမ်းလျားမမှောက်နိုင်သေးခင် မိဘများမှ မွေးကင်းစအရွယ်ကတည်းက ကြိုတင်လေ့ကျင့်ပေးခြင်းကို ဝမ်းလျားမှောက်လေ့ကျင့်ခြင်းဟု ခေါ်သည်။ ထိုသို့လေ့ကျင့်ပေးခြင်းသည် ကလေးငယ်များ၏ ဖွံ့ဖြိုးတိုးတက်မှုအတွက် အလွန်အ‌ရေးပါပြီး အကျိုးရှိသော အလေ့အကျင့်ဖြစ်သည်။

ဝမ်းလျားမှောက်လေ့ကျင့်ခြင်း၏ အကျိုးကျေးဇူးများ

ဝမ်းလျားမှောက်လေ့ကျင့်ချိန် (Tummy Time) သည် ကလေးငယ်၏ဘဝတွင် ပထမဆုံးလေ့ကျင့်ခန်းအဖြစ် သတ်မှတ်နိုင်သည်။ ဝမ်းလျားမှောက်လေ့ကျင့်ခြင်းသည် လွယ်ကူရိုးရှင်းသော်လည်း ကလေးငယ်အပေါ် ကြီးမားသော အကျိုးသက်ရောက်မှု များစွာရှိသည်။

1. ကြွက်သားများ သန်မာမှုနှင့် ကိုယ်ကာယ လှုပ်ရှားမှုပိုင်းဆိုင်ရာ ဖွံ့ဖြိုးတိုးတက်မှုကို အထောက်အကူပြုခြင်း (Build Strong muscle and Motor development)
   ဝမ်းလျားမှောက် လေ့ကျင့်ချိန်တွင် ကလေးငယ်များသည် ခေါင်းကိုမော့၍ လက်ကိုအားပြုထားသောကြောင့် ကျော၊ လည်ပင်း၊ ကျောရိုးနှင့် လက်များရှိ ကြွက်သားများကို သန်မာလာစေသည်။ သို့ဖြစ်၍ နောက်ပိုင်းတွင် ခေါင်းထောင်ခြင်း၊ မှောက်ခြင်း၊ ပြန်လှန်ခြင်း၊ လေးဘက်သွားခြင်းစသည့် ကိုယ်ကာယလှုပ်ရှားမှုများအတွက် အသုံးပြုမည့် ကြွက်သားများဖွံ့ဖြိုးမှုကို ပိုမိုတိုးတက်လာစေနိုင်သကဲ့သို့ မိမိကိုယ်ကို ယုံကြည်မှုလည်း ပိုမိုရရှိလာနိုင်မည်ဖြစ်သည်။
2. ကလေး၏ ဦးခေါင်းနှင့် လည်ပင်းပုံသဏ္ဌာန်ဆိုင်ရာ ပြဿနာများကို လျှော့ချပေးခြင်း (Reduce head and neck issues)
   ပက်လက်ပုံစံဖြင့်သာ အနေများသော ကလေးငယ်များတွင် ဦး‌ခေါင်းအနောက်ဘက်ပိုင်း ပြားနေခြင်း (Positional plagiocephaly or brachycephaly) ဖြစ်လာနိုင်သည်။ များသောအားဖြင့် ယာယီသာဖြစ်ပြီး အန္တရာယ်မရှိတတ်ပေ။ တောက်လျှောက် ပက်လက်မထားဘဲ မကြာခဏ ဝမ်းလျားမှောက် လေ့ကျင့်ပေးခြင်းဖြင့် ထိုသို့ဦးခေါင်းပြားခြင်းကို ကာကွယ်နိုင်သည်။ မွေးရာပါ ခေါင်း သို့မဟုတ် လည်ပင်း စောင်းနေသော ကလေးများ (Torticollis) အတွက်လည်း အသုံးဝင်သော လေ့ကျင့်ကုသမှုတစ်ခုဖြစ်သည်။
3. ကလေးငယ်၏ အာရုံခံစားမှုများကို ဖွံ့ဖြိုးစေခြင်း (Promotes Sensory development)
   ဝမ်းလျားမှောက် လေ့ကျင့်ခြင်းသည် ကလေးများအား မတူညီသော ခန္ဓာကိုယ်အနေအထားနှင့် လှုပ်ရှားမှုများကို ခံစားနိုင်စေပြီး ခြေလက်များ ရွေ့လျားပုံကို စတင်သိရှိလာစေနိုင်သည်။ ထို့အပြင် ကလေးငယ်များ၏ အမြင်အာရုံဖွံ့ဖြိုးမှုနှင့် ပတ်ဝန်းကျင် စူးစမ်းလေ့လာမှုအတွက်လည်း အကျိုးရှိစေသည်။
4. မိဘများအပေါ် သိရှိခင်တွယ်မှုနှင့် ရင်းနှီးမှု ပိုများလာစေခြင်း (Bonding time)
   ဝမ်းလျားမှောက် လေ့ကျင့်နေစဥ်အတွင်း မိဘများသည် က‌လေးငယ်ကို တစ်ဦးတည်း လွှတ်မထားဘဲ အမြဲအနားတွင် စောင့်ကြည့်ပေးရမည်။ ထိုသို့ စောင့်ကြည့်နေစဥ် ကလေးငယ်အား ချော့မြူပေးခြင်း၊ စကားပြောပေးခြင်း၊ စာဖတ်ပြခြင်း၊ ကစားပြခြင်း စသည်တို့ကို ပြုလုပ်ပေးခြင်းဖြင့် ကလေးငယ်များ၏ အမြင်နှင့်အကြားစွမ်းရည်များ ဖွံ့ဖြိုးလာသည်နှင့်အမျှ ကလေးငယ်များသည် ပိုမိုပျော်ရွှင်တက်ကြွလာမည် ဖြစ်သည်။

ဝမ်းလျားမှောက်လေ့ကျင့်ခြင်း စတင်လေ့ကျင့်သင့်သည့် အသက်အရွယ်

ဝမ်းလျားမှောက် လေ့ကျင့်ခြင်းကို မွေးကင်းစ ရက်သားအရွယ်မှစပြီး နေ့စဉ်ပြုလုပ်ပေးနိုင်သည်။ သို့သော် မိဘတစ်ဦးဦးမှ အနီးကပ် ကြီးကြပ်စောင့်ကြည့်ရန် လိုအပ်သည်။ အကြောင်းမှာ လည်ပင်းနှင့် ခေါင်းကြွက်သားများ သန်မာမှုမရှိသေးသဖြင့် ခေါင်းစောင်းသွားချိန် သို့မဟုတ် မျက်နှာဖြင့် မှောက်နေချိန်တွင် နှာခေါင်းနှင့် ပါးစပ်များကို ပိတ်မိသကဲ့သို့ဖြစ်ကာ အသက်ရှူရပ်နိုင်သောကြောင့်ဖြစ်သည်။

သို့ရာတွင် ပေါင်မပြည့်၊ လမစေ့ဘဲ မွေးဖွားသော ကလေးများ၊ မွေးရာပါ အာရုံကြောနှင့် ကြွက်သားဆိုင်ရာ ရောဂါအခြေအနေရှိသော ကလေးများနှင့် စားချဥ်ရည်ပြန်လက္ခဏာများရှိသော ကလေးများတွင် ဝမ်းလျားမှောက်လေ့ကျင့်ခြင်းသည် လုံခြုံစိတ်ချမှု မရှိနိုင်သဖြင့် ထိုကလေးများတွင် မလေ့ကျင့်သင့်ပေ။

ဝမ်းလျားမှောက် လေ့ကျင့်ခြင်း လေ့ကျင့်သင့်သည့်အချိန်

• အကောင်းဆုံးအချိန်မှာ ကလေးငယ် ကောင်းစွာနိုးနေပြီး လန်းလန်းဆန်းဆန်း ဖြစ်နေချိန်ဖြစ်သည်
• နို့တိုက်ပြီးခါစ သို့မဟုတ် အစာကျွေးပြီးခါစ အချိန်မျိုးတွင် မလုပ်သင့်ပါ၊ အနည်းဆုံး မိနစ် (၃၀) ခန့်ခြားပြီးမှ ပြုလုပ်ပေးသင့်သည်
• အိပ်နေသောအချိန်တွင်လည်း မလုပ်သင့်ပါ၊ ထို့ပြင် ဝမ်းလျားမှောက် လေ့ကျင့်နေစဥ် ကလေး အိပ်ငိုက်လာလျှင်လည်း လေ့ကျင့်ခြင်းကို ရပ်သင့်သည်
• ကလေးများသည် ဝမ်းလျားမှောက်ခြင်း စတင်လေ့ကျင့်ခါစတွင် သက်တောင့်သက်သာ မဖြစ်သော‌ကြောင့် အီခြင်း၊ ငိုခြင်းများ ရှိနိုင်သော်လည်း ချက်ချင်း ရပ်မပစ်ရပါ၊ ကလေးနှင့်အတူ လှဲလျောင်းခြင်း၊ ဂျောက်ဂျက်ကဲ့သို့ အသံမြည်သော ကစားစရာလေးများ ပြခြင်းဖြင့် အာရုံပြောင်းအောင် ပြုလုပ်ပေးနိုင်သည်
• မွေးကင်းစအရွယ် အစောပိုင်းတွင် အချိန် (၁) မိနစ်၊ (၂) မိနစ်ခန့်နှင့်သာ စတင်သင့်ပြီး တဖြည်းဖြည်း (၁၀)မိနစ် မှ (၁၅)မိနစ်ထိကြာအောင် ထားနိုင်သည်
• အသက်သုံးလနောက်ပိုင်းမှစ၍ တစ်ကြိမ်လျှင် (၁၅) မိနစ်၊ တစ်နေ့လျှင် (၃)ကြိမ် မှ (၄)ကြိမ်အထိ လေ့ကျင့်ပေးနိုင်သည်၊ စုစုပေါင်း အချိန်တစ်နာရီခန့် ပြုလုပ်ပေးနိုင်သည်
• ကလေးတစ်ယောက်နှင့် တစ်ယောက် ထပ်တူမတူညီနိုင်ချေ၊ အကြောင်းမှာ ဦးခေါင်း အနည်းငယ်ကြီးသော ကလေးများနှင့် ပေါင်မပြည့် လမစေ့ မွေးဖွားသော ကလေးများတွင် ပို၍ခက်ခဲတတ်ပြီး အချိန်ပိုပေးရသောကြောင့်ဖြစ်သည်

ဝမ်းလျားမှောက်လေ့ကျင့်ခြင်း ပုံစံများ

မွေးကင်းစအရွယ်မှ အသက် (၂) လခန့်အထိ မိခင် သို့မဟုတ် ဖခင်၏ ရင်ဘတ်ပေါ်တွင်ဖြစ်စေ၊ ဗိုက်ပေါ်တွင်ဖြစ်စေ တင်ထားပြီး စတင်လေ့ကျင့်နိုင်သည်။ အစပိုင်းတွင် စောင်ခေါက်ဖြစ်စေ၊ ခေါင်းအုံးအပါးဖြစ်စေ ကလေး၏ ရင်ဘတ်အောက်တွင် ခုထားပေးနိုင်သည်။

အသက် (၂)လ မှ (၄)လခန့်တွင် လူကြီး လက်မောင်းပေါ်တွင်ဖြစ်စေ၊ ပေါင်ပေါ်တွင်ဖြစ်စေ ထား၍ လေ့ကျင့်ပေးနိုင်သည်။ ဦးခေါင်း စတင်ခိုင်စပြုသော အသက်အရွယ် ဖြစ်သောကြောင့် ပို၍ကြာကြာ လေ့ကျင့်ပေးနိုင်သည်။

အသက် (၄) လနှင့် (၆) လကြားတွင်မူ ကလေးသည် သူ့အလိုလို မှောက်တတ်လာမည် ဖြစ်သောကြောင့် ကြမ်းပြင်ပေါ်တွင် ဖျာ သို့မဟုတ် အိပ်ရာခင်း ခင်းထားပြီး လေ့ကျင့်ပေးခြင်းဖြင့် ပိုမိုအဆင်ပြေလာနိုင်သည်။ ဦးခေါင်းကောင်းစွာခိုင်သည့်အပြင် တံတောင်ဆစ်နှင့် လက်ဖဝါးကို အားပြု၍ ထောက်လာနိုင်ခြင်း၊ မှောက်လျက်နှင့် ပတ်ချာလည်လှည့်လာနိုင်ခြင်း၊ နောက်ပိုင်းတွင် ဝမ်းလျားမှောက် တွားသွားစပြုလာနိုင်ခြင်း စသည့်လှုပ်ရှားမှုများလည်း ဖွံ့ဖြိုးလာနိုင်သည်။

ဝမ်းလျားမှောက်လေ့ကျင့်ခြင်း ရပ်တန့်သင့်သည့် အသက်အရွယ်

ကလေးငယ်များ မိမိဘာသာ တွားသွားနိုင်သောအရွယ် [ပုံမှန်အားဖြင့် အသက် (၇)လ မှ (၉)လအရွယ်] အထိ လေ့ကျင့်ပေးနိုင်သည်။ လေးဘက်တွားသွားနိုင်ပြီဖြစ်သော ကလေးများတွင် လေ့ကျင့်ပေးရန် မလိုအပ်တော့ပါ။

ဝမ်းလျားမှောက်လေ့ကျင့်ခြင်း ပြုလုပ်နေစဥ် ဆောင်ရန်၊ ရှောင်ရန်များ

ဆောင်ရန်

• သန့်ရှင်းသော ကြမ်းပြင်ပေါ် ဖြစ်စေ၊ မွေ့ရာပေါ်တွင်ဖြစ်စေ၊ စောင်အထူပေါ်တွင်ဖြစ်စေ လေ့ကျင့်ပေးသင့်သည်
• ဝမ်းလျားမှောက်လေ့ကျင့်ခြင်းနှင့် တွဲ၍ ကလေးကို စကားပြောပေးခြင်း၊ သီချင်းဆိုပြခြင်း၊ အရုပ်များ၊ ပုံပြစာအုပ်များ ပြပေးခြင်း စသည်တို့လည်း ပူးတွဲပြုလုပ်ပေးနိုင်သည်

ရှောင်ရန်

ကလေးကို ကုတင်ပေါ် သို့မဟုတ် အမြင့်အနေအထား စသည်တို့တွင် မထားသင့်ပါ

• ကလေးကို စောင့်ကြည့်မည့် လူကြီးတစ်ဦးမျှ မရှိဘဲ တစ်ယောက်တည်း လွှတ်မထားသင့်ပါ
• တခြားကလေးများနှင့် အိမ်မွေးတိရစ္ဆာန်များ ရှိလျှင်လည်း သတိထားသင့်သည်

ဆေးရုံ၊ ဆေးခန်းပြသရန်

ဝမ်းလျားမှောက်လေ့ကျင့်ခြင်း ပြုလုပ်ပေးနေစဥ် မိမိကလေးတွင် အောက်ပါလက္ခဏာများ တွေ့ရှိရပါက မိသားစုဆရာဝန်၊ ကလေးဆရာဝန်များနှင့် ဆွေးနွေးတိုင်ပင်ရန် လိုအပ်သည်။

• ကလေးသည် အလွန်တောင့်တင်းနေသည် သို့မဟုတ် အလွန်ပျော့နေသည်ဟု ခံစားရခြင်း
• ကလေးသည် အသက် (၆)ပတ် မှ (၈) ပတ်ထိတိုင်အောင် ဝမ်းလျားမှောက် လေ့ကျင့်မှုတွင် တိုးတက်မှုမရှိခြင်း သို့မဟုတ် အဆင်မပြေခြင်း
• ကလေးသည် အသက် (၆) ပတ်သားအရွယ်တွင် မိခင်နှင့် မျက်လုံးချင်းဆုံ၍ မကြည့်နိုင်ခြင်း သို့မဟုတ် ပတ်ဝန်းကျင်နှင့် အရုပ်များကို စိတ်ဝင်စားမှု မရှိခြင်း
• ကလေးသည် ကိုယ်ခန္ဓာ ဘယ်ညာနှစ်ဖက်စလုံးကို တစ်ပြိုင်နက်တည်း မလှုပ်ရှားနိုင်ခြင်း
• ကလေး၏ ဦးခေါင်းပုံသဏ္ဌာန်မမှန်ခြင်း သို့မဟုတ် မညီညာခြင်း စသည်တို့ သတိပြုမိပါက ဆရာဝန်နှင့် ဆွေးနွေးရန် လိုအပ်သည်။

References:

1. KidsHealth. (n.d.). Tummy time. Retrieved June 4, 2025, from https://kidshealth.org/en/parents/tummy-time.html#:~:text=Tummy%20time%20is%20laying%20babies%20on%20their%20stomachs%20for%20brief
2. The Royal Children’s Hospital Melbourne. (2020). Tummy time for your baby [Fact sheet]. Retrieved June 4, 2025, from https://www.rch.org.au/kidsinfo/fact_sheets/Tummy_time_for_your_baby/#:~:text=Tummy%20time%20involves%20placing%20your%20baby%20on%20their%20stomach%20when
3. Healthline. (n.d.). Tummy time: What it is & how to start it. Retrieved June 4, 2025, from https://www.healthline.com/health/parenting/tummy-time#:~:text=Tummy%20time%20is%20when%20your%20baby%20is%20awake%20and%20placed
4. Cleveland Clinic. (2025). Tummy time: What it is and 6 major benefits. Retrieved June 4, 2025, from https://health.clevelandclinic.org/tummy-time-benefits

Published: 30 August 2024

Last updated: 27 October 2025