Hepatoblastoma (အသည်းသန္ဓေသားဆဲလ်မှဖြစ်သောကင်ဆာ)

အသည်းသန္ဓေသားဆဲလ်မှဖြစ်သောကင်ဆာ (Hepatoblastoma) သည် ကလေးအသည်းကင်ဆာများတွင် အဖြစ်အများဆုံး အမျိုးအစား ဖြစ်သည်။ အသက် (၃) နှစ်အောက် ကလေးများတွင် ပို၍တွေ့ရှိရသည်။ ကောင်းစွာ ရင့်ကျက်ခြင်းမရှိသော အသည်းသန္ဓေသားဆဲလ်များ (Hepatoblast) မှ ဖြစ်ပွါးသော ကင်ဆာအကျိတ်ဖြစ်ပြီး အများအားဖြင့် အသည်း၏ ညာဘက်အခြမ်းတွင် ပိုဖြစ်ကြောင်း တွေ့ရှိရသည်။ အဆိုပါ ကင်ဆာဆဲလ်များသည် အခြားသောခန္ဓာကိုယ် အစိတ်အပိုင်းများသို့ ပျံ့နှံ့နိုင်ပြီး အဆုတ်သို့ ပျံ့နှံ့မှုမှာ အများဆုံးဖြစ်သည်။ လူဖြူလူမျိုးများတွင် ပို၍ဖြစ်ပွါးပြီး ယောကျာ်းလေးများတွင် မိန်းကလေးများထက် ပိုဖြစ်နိုင်ကြောင်း တွေ့ရှိရသည်။ ကင်ဆာအကျိတ်ကို စောစီးစွာ စစ်ဆေးတွေ့ရှိပါက ခွဲစိတ်၍ ကုသနိုင်သည်။ အကျိတ်၏ အရွယ်အစားနှင့် တည်နေရာမှာ ခွဲစိတ်ကုသရန် မဖြစ်နိုင်ပါက အသည်းအစားထိုး၍ ကုသနိုင်သည်။

အသည်းသည် ခန္ဓာကိုယ်တွင် အကြီးဆုံးသော ကိုယ်အင်္ဂါအစိတ်အပိုင်းတစ်ခုဖြစ်သည်။ အသည်းကို ညာအခြမ်းနှင့် ဘယ်အခြမ်းဟူ၍ (၂) ခြမ်းရှိပြီး အသည်း၏ညာအခြမ်းသည် ဝမ်းဗိုက်အပေါ်ပိုင်း ညာဘက် (Right hypochondrium) နေရာတွင် တည်ရှိပြီး တစ်စိတ်တစ်ပိုင်းသည် နံရိုးအောက်တွင်ရှိသည်။ အသည်း၏ဘယ်အခြမ်းသည် ဝမ်းဗိုက်အပေါ်ပိုင်း၏ အလယ်နေရာ (Epigastrium) တွင်တည်ရှိသည်။ အသည်းသည် အစာစားခြင်းမှ ရရှိသော အဆီဓာတ်များကို ချေဖျက်ရန် သည်းခြေ‌‌ရည်များကို ထုတ်လုပ်သည်။ ထို့ပြင် ခန္ဓာကိုယ်အတွက် စွမ်းအင်အဖြစ် အသုံးပြုသော ဂလိုင်ကိုဂျင်သကြားဓာတ်ကို သိုလှောင်ရန်နှင့် သွေးထဲမှ အန္တရာယ်ရှိသော ပစ္စည်းများကို ဆီးနှင့် ဝမ်းမှတစ်ဆင့် စွန့်ထုတ်ရန် ပြုလုပ်ပေးသည်။

ဖြစ်ပေါ်ရသောအကြောင်းရင်းများ

အသည်းသန္ဓေသားဆဲလ်မှဖြစ်သောကင်ဆာကို ဖြစ်ပွါးစေသော တိကျသည့် အကြောင်းအရင်းကို မသိရှိပါ။ သို့သော် အောက်ပါအခြေအနေများရှိသော ကလေးများတွင် အသည်းသန္ဓေသားဆဲလ်မှဖြစ်သော ကင်ဆာပို၍ ဖြစ်ပွါးသည်ကို တွေ့ရှိရသည်။

• ပေါင်မပြည့်ဘဲ မွေးသောကလေးများ (၅ ပေါင် ၅ အောင်စအောက်)
• လမစေ့ဘဲမွေးသော ကလေးများ
• အသည်းတွင် ဂလိုင်ကိုဂျင်သကြားဓာတ် စုပုံသော မွေးရာပါ အသည်းရောဂါ (Glycogen storage disease)
• အချို့သော မျိုးဗီဇလက္ခဏာစုများ
  • Beckwith-Wiedemann ရောဂါလက္ခဏာစု
  • Aicardi ရောဂါလက္ခဏာစု
  • Edwards ‌ရောဂါလက္ခဏာစု
  • ခန္ဓာကိုယ်တစ်ခြမ်း ကြီးထွားမှုလွန်ကဲခြင်း (Hemihypertrophy)
  • မွေးရာပါသည်းခြေပြွန်​ ကောင်းစွာမဖွံ့ဖြိုးဘဲ ပိတ်​နေခြင်း (Biliary atresia)
  • အူမကြီးထဲတွင် ကင်ဆာအကြိုအသားပိုများ ရှိခြင်း (Familial adenomatous polyposis – FAP)

အသည်းသန္ဓေသားဆဲလ်မှဖြစ်သောကင်ဆာအပြင် ကလေးများတွင် တွေ့ရနိုင်သော အခြားအသည်းကင်ဆာများမှာ _

• အသည်းဆဲလ်ကင်ဆာ (Hepatocellular carcinoma)
  ကလေးကြီးများနှင့် ဆယ်ကျော်သက်များတွင် ဖြစ်ပွါးလေ့ရှိပြီး အများအားဖြင့် အသက် (၁၂ – ၁၄) နှစ်ဝန်းကျင်တွင် တွေ့ရှိရသည်။ ကလေးငယ်များတွင်မူ ဖြစ်ပွါးလေ့မရှိပါ။
• Fibrolamellar hepatocellular carcinoma (FLC)
  ဆယ်ကျော်သက်များနှင့် အသက် (၄၀) အောက် လူကြီးများတွင် တွေ့ရလေ့ရှိသော ရှားပါးသည့် အသည်းကင်ဆာအမျိုးအစားဖြစ်သည်။
• Undifferentiated embryonal sarcoma of the liver (UES)
  အများအားဖြင့် အသက် (၅)နှစ် မှ (၁၀)နှစ်ကြား ကလေးများတွင် ဖြစ်ပွါးသော ရှားပါးသည့် အသည်းကင်ဆာအမျိုးအစားဖြစ်သည်။

ရောဂါလက္ခဏာများ

ကင်ဆာအကျိတ်၏ အရွယ်အစားနှင့် အခြားကိုယ်အင်္ဂါ အစိတ်အပိုင်းများသို့ ပျံ့နှံ့မှု ရှိမရှိ ပေါ်မူတည်၍ တွေ့ရှိရသော ရောဂါလက္ခဏာများမှာ ကွဲပြားနိုင်သည်။ အတွေ့ရများသော လက္ခဏာများမှာ_

• ဝမ်းဗိုက်နာကျင်ခြင်း
• ဝမ်းဗိုက်ညာဘက် အပေါ်ပိုင်းတွင် အလုံးစမ်းမိခြင်း
• ဝမ်းဗိုက်ဖောင်းလာခြင်း
• အစားစားချင်စိတ်မရှိခြင်း
• အကြောင်းရင်းမရှိဘဲ ကိုယ်အလေးချိန် မတက်ခြင်း
• ပျို့အန်ခြင်း
• အရေပြားယားယံခြင်း
• မျက်လုံးနှင့် အသားဝါခြင်း
• သွေးအားနည်းခြင်းကြောင့် အသားရောင် ဖြူဖပ်ဖြူရော်ဖြစ်ခြင်း
• ကင်ဆာအကျိတ်မှ ထွက်လာသော ဟော်မုန်းများကြောင့် အရွယ်မတိုင်မီ လူပျိုဖော်၊ အပျိုဖော်ဝင်သော လက္ခဏာများပြခြင်း စသည်တို့ဖြစ်ကြသည်။

နောက်ဆက်တွဲပြဿနာများ

နောက်ဆက်တွဲပြဿနာများသည် အကျိတ်ကြောင့်သော်လည်း‌ကောင်း၊ ကုသမှုကြောင့်သော်လည်းကောင်း ဖြစ်ပေါ် နိုင်သည်။ ၎င်းတို့မှာ _

• ခွဲစိတ်မှုကြောင့် ရောဂါပိုးဝင်ရောက်ခြင်းနှင့် သွေးထွက်လွန်ခြင်း
• ကင်ဆာဆေးသွင်းကုသခြင်းကြောင့် ရောဂါပိုးဝင်ရောက်မှု ပိုများလာခြင်း၊ သွေးခြည်ဥလွယ်ခြင်းနှင့် သွေးထွက်လွန်ခြင်း၊ အန်ခြင်း၊ ဝမ်းလျှောခြင်း၊ ဆံပင်ကျွတ်ခြင်းနှင့် အားနည်းခြင်း
• ကြီးထွားဖွံ့ဖြိုးမှုဆိုင်ရာ ပြဿနာများ
• နှလုံး၊ ကျောက်ကပ် သို့မဟုတ် အဆုတ်ဆိုင်ရာ ပြဿနာများ
• အသည်းစွမ်းဆောင်ရည်ဆိုင်ရာ ပြဿနာများ
• အခြားကိုယ်အင်္ဂါ အစိတ်အပိုင်းများသို့ ကင်ဆာပျံ့နှံ့ခြင်း
• ကင်ဆာပြန်ဖြစ်ခြင်း
• ကင်ဆာအသစ်များ ထပ်မံဖြစ်ပေါ်လာခြင်း
• အသည်းအစားထိုး ခွဲစိတ်ကုသမှု ပြုလုပ်ထားပါက အစားထိုးလိုက်သည့်အသည်းကို ခန္ဓာကိုယ်မှ လက်မခံဘဲ တိုက်ထုတ်ခြင်း
• ခုခံအားကျစေသော ဆေးဝါးများကြောင့် ဖြစ်ပေါ်လာသော ပြဿနာများ စသည်တို့ဖြစ်သည်။

ဆေးရုံ၊ ဆေးခန်းပြသရန်

အထက်ပါ ရောဂါလက္ခဏာများကို သတိပြုမိပါက မိသားစုဆရာဝန်နှင့် ပြသတိုင်ပင်ရန်လိုသည်။ မိသားစုဆရာဝန်မှ လိုအပ်သည့် စစ်ဆေးစမ်းသပ်မှုများ ပြုလုပ်ခြင်း၊ ဓာတ်ခွဲစစ်ဆေးခြင်း၊ ဓာတ်မှန်ရိုက်ခြင်းစသည်တို့ဖြင့် ရောဂါရှာ‌ဖွေပေးနိုင်သည်။ လိုအပ်ပါက မိသားစုဆရာဝန်မှ သက်ဆိုင်ရာ ကလေးအထူးကုဆရာဝန်များ၊ ကလေးကင်ဆာအထူးကုဆရာဝန်များနှင့် တိုင်ပင်ကုသခြင်း၊​ လွှဲပြောင်းကုသခြင်းများ ပြုလုပ်ပေးလိမ့်မည်။

ရောဂါရှာဖွေခြင်း

အသည်းသန္ဓေသားဆဲလ်မှဖြစ်သောကင်ဆာကို ရှာဖွေရန်အတွက် သက်ဆိုင်ရာ အထူးကုဆရာဝန်မှ ရောဂါရာဇဝင်မေးမြန်းခြင်း၊ အသေးစိတ် ခန္ဓာကိုယ်စမ်းသပ်စစ်ဆေးခြင်းများအပြင် လိုအပ်သည့် စစ်ဆေးခြင်းများ ပြုလုပ်မည်။

1. ဓာတ်ခွဲစစ်ဆေးခြင်း
   • သွေးနီဥ၊ သွေးဖြူဥနှင့် သွေးဥမွှားပမာဏ စစ်ဆေးခြင်း (Complete Blood Count – CBC)
   • အသည်းစွမ်းဆောင်ရည် စစ်ဆေးခြင်း
   • သွေးခဲဓာတ်စစ်ဆေးခြင်း
   • Alpha-fetoprotein (AFP) စစ်ဆေးခြင်း
   • ကျောက်ကပ်လုပ်ငန်းစစ်ဆေးခြင်း
   • မျိုးဗီဇစစ်ဆေးခြင်း စသည်တို့ကို ပြုလုပ်သည်။
2. ပုံရိပ်ဖော်စစ်ဆေးခြင်း
   • ဝမ်းဗိုက် အာထရာဆောင်း (USG abdomen) ရိုက်ခြင်း
     အသည်းအနေအထားကို ကြည့်ရှုရန် ပထမဆုံးအသုံးပြုသော စစ်ဆေးခြင်းဖြစ်သည်။
   • ရင်ဘတ်ဓာတ်မှန် (CXR) ရိုက်ခြင်း
     အဆုတ်သို့ ကင်ဆာပျံ့နှံ့ခြင်း ရှိမရှိ စစ်ဆေးနိုင်သည်။
   • ဝမ်းဗိုက်ကွန်ပျူတာဓာတ်မှန် (CT scan) ရိုက်ခြင်း
     ကိုယ်တွင်းအင်္ဂါ အစိတ်အပိုင်းများကို အသေးစိတ်ကြည့်ရှု စစ်ဆေးနိုင်သည်။ အသည်းရှိ အကျိတ်ကို အသေးစိတ်သိရှိနိုင်ပြီး အခြားကိုယ်တွင်းအင်္ဂါများသို့ ပျံ့နှံ့ခြင်းရှိမရှိကိုလည်း သိနိုင်သည်။
   • သံလိုက်ဓာတ်မှန် (MRI) ရိုက်ခြင်း
     ပိုမိုအသေးစိတ်သော ပုံရိပ်များကို သိရှိနိုင်ပြီး ကင်ဆာသည် အသည်းအနီးရှိ အဓိကသွေးကြောများအတွင်း ဝင်ရောက်ခြင်း ရှိမရှိကို သိရှိနိုင်သည်။
3. အသားစယူ စစ်ဆေးခြင်း (Biopsy)
   အကျိတ်မှ အသားစကိုယူ၍ ကင်ဆာဆဲလ် ရှိမရှိ ကို အဏုကြည့်မှန်ပြောင်းဖြင့် ရှာ‌ဖွေစစ်ဆေးခြင်း ဖြစ်သည်။ အသည်းကင်ဆာ ဟုတ်မဟုတ် အတည်ပြုစစ်ဆေးခြင်း ဖြစ်သည်။ အသားစယူစစ်ဆေးခြင်းကို အပ်ဖြင့်ဖြစ်စေ၊ ခွဲစိတ်၍ ဖြစ်စေ ပြုလုပ်နိုင်သည်။
4. ကင်ဆာအဆင့် သတ်မှတ်ခြင်း
   ကင်ဆာအဆင့် သတ်မှတ်ရာတွင် သက်ဆိုင်ရာ အထူးကုဆရာဝန်သည် အသည်းသန္ဓေသားဆဲလ်မှဖြစ်သောကင်ဆာ ဟုအတည်ပြုစစ်ဆေးပြီးပါက အကျိတ်တည်နေရာပေါ် မူတည်၍ အုပ်စု (၂) စုခွဲသည်။
   • PRETEXT (pre-treatment extent of disease)
     ခွဲစိတ်ခြင်း မပြုလုပ်မီနှင့် ကင်ဆာဆေးသွင်းကုသခြင်း မပြုလုပ်မီ အသည်းတွင် အကျိတ်မည်မျှအထိ ပျံ့နှံ့နေကြောင်းကို ရည်ညွှန်းသည်။ အကျိတ်အရေအတွက်၊ အကျိတ် အရွယ်အစားနှင့် ပုံသဏ္ဌာန်ကိုလည်း စစ်ဆေးသည်။
   • POSTTEXT (post-treatment extent of disease)
     ကင်ဆာဆေးသွင်းကုသမှု ခံယူပြီးနောက် ခွဲစိတ်ခြင်း မပြုလုပ်မီ ရောဂါပျံ့နှံ့နေမှုကို ရည်ညွှန်းသည်။

အသည်းတစ်ခုတွင် အခြမ်း (၂) ခြမ်းရှိသည်။ ထိုအခြမ်း (၂) ခြမ်းကို အလျားလိုက် အပိုင်း (၄) ပိုင်းအဖြစ် ပိုင်းခြားသည်။ အဆိုပါ အုပ်စုတစ်ခုစီကို အကျိတ်ပါရှိသော အသည်းအစိတ်အပိုင်းအရေအတွက်ဖြင့် ခွဲခြားသတ်မှတ်သည်။ အကျိတ်ပါဝင်သော အပိုင်းများများလေ အုပ်စုနံပါတ် ပိုမြင့်လေဖြစ်သည်။ ဥပမာအားဖြင့် စစ်ဆေးမှုများအရ အသည်း၏ မတူညီသော အပိုင်း (၂) ပိုင်းတွင် အကျိတ်နှစ်ခုတွေ့ရှိပါက ကင်ဆာသည် PRETEXT အုပ်စု (၂) တွင်ရှိသည်။ ခွဲစိတ်ခြင်း မပြုလုပ်မီ ကင်ဆာဆေးသွင်းကုသခြင်းဖြင့် အကျိတ်တစ်ခုကို ဖယ်ရှားလိုက်နိုင်ပါက ကင်ဆာသည် POSTEXT အုပ်စု (၁) ဖြစ်လာသည်။ ၎င်းအခြေအနေကို အထူးကုဆရာဝန်မှ အုပ်စု (၁) အသည်းသန္ဓေသားဆဲလ်မှဖြစ်သောကင်ဆာအဖြစ် သတ်မှတ်ကြောင်း ပြောပြမည် ဖြစ်သည်။

• အုပ်စု (၁)
  အသည်း၏ အပိုင်းတစ်ပိုင်းတွင်သာ အကျိတ်ရှိပြီး ကပ်လျက်ရှိသော ကျန်သုံးပိုင်းလုံးတွင် အကျိတ်မရှိသောအဆင့် ဖြစ်သည်။
• အုပ်စု (၂)
  ဤအုပ်စုတွင် အခြေအနေနှစ်မျိုးရှိသည်။
  • အသည်း၏ အပိုင်းတစ်ပိုင်းတွင် အကျိတ်ရှိပြီး ၎င်းနှင့်ကပ်လျက်ရှိသော နှစ်ပိုင်းတွင် အကျိတ်မရှိသောအဆင့်
    (သို့မဟုတ်)
  • အသည်း၏ အပိုင်းနှစ်ပိုင်းတွင် အကျိတ်များရှိပြီး ၎င်းတို့နှင့် ကပ်လျက်ရှိသော နှစ်ပိုင်းတွင် အကျိတ်မရှိသော အဆင့်ဖြစ်သည်
• အုပ်စု (၃)
  • အသည်း၏ အပိုင်းနှစ်ပိုင်း သို့မဟုတ် သုံးပိုင်းတွင် အကျိတ်ရှိသည်။ သို့သော် အကျိတ်ရှိသည့် အပိုင်းများနှင့် ကပ်လျက်ရှိသော အပိုင်းတွင် အကျိတ်မရှိပါ
• အုပ်စု (၄)
  • အသည်း၏ အပိုင်းလေးခုလုံးတွင် အကျိတ်ရှိသည်

ကုသခြင်း

အသည်းတစ်ရှူးသည် ၎င်း၏အစိတ်အပိုင်းတစ်ခုကို ခွဲစိတ်ဖယ်ရှားခြင်းပြုလုပ်ပါက ပြန်လည်ပွါးများ နိုင်သည်။ အသည်းသန္ဓေသားဆဲလ်မှဖြစ်သောကင်ဆာ ကုသမှုတွင် ကင်ဆာအကျိတ်ကို တတ်နိုင်သမျှ ခွဲစိတ်ဖယ်ရှားရန် လိုသည်။ ထို့ပြင် အသည်းသန္ဓေသားဆဲလ်မှဖြစ်သောကင်ဆာ အများစုသည် ခွဲစိတ်ကုသမှုမပြုမီ အကျိတ်အရွယ်အစား ကျုံ့သွားစေရန် ကင်ဆာဆေးသွင်းကုသခြင်းဖြင့် ကုသရန် လိုအပ်သည်။ ထိုသို့ပြုလုပ်ခြင်းဖြင့် အကျိတ်ကို ခွဲစိတ်ဖယ်ရှားရန် ပိုမိုလွယ်ကူသည်။ ထို့ပြင် ကင်ဆာပြန်ဖြစ်နိုင်ခြေကို လျှော့ချရန်အတွက် ခွဲစိတ်ပြီးနောက်တွင်လည်း ကင်ဆာဆေးသွင်းကုသရန် လိုအပ်နိုင်သည်။ အသည်းသန္ဓေသားဆဲလ်မှဖြစ်သောကင်ဆာ ကုသမှုသည် အသက်အရွယ်၊ ကင်ဆာအကျိတ်အရွယ်အစား၊ အရေအတွက်နှင့် ပျံ့နှံ့မှု ရှိမရှိတို့ပေါ်တွင် မူတည်သည်။

1. ခွဲစိတ်ကုသခြင်း
   ရောဂါရှာဖွေအတည်ပြုရန်အတွက် အကျိတ်မှအသားစယူရန် ခွဲစိတ်မှုလိုအပ်နိုင်သကဲ့သို့ ကင်ဆာအကျိတ်ကို ခွဲစိတ်ဖယ်ရှားရန် အတွက်လည်း ပြုလုပ်နိုင်သည်။ ခန္ဓာကိုယ်၏ အခြားနေရာများသို့ (ဥပမာ _ အဆုတ်) ပျံ့နှံ့နေသောအကျိတ်ကို ဖယ်ရှားရန်အတွက်လည်း ခွဲစိတ်ကုသမှု ပြုလုပ်နိုင်သည်။ ခွဲစိတ်ကုသပြီးနောက် အဖျားကြီးခြင်း၊ ခွဲထားသည့် နေရာမှ အလွန်အမင်းနာကျင်ခြင်း၊ အရောင်ပြောင်းခြင်းနှင့် အစိမ်းရောင် သို့မဟုတ် အဝါရောင် အရည်များ စိမ့်ထွက်ခြင်း ရှိပါက အရေးပေါ် ပြသရန် လိုအပ်သည်။
2. ကင်ဆာဆေးသွင်းကုသခြင်း (Chemotherapy)
   ကင်ဆာဆဲလ်များကို သေစေနိုင်သော ဆေးဝါးများဖြင့် ခွဲစိတ်ကုသမှုမပြုမီ သို့မဟုတ် ခွဲစိတ်ပြီးနောက် ကုသပေးနိုင်သည်။ ထိုဆေးများကို ထိုးဆေးအဖြစ် သို့မဟုတ် သောက်ဆေးအဖြစ် ပေးနိုင်သကဲ့သို့ အသည်းထဲသို့လည်း တိုက်ရိုက်ပေးနိုင်သည်။ အသည်းသွေးလွှတ်ကြောထဲသို့ ပြွန်ငယ်တစ်ခုထည့်သွင်း၍ ပြုလုပ်ခြင်းဖြစ်ပြီး ဤနည်းကို အသည်းသွေးလွှတ်ကြောမှတစ်ဆင့် ကင်ဆာဆေးသွင်း၍ သွေးကြောပိတ်ဆို့ကုသခြင်း (Chemoembolization of hepatic artery) ဟုခေါ်သည်။ အသည်းဆေးဖျန်းကုသခြင်းဟုလည်း လူသိများသည်။ ထိုဆေးကို အကျိတ်သို့ သွေးစီးဆင်းမှုကို ပိတ်ဆို့စေသည့် ဓာတ်ပစ္စည်း (Embolic agent) နှင့် ရောနှောထားသောကြောင့် အကျိတ်၏ ကြီးထွားမှုကို ရပ်တန့်စေသည်။
3. အသည်းအစားထိုးကုသခြင်း (Liver transplant)
   ကင်ဆာဆေးသွင်းကုသခြင်းနှင့် တွဲဖက်၍ အသုံးပြုနိုင်သည်။ အသည်းအစားထိုးကုသခြင်းကို ကင်ဆာအကျိတ်သည် အသည်းအတွင်းတွင်သာ ရှိပြီး ခွဲစိတ်ကုသမှုနှင့် ဖယ်ရှား၍ မရသော အခြေအနေများတွင် အသုံးပြုသည်။ အကျိတ်ပါသော အသည်းကို ခွဲစိတ်ဖယ်ရှားပြီး အလှူရှင်၏ အသည်းနှင့် အစားထိုးကုသခြင်း ဖြစ်သည်။ ထို့ပြင် ခုခံအားချဆေးဝါးများကို ရေရှည်သောက်သုံးရန် လိုအပ်သည်။
4. ဓာတ်ရောင်ခြည်ဖြင့် ကုသခြင်း (Radiation therapy)
   ဓာတ်ရောင်ခြည်ကို အသုံးပြု၍ ကင်ဆာဆဲလ်များကို သေစေရန် သို့မဟုတ် ကြီးထွားမှုကို ရပ်တန့်ရန် အသုံးပြုသည်။
5. ရေဒီယိုလှိုင်းဖြင့် ကုသခြင်း (Radiofrequency ablation therapy)
   စွမ်းအားမြင့် ရေဒီယိုလှိုင်းကို အသုံးပြု၍ ဆေးထိုးအပ်ဖြင့် အရေပြားမှတစ်ဆင့် သို့မဟုတ် ဝမ်းဗိုက်ကို ခွဲစိတ်၍ ကင်ဆာအကျိတ်ကို အပူပေးခြင်းဖြင့် ကင်ဆာဆဲလ်များကို သေစေခြင်းဖြစ်သည်။ နောက်တစ်ကြိမ်ပြန်၍ ဖြစ်ပွါးသော အသည်းသန္ဓေသားဆဲလ်မှဖြစ်သောကင်ဆာများကို ကုသရာတွင် အသုံးပြုသည်။
6. စဥ်ဆက်မပြတ် စောင့်ကြည့်စစ်ဆေးခြင်း
   အသည်းသန္ဓေသားဆဲလ်မှဖြစ်သောကင်ဆာ ကုသမှုသည်‌ ဆေးများ၏ ဘေးထွက်ဆိုးကျိုးများ ဖြစ်ပေါ် နိုင်သောကြောင့် ဂရုတစိုက် စောင့်ကြည့်ရန် လိုအပ်သည်။ နာကျင်သက်သာမှုများကို ထိန်းချုပ်ရန် အကိုက်အခဲပျောက်ဆေးများပေးခြင်း၊ ပျို့အန်ခြင်းများအတွက် အအန်ပျောက်ဆေးများပေးခြင်း၊ ရောဂါပိုးများဝင်ခြင်းမှ ကာကွယ်ရန် ပဋိဇီဝပိုးသတ်ဆေးများပေးခြင်းတို့ ပြုလုပ်ရမည်။ ထို့ပြင် ကုသမှုပြီးစီးသွားသည့်နောက်တွင်လည်း သက်ဆိုင်ရာ အထူးကုဆရာဝန်များနှင့် ပုံမှန်ဆက်လက်ပြသရန် လိုအပ်သည်။ ထိုသို့ပြသသည့်အချိန်တွင် ကင်ဆာပြန်ဖြစ်ပေါ်ခြင်း ရှိမရှိ၊ ကင်ဆာကုသမှုများကြောင့် ဖြစ်ပေါ်သော ဆိုးကျိုးများ ရှိမရှိကို စောင့်ကြည့်စစ်ဆေးမည် ဖြစ်သည်။

ကာကွယ်ခြင်း

အသည်းသန္ဓေသားဆဲလ်မှဖြစ်သောကင်ဆာ ဖြစ်ပေါ်ရသော တိကျသေချာသည့် အကြောင်းအရင်း မရှိသောကြောင့် ကာကွယ်၍ မရနိုင်ပါ။ သို့သော် ဖြစ်နိုင်ခြေများသော အခြေအနေရှိသူများတွင် ပုံမှန်ကျန်းမာရေးစစ်ဆေးခြင်းဖြင့် စောင့်ကြည့်သင့်သည်။ ကြိုတင်စစ်ဆေးခြင်းဖြင့် ရောဂါကို ကာကွယ်၍မရသော်လည်း ရောဂါလက္ခဏာများကို စောစီးစွာသတိထားမိပါက ဆရာဝန်နှင့် အမြန်ဆုံးတိုင်ပင်ဆွေးနွေး၍ ကုသမှု ခံယူနိုင်မည်ဖြစ်သည်။

References:

1. National Cancer Institute. (2025). Hepatoblastoma. NCI. Retrieved August 29, 2025, from https://www.cancer.gov/types/liver/childhood-liver-cancer/hepatoblastoma
2. Children’s Hospital of Philadelphia. (n.d.). Hepatoblastoma (liver cancer). CHOP. Retrieved August 29, 2025, from https://www.chop.edu/conditions-diseases/hepatoblastoma-liver-cancer
3. Cleveland Clinic. (n.d.). Hepatoblastoma (liver cancer). Cleveland Clinic. Retrieved August 29, 2025, from https://my.clevelandclinic.org/health/diseases/22168-hepatoblastoma-liver-cancer
4. St. Jude Children’s Research Hospital. (n.d.). Liver cancer: Hepatoblastoma. St. Jude. Retrieved August 29, 2025, from https://together.stjude.org/en-us/conditions/cancers/liver-cancer.html
5. Stanford Children’s Health. (n.d.). Hepatoblastoma in children. Stanford Children’s Health. Retrieved August 29, 2025, from https://www.stanfordchildrens.org/en/topic/default?id=hepatoblastoma-in-children-90-P02728
6. Cincinnati Children’s Hospital. (n.d.). Hepatoblastoma. Cincinnati Children’s Hospital. Retrieved August 29, 2025, from https://www.cincinnatichildrens.org/health/h/hepatoblastoma
7. KidsHealth. (n.d.). Hepatoblastoma. KidsHealth. Retrieved August 29, 2025, from https://kidshealth.org/en/parents/hepatoblastoma.html
8. National Cancer Institute. (n.d.). Childhood liver cancer types: Hepatoblastoma. NCI. Retrieved August 29, 2025, from https://www.cancer.gov/types/liver/childhood-liver-cancer

Published: 11 September 2025