Wilms Tumour (Nephroblastoma) (သန္ဓေသားကျောက်ကပ်ဆဲလ်များမှ ဖြစ်သောကင်ဆာ)

Wilms tumour သည် သန္ဓေသားကျောက်ကပ်ဆဲလ်များမှ စတင်ဖြစ်ပေါ်သည့် ကလေးကျောက်ကပ်ကင်ဆာအကျိတ်ဖြစ်သည်။ ကလေးကျောက်ကပ်ကင်ဆာ အမျိုးအစားများထဲတွင် အဖြစ်အများဆုံးဖြစ်သည်။ ယေဘုယျအားဖြင့် ကလေးအသက် (၅) နှစ်အောက်တွင် အဖြစ်များသော်လည်း ကလေးကြီးများတွင်လည်း ဖြစ်နိုင်သည်။ အများအားဖြင့် ကျောက်ကပ်တစ်ခုတွင်သာ ဖြစ်ပေါ်တတ်သော်လည်း တစ်ခါတစ်ရံတွင် ကျောက်ကပ်နှစ်ခုစလုံးတွင် တစ်ပြိုင်နက်တည်း ဖြစ်ပေါ်နိုင်သည်။

ကျောက်ကပ်သည် ခါးကျောရိုး၏ ဘယ်ဘက်နှင့် ညာဘက်တွင်ရှိသော ပဲစေ့ပုံသဏ္ဌာန် ကိုယ်တွင်းအင်္ဂါတစ်ခုဖြစ်သည်။ ၎င်း၏အဓိကလုပ်ဆောင်ချက်များမှာ သွေးတွင်းရှိ ပိုလျှံသောအရည်များ၊ ဆားဓာတ်များနှင့် အညစ်အကြေးများကို စစ်ထုတ်ပြီး ဆီးအဖြစ်စွန့်ထုတ်ခြင်း၊ သွေးပေါင်ချိန်ထိန်းညှိခြင်းနှင့် သွေးနီဥထုတ်လုပ်မှုတွင် ကူညီခြင်းတို့ဖြစ်သည်။

ဖြစ်ပေါ်ရသောအကြောင်းရင်းများ

Wilms tumour ဖြစ်ပေါ်ရခြင်းအကြောင်းရင်းကို အတိအကျမသိရသော်လည်း အောက်ပါအချက်များနှင့် ဆက်စပ်မှုရှိသည်ဟု ယူဆရသည်။

1. မျိုးဗီဇဆိုင်ရာ အပြောင်းအလဲများ
   သန္ဓေသားဘဝဖွံ့ဖြိုးမှုတွင် ကျောက်ကပ်နှင့် ဆီးလမ်းကြောင်းဆိုင်ရာ ဖွံ့ဖြိုးမှုကို ထိန်းချုပ်သည့် WT1, CTNNB1 နှင့် WTX ကဲ့သို့သော မျိုးဗီဇများတွင် ပြောင်းလဲမှုများဖြစ်ပေါ်ပါက Wilms tumour ဖြစ်နိုင်ခြေ မြင့်တက်လာသည်။ ဤမျိုးဗီဇဆိုင်ရာ ပြောင်းလဲမှုများကို Wilms tumour ဖြစ်သည့် ကလေးများ၏ (၃၀) ရာခိုင်နှုန်းခန့်တွင် တွေ့ရှိရသည်။
2. ကျောက်ကပ်ဆဲလ်များ မူမမှန်ဖွံ့ဖြိုးမှု
   သန္ဓေသားဘဝတွင် ကနဦးကျောက်ကပ်ဆဲလ်အချို့သည် ပုံမှန်အတိုင်း ပြောင်းလဲဖွံ့ဖြိုး ရင့်ကျက်ခြင်းမရှိဘဲ သန္ဓေသားကျောက်ကပ်ဆဲလ် (Nephroblast) များအဖြစ် ကျန်ရစ်နေတတ်သည်။ မွေးဖွားပြီးနောက်ပိုင်းတွင် ဤဆဲလ်များသည် ထိန်းချုပ်မရဘဲ ကြီးထွားပွါးများလာကာ ကျောက်ကပ်အတွင်း အကျိတ်အဖြစ် ဖွံ့ဖြိုးလာနိုင်သည်။ ဤဖြစ်စဉ်သည် Wilms tumour ဖြစ်ပေါ်ရခြင်း၏ အဓိကအကြောင်းရင်းတစ်ခုဖြစ်သည်။

Wilms tumour နှင့်ဆက်စပ်နေသော အခြေအနေများ

Wilms tumour ရှိသူကလေးများတွင် အောက်ပါမျိုးဗီဇလက္ခဏာစုများနှင့်လည်း တွဲ၍တွေ့ရနိုင်သည်။

• WAGR ရောဂါလက္ခဏာစု
  ထိုလက္ခဏာစုတွင် Wilms tumour၊ မျက်လုံးတွင် မျက်နက်ဆံမပါရှိခြင်း၊ ဆီးလမ်းကြောင်းနှင့် မျိုးပွါးလမ်းကြောင်း ပုံမမှန်မှုများ၊ ဉာဏ်ရည်မမီခြင်းတို့ပါဝင်သည်။ သန္ဓေသားကျောက်ကပ်ဆဲလ်ကင်ဆာ ဖြစ်နိုင်ခြေသည် (၅၀) ရာခိုင်နှုန်းခန့်ရှိသည်။
• Denys-Drash ရောဂါလက္ခဏာစု
  ထိုလက္ခဏာစုတွင် ကျောက်ကပ်ပျက်စီးခြင်း၊ ဆီးလမ်းကြောင်းနှင့် မျိုးပွါးလမ်းကြောင်း ပုံမမှန်မှုများ၊ သားဥအိမ် (သို့မဟုတ်) ဝှေးစေ့အကျိတ်ဖြစ်ခြင်းများ ပါဝင်သည်။ သန္ဓေသားကျောက်ကပ်ဆဲလ်ကင်ဆာ ဖြစ်နိုင်ခြေသည် (၉၀) ရာခိုင်နှုန်းခန့်ရှိသည်။
• Beckwith-Wiedemann ရောဂါလက္ခဏာစု
  ခန္ဓာကိုယ်တစ်ခြမ်း ကြီးထွားမှုလွန်ကဲခြင်း၊ ကိုယ်တွင်းအင်္ဂါများ (ပန်ကရိယ၊ အသည်း၊ ကျောက်ကပ်) ကြီးထွားခြင်း၊ မွေးရာပါ ဝမ်းဗိုက်ကြွက်သားနံရံ ချို့ယွင်းချက်များရှိခြင်း၊ လျှာကြီးခြင်း၊ မွေးကင်းစတွင် ကိုယ်အလေးကြီးခြင်း၊ နားတွင်အပေါက်ပါခြင်း၊ ခေါင်းသေးခြင်း၊ ဉာဏ်ရည်မမီခြင်းတို့ ပါဝင်သည်။ သန္ဓေသားကျောက်ကပ်ဆဲလ်ကင်ဆာ ဖြစ်နိုင်ခြေသည် (၁၀) ရာခိုင်နှုန်းခန့်ရှိသည်။

ဖြစ်နိုင်ခြေများသူများ

အောက်ပါအခြေအနေရှိသူများတွင် Wilms tumour ဖြစ်နိုင်ခြေပိုများသည်။

• အသက် (၅) နှစ်အောက် ကလေးများ
• မိန်းကလေးများ
• အာဖရိကနွယ်ဖွားကလေးများ
• မိသားစုတွင် Wilms tumour ရာဇဝင်ရှိသူများ
• အထက်ဖော်ပြပါ မျိုးဗီဇဆိုင်ရာ လက္ခဏာစုများရှိသူများ

ကလေးများတွင် တွေ့ရနိုင်သော အခြားကျောက်ကပ်ကင်ဆာများ

Wilms tumour အပြင် ကလေးများတွင် တွေ့နိုင်သော အခြားကျောက်ကပ်ကင်ဆာများမှာ

• Mesoblastic nephroma
• Clear cell sarcoma of kidney
• Malignant rhabdoid tumour of the kidney
• Renal cell carcinoma စသည်တို့ဖြစ်ကြသည်။

Wilms tumour အဆင့်သတ်မှတ်ခြင်း (Children’s Oncology Group – COG system)

Wilms tumour ကို အောက်ပါအတိုင်း အဆင့် (၅) ဆင့် ခွဲခြားနိုင်သည်။

• အဆင့် (၁) _ ကင်ဆာကျိတ်သည် ကျောက်ကပ်တစ်ခုတည်းတွင်သာရှိပြီး ခွဲစိတ်မှုဖြင့် အလုံးစုံဖယ်ရှားနိုင်သည်
• အဆင့် (၂) _ ကင်ဆာသည် ကျောက်ကပ်နှင့် ကျောက်ကပ်အနီးရှိ အဆီ (သို့မဟုတ်) သွေးကြောများသို့ ပျံ့နှံ့နေသော်လည်း ခွဲစိတ်မှုဖြင့် ဖယ်ရှားနိုင်သေးသည်
• အဆင့် (၃) _ ကင်ဆာသည် ကျောက်ကပ်ကိုကျော်လွန်၍ အနီးအနားရှိ ပြန်ရည်ကျိတ်များ (သို့မဟုတ်) ဝမ်းဗိုက်တွင်း အခြားနေရာများသို့ ပျံ့နှံ့နေသည်၊ ခွဲစိတ်မှုဖြင့် အလုံးစုံမဖယ်ရှားနိုင်ပေ
• အဆင့် (၄) _ ကင်ဆာသည် ဝမ်းဗိုက်နှင့်တင်ပါးဆုံကို ကျော်လွန်၍ အဆုတ်၊ အသည်း၊ အရိုး (သို့မဟုတ်) ဦးနှောက်စသည့် ခန္ဓာကိုယ်၏ အခြားအစိတ်အပိုင်းများသို့ ပျံ့နှံ့နေသည်
• အဆင့် (၅) _ ကင်ဆာသည် ကျောက်ကပ်နှစ်ဖက်လုံးတွင် ရှိနေသည်

ရောဂါလက္ခဏာများ

ရောဂါလက္ခဏာများသည် တစ်ဦးနှင့်တစ်ဦး တူညီမှုမရှိပါ။ မည်သည့်လက္ခဏာမှ မပြသောကလေးများ ရှိသကဲ့သို့ အချို့သောကလေးများတွင် အောက်ပါလက္ခဏာများ ခံစားရနိုင်သည်။

• ဝမ်းဗိုက်တွင် နာကျင်မှုမရှိသော အလုံးစမ်းမိခြင်း
• ဗိုက်ဖောင်းခြင်း
• ဗိုက်နာခြင်း
• ဖျားခြင်း
• ဆီးထဲသွေးပါခြင်း
• သွေးအားနည်းခြင်း
• သွေးပေါင်တက်ခြင်း
• အစားအသောက်ပျက်ခြင်း
• နုံးနယ်ခြင်း၊ အားနည်းခြင်း
• ဝမ်းချုပ်ခြင်း စသည်တို့ဖြစ်သည်။

နောက်ဆက်တွဲပြဿနာများ

ကင်ဆာဆဲလ်များသည် ခန္ဓာကိုယ်၏ အခြားသောနေရာများသို့ ပျံ့နှံ့နိုင်သည်။ ပျံ့နှံ့မှုအများဆုံးနေရာမှာ အဆုတ်ဖြစ်ပြီး အသည်း၊ ဦးနှောက်နှင့် အရိုးသို့လည်း ပျံ့နှံ့နိုင်သည်။ Wilms tumour ဖြစ်သူများ၏ (၁၀) ရာခိုင်နှုန်းခန့်သည် ရောဂါဖြစ်ကြောင်းသိရှိချိန်တွင် ‌ကျောက်ကပ်နှစ်ဖက်စလုံးတွင် ပျံ့နှံ့နေနိုင်သည်။

ကုသမှုပြီးနောက် ရေရှည်တွင် ဖြစ်ပေါ်နိုင်သော နောက်ဆက်တွဲပြဿနာများ

ကျောက်ကပ်တစ်လုံးကို ဖယ်ရှားလိုက်သည့်အခါ ကျန်ရှိနေသော ကျောက်ကပ်တစ်လုံးသည် ပုံမှန်အတိုင်း အလုပ်လုပ်နိုင်ပြီး ဖယ်ရှားလိုက်သည့် ကျောက်ကပ်၏အလုပ်ကို ဆက်လက်လုပ်ဆောင်ပေးသည်။ Wilms tumour များသည် ကျောက်ကပ်တစ်လုံးတည်းတွင်သာ ဖြစ်ပွါးလေ့ရှိသောကြောင့် ကလေးအနည်းငယ်၌သာ ရေရှည်တွင် ကျောက်ကပ်နှင့်ဆိုင်သော ပြဿနာများ ခံစားရနိုင်သည်။ အခြားဖြစ်ပေါ်နိုင်သော နောက်ဆက်တွဲပြဿနာများမှာ_

• ကင်ဆာဆေးသွင်းကုသခြင်း သို့မဟုတ် ဓာတ်ရောင်ခြည်ပေး၍ကုသခြင်းကို ခံယူပြီးနောက် နှလုံး (သို့မဟုတ်) အဆုတ်ပြဿနာများ ဖြစ်ပွါးနိုင်ခြင်း
• ကြီးထွားဖွံ့ဖြိုးမှုနှေးသွားခြင်း
• လိင်ပိုင်းဆိုင်ရာဖွံ့ဖြိုးမှုနှင့် ကလေးရနိုင်စွမ်းတွင် ပြောင်းလဲမှုများ ဖြစ်ပေါ်ခြင်း (အထူးသဖြင့် မိန်းကလေးများတွင်)
• နောက်ပိုင်းတွင် အခြားသောကင်ဆာများဖြစ်ပေါ်နိုင်ခြင်း စသည်တို့ဖြစ်သည်။

ဆေးရုံ၊ ဆေးခန်းပြသရန်

ကလေးသည် အထက်ဖော်ပြပါလက္ခဏာများကို ခံစားနေရပါက မိမိ၏မိသားစုဆရာဝန်နှင့် ပြသတိုင်ပင်ရန်လိုသည်။ မိသားစုဆရာဝန်မှ လိုအပ်သည့် စစ်ဆေးစမ်းသပ်မှုများ ပြုလုပ်ခြင်းဖြင့် ရောဂါရှာ‌ဖွေပေးနိုင်သည်။ လိုအပ်ပါက မိသားစုဆရာဝန်မှ သက်ဆိုင်ရာ အထူးကုဆရာဝန်များနှင့် တိုင်ပင်ကုသခြင်း၊​ လွှဲပြောင်းကုသခြင်းများ ပြုလုပ်ပေးမည်။

ရောဂါရှာဖွေခြင်း

ကလေး၏ရောဂါ ရှာဖွေရန်အတွက် သက်ဆိုင်ရာ အထူးကုဆရာဝန်မှ ရောဂါရာဇဝင်မေးမြန်းခြင်း၊ အသေးစိတ် စမ်းသပ်စစ်ဆေးခြင်းများအပြင် လိုအပ်သည့် စစ်ဆေးခြင်းများ ပြုလုပ်မည်။

ပြုလုပ်နိုင်သောစစ်ဆေးမှုများမှာ_

• ဓာတ်ခွဲစစ်ဆေးမှုများ
  ထိုစစ်ဆေးမှုများတွင် သွေးနီဥ၊ သွေးဖြူဥနှင့် သွေးဥမွှားပမာဏ စစ်ဆေးခြင်း (Complete Blood Count – CBC)၊ ကျောက်ကပ်လုပ်ငန်းစစ်ဆေးခြင်းများ၊ သွေးခဲဓာတ်စစ်ဆေးခြင်းများ၊ ဆီးစစ်ဆေးခြင်း စသည်တို့ပါဝင်သည်။
• ပုံရိပ်ဖော်စစ်ဆေးမှုများ
  • ဝမ်းဗိုက်အာထရာဆောင်း (USG Abdomen) ရိုက်ခြင်း
    ပထမဆုံးပြုလုပ်လေ့ရှိသော စစ်ဆေးမှုဖြစ်သည်။ ကျောက်ကပ်တွင် အကျိတ်များ ရှိမရှိနှင့် အခြားဝမ်းဗိုက်အတွင်းရှိ ကိုယ်တွင်းအင်္ဂါများ၏ အခြေအနေကို သိနိုင်သည်။
  • ရင်ဘတ်ဓာတ်မှန် (CXR) ရိုက်ခြင်း
• အဆုတ်သို့ ကင်ဆာဆဲလ်များ ပျံ့နှံမှု ရှိမရှိ သိနိုင်သည်။
• ဝမ်းဗိုက်ကွန်ပျူတာဓာတ်မှန် (CT scan) ရိုက်ခြင်း
  ကွန်ပျူတာဓာတ်မှန်ရိုက်ခြင်းဖြင့်_
  • အကျိတ်၏ မူလနေရာ
  • ပြန်ရည်ကျိတ်များသို့ ပျံ့နှံ့မှု ရှိမရှိ
  • ကျောက်ကပ်နှစ်ဖက်လုံးပါဝင်မှု ရှိမရှိ
  • သွေးကြောများအတွင်းသို့ တိုးဝင်နေမှု ရှိမရှိ
  • အသည်းသို့ ပျံ့နှံ့မှု ရှိမရှိကို သိရှိနိုင်သည်။

ထို့ပြင်လိုအပ်ပါက သံလိုက်ဓာတ်မှန် (MRI) ရိုက်ခြင်း၊ ဆေးသွင်းအရိုးဓာတ်မှန်ရိုက်ခြင်း (Bone scan) တို့ကို ပြုလုပ်နိုင်သည်။

အသားစယူစစ်ဆေးခြင်း
ကျောက်ကပ်မှ တစ်ရှူးပမာဏ အနည်းငယ်ကိုယူ၍ ပုံမမှန်ဆဲလ်များကို ကြည့်ရှုစစ်ဆေးခြင်းဖြစ်သည်။

ကုသခြင်း

သန္ဓေသား ကျောက်ကပ်ဆဲလ်ကင်ဆာ ကုသရာတွင် ယေဘုယျအားဖြင့် ခွဲစိတ်ကုသခြင်းနှင့် ကင်ဆာဆေးသွင်းကုသခြင်းတို့ ပါဝင်သည်။ တစ်ခါတစ်ရံတွင် ဓာတ်ရောင်ခြည်ပေး၍ ကုသခြင်းဖြင့်ပါ ကုသရန် လိုအပ်သည်။ ကုသမှုသည် ကင်ဆာ၏အဆင့်ပေါ်တွင်မူတည်၍ ကွာခြားသည်။

• ခွဲစိတ်ကုသခြင်း
  ခွဲစိတ်ကုသခြင်းတွင် ကင်ဆာအဆင့်ပေါ်မူတည်၍ ကျောက်ကပ်တစ်ခုလုံး (သို့မဟုတ်) ကျောက်ကပ်တစ်စိတ်တစ်ပိုင်းကို ဖယ်ရှားသည်။
  • ကျောက်ကပ်တစ်စိတ်တစ်ပိုင်းကို ဖယ်ရှားခြင်း (Removing part of the kidney)
    ကင်ဆာအကျိတ်နှင့် အကျိတ်ပတ်လည်ရှိ ကျောက်ကပ်တစ်စိတ်တစ်ပိုင်းကို ဖယ်ရှားခြင်းဖြစ်သည်။ ထိုခွဲစိတ်မှုကို သေးငယ်သောအကျိတ် (သို့မဟုတ်) ကျောက်ကပ်တစ်လုံးသာ အလုပ်လုပ်သောကလေးများတွင် ပြုလုပ်သည်။
  • ကျောက်ကပ်အပါအဝင် အနီးပတ်လည်ရှိတစ်ရှူးများကို ဖယ်ရှားခြင်း (Removing the kidney and surrounding tissue)
    ကျောက်ကပ်တစ်ခုနှင့် အနီးပတ်လည်ရှိ ပြန်ရည်ကျိတ်များ၊ ဆီးပို့ပြွန်တစ်စိတ်တစ်ပိုင်းနှင့် တစ်ခါတစ်ရံတွင် အက်ဒရီနယ်ဂလင်း (Adrenal glands) ကိုပါ ဖယ်ရှားသည်။
  • ကျောက်ကပ်နှစ်ခုလုံးဖယ်ရှားခြင်း (Removing all or part of both kidneys)
    ကင်ဆာသည် ကျောက်ကပ်နှစ်ဖက်လုံးတွင် ဖြစ်ပွါးပါက ကျောက်ကပ်နှစ်ဖက်လုံးမှ ကင်ဆာအကျိတ်ကို တတ်နိုင်သမျှ ဖယ်ရှားရန် လိုအပ်သည်။ တစ်ခါတစ်ရံတွင် ကျောက်ကပ်နှစ်ဖက်စလုံးကို ထုတ်ရနိုင်သည်။ ထိုကလေးများတွင် ကျောက်ကပ်ဆေးခြင်း သို့မဟုတ် ကျောက်ကပ်အစားထိုးခြင်း ပြုလုပ်ရန် လိုအပ်သည်။
• ကင်ဆာဆေးသွင်းကုသခြင်း (Chemotherapy)
  ခန္ဓာကိုယ်တစ်ခုလုံးရှိ ကင်ဆာဆဲလ်များကို အားပြင်းသည့်ဆေးများပေး၍ သေစေခြင်းဖြစ်သည်။ သွေးကြောမှတစ်ဆင့် ထိုးဆေးအနေဖြင့် ပေးရသည်။ ကင်ဆာဆေးသွင်းကုသခြင်းကို ကင်ဆာအဆင့်ပေါ်မူတည်၍ ခွဲစိတ်မှုမတိုင်မှီ ကင်ဆာအကျိတ် ကျုံ့သွားစေရန် ပေးနိုင်သကဲ့သို့ ခွဲစိတ်မှုပြီးသည့်နောက်တွင်မှ ကျန်ရှိနေသည့် ကင်ဆာဆဲလ်များကို ဖယ်ရှားရန်ပေးသည်လည်းရှိသည်။ ကင်ဆာဆေးသွင်းကုသခြင်းကြောင့် ဖြစ်ပေါ်နိုင်သော နောက်ဆက်တွဲပြဿနာများသည် သုံးသည့်ဆေးအမျိုးအစားပေါ် မူတည်သည်။ အဖြစ်များသော နောက်ဆက်တွဲပြဿနာများမှာ ပျို့ခြင်း၊ အန်ခြင်း၊ အစားအသောက်ပျက်ခြင်း၊ ဆံပင်ကျွတ်ခြင်းနှင့် ရောဂါပိုးဝင်လွယ်ခြင်းတို့ဖြစ်သည်။
• ဓာတ်ရောင်ခြည်ဖြင့် ကုသခြင်း (Radiation therapy)
  ဓာတ်ရောင်ခြည်ပေး၍ ကုသခြင်းကို ကင်ဆာအဆင့်များသည့် ကလေးများ သို့မဟုတ် ကင်ဆာပြန်ဖြစ်နိုင်ခြေများသည့် ကလေးများတွင် အသုံးပြုသည်။ အားပြင်းသော ဓာတ်ရောင်ခြည်ကို အသုံးပြု၍ ကင်ဆာဆဲလ်များကို သေစေခြင်းဖြစ်သည်။
• အခြားဆေးဝါးများဖြင့် ကုသခြင်း
  နာကျင်သက်သာမှုများကို ထိန်းချုပ်ရန် အကိုက်အခဲပျောက်ဆေးများပေးခြင်း၊ သွေးပေါင်တက်ခြင်းများအတွက် သွေးပေါင်ကျဆေးများပေးခြင်း၊ ပျို့အန်ခြင်းများအတွက် အအန်ပျောက်ဆေးများပေးခြင်း၊ ရောဂါပိုးများဝင်ခြင်းမှ ကာကွယ်ရန် ပဋိဇီဝပိုးသတ်ဆေးများပေးခြင်းတို့ ပြုလုပ်ရမည်။

Wilms tumour အတွက် ကုသမှုပြီးစီးသွားသည့်နောက်တွင်လည်း သက်ဆိုင်ရာ အထူးကုဆရာဝန်များနှင့် ပုံမှန်ဆက်လက်ပြသရန် လိုအပ်သည်။ ထိုသို့ပြသသည့်အချိန်တွင် ကင်ဆာပြန်ဖြစ်ပေါ်ခြင်း ရှိမရှိ၊ ကင်ဆာကုသမှုများကြောင့် နှလုံးနှင့်အဆုတ်များ ထိခိုက်မှု ရှိမရှိကို စောင့်ကြည့်စစ်ဆေးမည်ဖြစ်သည်။

ကာကွယ်ခြင်း

ဖြစ်ပေါ်ရသည့်အကြောင်းရင်းကို သေချာစွာ မသိနိုင်သောကြောင့် ကာကွယ်ရန် မဖြစ်နိုင်ပါ။ အရေးကြီးဆုံးမှာ ဖြစ်နိုင်ခြေများသည့် အခြေအနေရှိသူများတွင် ကျန်းမာရေး ပုံမှန်စစ်ဆေးခြင်းဖြင့် ကျောက်ကပ်တွင် ပုံမမှန်မှုများကို စောင့်ကြည့်ရမည်။ ကြိုတင်စစ်ဆေးခြင်းဖြင့် ကာကွယ်၍ မရသော်လည်း အထက်ပါရောဂါလက္ခဏာများကို စောစီးစွာသတိထားမိပါက အခြေအနေပေါ်မူတည်ပြီး မိသားစုဆရာဝန် (သို့မဟုတ်) သက်ဆိုင်ရာ အထူးကုဆရာဝန်နှင့်ပြသ၍ ညွှန်ကြားချက်များအတိုင်း အချိန်မီပြသ ကုသမှုခံယူခြင်းပင်ဖြစ်သည်။

References:

1. Cincinnati Children’s. (n.d.). Wilms tumor. Retrieved August 2, 2025, from https://www.cincinnatichildrens.org/health/w/wilms-tumor
2. Mayo Clinic. (n.d.). Wilms tumor: Symptoms and causes. Retrieved August 2, 2025, from https://www.mayoclinic.org/diseases-conditions/wilms-tumor/symptoms-causes/syc-20352655
3. Cleveland Clinic. (n.d.). Wilms tumor. Retrieved August 2, 2025, from https://my.clevelandclinic.org/health/diseases/23259-wilms-tumor
4. Leslie, S. W., Sajjad, H., & Murphy, P. B. (2023). Wilms tumor. StatPearls – NCBI Bookshelf. https://www.ncbi.nlm.nih.gov/books/NBK442004/
5. American Cancer Society. (n.d.). Wilms tumor. Retrieved August 2, 2025, from https://www.cancer.org/cancer/types/wilms-tumor.html
6. Cancer Research UK. (n.d.). Wilms tumour: Treatment. Retrieved August 2, 2025, from https://www.cancerresearchuk.org/about-cancer/childrens-cancer/wilms-tumour/treatment
7. The Wilms Tumor Foundation. (n.d.). Diagnosis and treatment. Retrieved August 2, 2025, from https://www.wilmsfoundation.org/diagnosisandtreatment
8. National Cancer Institute. (n.d.). Wilms tumor and other childhood kidney tumors treatment (PDQ®). https://www.cancer.gov/types/kidney/patient/wilms-treatment-pdq

Published: 22 August 2025